ޕާކިސްތާނުން އަފްޣާނިސްތާނުގެ ވެރިރަށް ކާބުލް ހިމެނޭހެން އެ ގައުމުގެ ބޮޑެތި ސިޓީތަކަށް މިއަދު ބޮން އަޅައިފި އެވެ.

ދެ ގައުމުގެ ދެމެދުގައި ހިނގަމުންދާ ކުރިމަތިލުންތަކަށްފަހު، ޕާކިސްތާނުގެ ދިފާއީ ވަޒީރު ވަނީ އަވަށްޓެރި ދެ ގައުމުގެ ދެމެދުގައި މިހާރު އޮތީ ބޮޑު ހަނގުރާމައެއް ކަމަށް އިއުލާން ކުރައްވާފަ އެވެ.

އޭއެފްޕީގެ ނޫސްވެރިން ރިޕޯޓްކުރާ ގޮތުގައި، ކާބުލް އާއި ކަންދަހާރުގެ މަތިން ހަނގުރާމަމަތީ ޖެޓްތައް އުދުހޭ އަޑާއި ބާރުގަދަ ގޮވުންތަކުގެ އަޑު ވަނީ އިވިފަ އެވެ. ޕާކިސްތާނުގެ މި ހަމަލާތައް އަމާޒުވެފައިވަނީ އަފްޣާނިސްތާނުގެ ވެރިރަށަށާއި ތާލިބާން ސަރުކާރުގެ ބާރުގަދަ ދެކުނުގެ ސަރަހައްދުތަކަށެވެ.

ހުކުރު ދުވަހުގެ ހެނދުނުން ފެށިގެން ބަޑީގެ ހަމަލާތަކުގެ އަޑު އިވެމުންދާއިރު ޕާކިސްތާނުން އެނބުރި އަންނަ އަފްޣާން ރައްޔިތުން މަޑުކޮށްގެން ތިބި ވަގުތީ ކޭމްޕަކަށް ވެސް ރޭގަނޑުގެ ވަގުތެއްގައި ހަމަލާތައް ދީފައިވާ ކަމަށް ރިޕޯޓުތައް ބުނެ އެވެ. އެ ކޭމްޕުގައި ހުރި އުމުރުން 65 އަހަރުގެ ގަންދަރު ޚާން ކިޔާ މީހަކު ބުނި ގޮތުގައި، ހަމަލާތައް ފެށުމާއެކު ކުޑަކުދިންނާއި، އަންހެނުން އަދި އުމުރުން ދުވަސްވީ މީހުން ފުރާނަ ސަލާމަތްކުރުމަށް ދުވަމުންދިޔަ އެވެ.

ޕާކިސްތާނުން މި ވަރުގަދަ އޮޕަރޭޝަން ފަށާފައިވަނީ، އޭގެ ކުރިން ޕާކިސްތާނުން ދިން ވައިގެ ހަމަލާތަކަކާ ގުޅިގެން ބުރާސްފަތި ދުވަހުގެ ރޭ އަފްޣާން ސިފައިން ޕާކިސްތާނުގެ ބޯޑަރު ސިފައިންނަށް ހަމަލާދިނުމާ ގުޅިގެންނެވެ.

މިދިޔަ އޮކްޓޯބަރު މަހު ހިނގި ކުރިމަތިލުންތަކުގައި ދެ ފަރާތުން 70 އަށްވުރެ ގިނަ މީހުން މަރުވި ފަހުން، ދެ ގައުމުގެ ގުޅުން ވަނީ ވަރަށް ބޮޑަށް ގޯސްވެފަ އެވެ. އަދި ދެ ގައުމު ގުޅޭ ބޯޑަރުތައް ވެސް ވަނީ ބޮޑުބަޔަކަށް ބަންދުކޮށްފަ އެވެ.

ޕާކިސްތާނުން ތުހުމަތުކުރާ ގޮތުގައި، އެ ގައުމަށް ހަމަލާދޭ ހަނގުރާމަވެރި ޖަމާއަތްތަކާ ދެކޮޅަށް ފިޔަވަޅު އެޅުމަށް އަފްޣާނިސްތާނުން ވަނީ ނުކުޅެދިފަ އެވެ. ނަމަވެސް ތާލިބާން ސަރުކާރުން މި ތުހުމަތުތައް ދޮގުކުރެ އެވެ. ޕާކިސްތާނަށް ދެވޭ ގިނަ ހަމަލާތަކުގެ ޒިންމާ އުފުލަނީ "ތަހުރީކޭ ތާލިބާން ޕާކިސްތާން" (ޓީ.ޓީ.ޕީ) އިންނެވެ. 2021 ވަނަ އަހަރު އަފްޣާނިސްތާނުގެ ވެރިކަމަށް ތާލިބާނުން އައި ފަހުން، ޕާކިސްތާނުގައި އެ ޖަމާއަތުން ދޭ ހަމަލާތައް ވަނީ އިތުރުވެފަ އެވެ.

ޕާކިސްތާނުގެ އިންފޮމޭޝަން މިނިސްޓަރު އަޠާއުﷲ ތަރާރު އެކްސް ގައި ވިދާޅުވި ގޮތުގައި، ކާބުލް، ޕަކްތިޔާ އަދި ކަންދަހާރުގައި ހުރި އަފްޣާން ތާލިބާނުންގެ އަސްކަރީ އަމާޒުތަކަށް ޕާކިސްތާނުން ވަނީ ވަރުގަދަ ހަމަލާތަކެއް ދީފަ އެވެ. ހަމައެއާއެކު، ޕާކިސްތާނުގެ ޑިފެންސް މިނިސްޓަރު ޚަވާޖާ އާސިފް ވަނީ ތާލިބާން ސަރުކާރާ ދެކޮޅަށް ފާޅުގައި ހަނގުރާމަ އިއުލާނުކުރައްވާފަ އެވެ. އޭނާ ވިދާޅުވީ ޕާކިސްތާނުގެ ކެތްތެރިކަން މިހާރު ކޮޅުންލައިފި ކަމަށާއި، މިއީ ދެ ފަރާތުގެ މެދުގައި ފެށުނު ހަނގުރާމައެއް ކަމަށެވެ.

ނާޒުކު ހަމަލާބަދަލުކުރުން ހުއްޓާލުމުގެ އެއްބަސްވުން އުވާލުން

ދެކުނު އޭޝިއާގެ މަސްރަހު ދިރާސާކުރައްވާ މާހިރެއް ކަމަށްވާ މައިކަލް ކުގަލްމަން "އެކްސް" ގައި ވިދާޅުވީ ރޭގަނޑު ދިން މި ހަމަލާތަކަކީ ކުރިން ހިނގި ކުރިމަތިލުންތަކަށްވުރެ މާ ނުރައްކާތެރި އަދި މަސްރަހު ގޯސްވެގެންދިޔަ ކަމެކެވެ. އޭނާ ފާހަގަކުރެއްވި ގޮތުގައި، ޕާކިސްތާނުން މިފަހަރު އަމާޒުކޮށްފައިވަނީ ހަމައެކަނި ޓީޓީޕީ އަށް ނޫން ކަމަށާއި، ސީދާ ތާލިބާން ސަރުކާރަށް ކަމަށް ބެލެވެއެވެ.

ގަތަރާއި ތުރުކީ މެދުވެރިވެގެން ކުރިއަށްގެންދިޔަ މަޝްވަރާތަކަށްފަހު، ދާއިމީ އެއްބަސްވުމަކަށް އައުމަށް ކުރި މަސައްކަތްތައް ވަނީ ނާކާމިޔާބުވެފަ އެވެ. އެކި ފަހަރުމަތިން ހަމަލާބަދަލުކުރުން ހުއްޓާލުމުގެ އެއްބަސްވުމާ ހިލާފުވުމާ ގުޅިގެން، މި މަހު ސައުދީ އަރަބިއްޔާއިން ވަނީ މިކަމުގެ ތެރެއަށް ވަދެ، އޮކްޓޫބަރު މަހު އަފްޣާނިސްތާނުން ހައްޔަރުކުރި ޕާކިސްތާނުގެ ތިން ސިފައިން މިނިވަންކުރުމުގައި މެދުވެރިއެއްގެ ދައުރު އަދާކޮށްފަ އެވެ.

ސައުދީން ނެރުނު ބަޔާނެއްގައިވާ ގޮތުން، ސައުދީ ޚާރިޖީ ވަޒީރު ޕްރިންސް ފައިސަލް ބިން ފަރްހާން ވަނީ ހުކުރު ދުވަހު ޕާކިސްތާނުގެ ޚާރިޖީ ވަޒީރު އިސްހާޤް ދާރްއާ ފޯނުން ގުޅުއްވައި މި މައްސަލައާ ގުޅޭގޮތުން މަޝްވަރާ ކުރައްވާފަ އެވެ. މީގެ އިތުރުން، އަފްޣާނިސްތާނާއި ޕާކިސްތާނާ ބޯޑަރު ހިއްސާކުރާ އީރާނުން ވެސް ވަނީ މި މައްސަލަ ހައްލުކުރުމަށް މަޝްވަރާގެ މަގު ފަހިކޮށްދިނުމަށް ތައްޔާރަށް އޮތްކަން ހާމަކޮށްފަ އެވެ.

ދެ ގައުމުގެ އަސްކަރިއްޔާއިން ބުނާ ގޮތުގައި، އެންމެ ފަހުން ބޯޑަރު ސަރަހައްދުގައި ހިނގި ހަމަނުޖެހުންތަކުގައި ދެ ފަރާތުން ވެސް އެތައް ސިފައިންނެއް ވަނީ މަރުވެފަ އެވެ. މިއީ ފާއިތުވި މަސްތަކުގައި ޕާކިސްތާނުން އަފްޣާނިސްތާނަށް ދިން ހަމަލާތަކާއި ބޯޑަރުގައި ހިނގި ކުރިމަތިލުންތަކުގެ ސަބަބުން އިތުރުވި ނުތަނަވަސްކަމުގެ ނަތީޖާއެކެވެ.

ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވިދާޅުވީ، އެ ގައުމުގެ އަސްކަރިއްޔާއަކީ ކޮންމެފަދަ އުދުވާނީ އަމަލެއް ނުވަތަ ރޭވުމެއްވެސް ފުނޑުފުނޑުކޮށްލުމުގެ ފުރިހަމަ ގާބިލުކަން ލިބިގެންވާ ބައެއް ކަމަށެވެ.

ވައިގެ ސަރަހައްދުގައި ޖެޓްތަކުގެ އަޑު

އަފްޣާނިސްތާންނުގެ ވެރިރަށް ކާބުލްގައި ތިބި އޭއެފްޕީގެ ނޫސްވެރިންނަށް ވަނީ އެތައް ގަޑިއިރެއް ވަންދެން ޖެޓްތަކުގެ އަޑާއި، ބާރުގަދަ ގޮވުންތަކުގެ އިތުރުން ބަޑީގެ ހަމަލާތަކުގެ އަޑު އިވިފަ އެވެ. ތާލިބާނުންގެ އެންމެ މަތީ ލީޑަރު ހިބަތުﷲ އަޚުންޒާދާ ދިރިއުޅުއްވާ ކަންދަހާރުގައި ހުރި އޭއެފްޕީގެ ރިޕޯޓަރަކުވެސް ވަނީ އެ ސިޓީގެ މަތިން ޖެޓްތައް އުދުހުނު އަޑު އިވުނު ކަމަށް ބުނެފަ އެވެ.

މުސްލިމު އާބާދީ ބޮޑު އަފްޣާނިސްތާންނުގައި، ރަމަޟާން މަހުގެ ހުކުރު ދުވަހަކަށް ވުމާއެކު، އިރު އެރިއިރު ކާބުލްގެ މަގުތަކުން ފެނުނީ އަމާންކަމެވެ. އޭއެފްޕީގެ ނޫސްވެރިން ފާހަގަކުރި ގޮތުގައި، ސަލާމަތީ ބާރުތަކުގެ ހަރަކާތްތައް ނުވަތަ ޗެކްޕޯސްޓްތައް އިތުރުކޮށްފައެއް ނުވެ އެވެ.

ޕާކިސްތާނުން ވައިގެ ހަމަލާތަކެއް ދިންކަން އަފްޣާނިސްތާންނު ސަރުކާރުން ވަނީ ކަށަވަރުކޮށްދީފަ އެވެ. ސަރުކާރުގެ ތަރުޖަމާނު ޒަބީހުﷲ މުޖާހިދު ވިދާޅުވި ގޮތުގައި، މި ހަމަލާތަކުގައި އެއްވެސް މީހަކު މަރުވެފައެއް ނުވެ އެވެ. އޭގެ ގަޑިއިރުތަކެއް ކުރިން މުޖާހިދު ވަނީ ޕާކިސްތާނު ސިފައިން ތަކުރާރުކޮށް ކުރަމުންދާ އުދުވާނުތަކަށް ރައްދު ދިނުމުގެ ގޮތުން ބޯޑަރު ސަރަހައްދުގައި ވަރުގަދަ ހަމަލާތަކެއް ފަށާފައިވާކަން އިއުލާނުކުރައްވާފަ އެވެ.

އަފްޣާނިސްތާންނުގެ ދިފާއީ ވުޒާރާއިން ހާމަކުރި ގޮތުގައި، އެއްގަމު މަގުން ދިން ހަމަލާތަކުގައި އެ ގައުމުގެ އަށް ސިފައިން ވަނީ މަރުވެފަ އެވެ. މީގެ އިތުރުން، ތުރުޚަމް ބޯޑަރު ކައިރީގައި ޕާކިސްތާނުން އެނބުރި އަންނަ މީހުންނަށް ހާއްސަކޮށްފައިވާ ކޭމްޕަކަށް އަމާޒުވި ހަމަލާތަކެއްގައި އާންމުން ޒަހަމްވި ކަމަށް އަފްގާނު އޮފިޝަލަކު ރިޕޯޓުކޮށްފައި ވެއެވެ.

މިދިޔަ އޮކްޓޯބަރު މަހުން ފެށިގެން ބޯޑަރު ބޮޑުބައި ބަންދުކޮށްފައި އޮތް ނަމަވެސް، އެނބުރި ގައުމަށް އަންނަ އަފްގާނު ރައްޔިތުންނަށް ބޯޑަރު ހުރަސްކުރުމުގެ ހުއްދަ ދަނީ ދެމުންނެވެ.

ހަނގުރާމައާ ގުޅިގެން ގައުމުތަކުގެ ކަންބޮޑުވުން

އަފްޣާނިސްތާނާއި ޕާކިސްތާނާ ދެމެދު ބަދަލުކުރަމުންދާ ބޯޑަރު ހަމަލާތައް ވަގުތުން ހުއްޓާލުމަށާއި، ދެ ގައުމުގެ ދެމެދުގައި އުފެދިފައިވާ ދެބަސްވުންތައް ޚާރިޖީ މުޢާމަލާތްތަކުގެ ތެރެއިން ހައްލުކުރުމަށް ރަޝިޔާއިން ވަނީ ގޮވާލައިފަ އެވެ. ރަޝިޔާގެ ފޮރިން މިނިސްޓްރީއާ ހަވާލާދީ އާރް.އައި.އޭ ނިއުސް އެޖެންސީން މިކަން ރިޕޯޓްކޮށްފައި ވެއެވެ.

ޕާކިސްތާނުން އަފްޣާނިސްތާނަށް ދިން ވައިގެ ހަމަލާތަކާ ގުޅިގެން، ދެ ގައުމުގެ މެދުގައި އުފެދިފައިވާ ހަމަނުޖެހުންތަކަށް ހައްލެއް ހޯދުމަށް "ވާހަކަދެއްކުމުގެ މަގު ފަހިކޮށްދިނުމަށް" އީރާނުން ވަނީ އެހީތެރިކަން ހުށަހަޅާފަ އެވެ.

އީރާނުގެ ފޮރިން މިނިސްޓަރ އައްބާސް އަރަގްޗީ 'އެކްސް' ގައި ކުރެއްވި ޕޯސްޓެއްގައި ވިދާޅުވީ، ދެ ގައުމުގެ މެދުގައި މަޝްވަރާކުރުމަށް މަގުފަހިކޮށްދިނުމަށާއި، އެއްބާރުލުން ގާއިމުކުރުމަށްޓަކައި ބޭނުންވާ ކޮންމެ އެހީތެރިކަމެއް ފޯރުކޮށްދިނުމަށް އީރާނު އޮތީ ފުރިހަމައަށް ތައްޔާރަށް ކަމަށެވެ.

މަސްތަކަކަށް ދެމިގެން ގޮސްފައިވާ ބޯޑަރު ހަމަނުޖެހުންތައް

ތާލިބާން ސަރުކާރުގެ ތަރުޖަމާނު މުޖާހިދު އޭއެފްޕީ އަށް މައުލޫމާތު ދެއްވަމުން ވިދާޅުވީ، ޕާކިސްތާނުގެ ބައެއް ސިފައިން ހައްޔަރުކޮށްފައިވާ ކަމަށެވެ. ނަމަވެސް، އިސްލާމްއާބާދުގައި ހުންނަ ޕާކިސްތާނުގެ ބޮޑުވަޒީރުގެ އޮފީހުން ވަނީ މި ވާހަކަ ދޮގުކޮށްފަ އެވެ.

އަފްޣާނިސްތާނުގެ ނަންގަރްހާރް އަދި ޕަކްތިކާ ޕްރޮވިންސަށް ޕާކިސްތާނުން ދިން ވައިގެ ހަމަލާތަކުގައި މަދުވެގެން 13 އާންމުން މަރުވެފައިވާ ކަމަށް އަފްޣާނިސްތާނުގައި ހުންނަ އދ. ގެ މިޝަނުން ބުނެފައި ވެއެވެ. މި އަސްކަރީ އޮޕަރޭޝަން ހިންގާފައިވަނީ އާދީއްތަ ދުވަހުގެ ރޭގަނޑުގެ ވަގުތެއްގަ އެވެ.

މީގެ އިތުރުން، އަންގާރަ ދުވަހުވެސް ދެ ގައުމުގެ ބޯޑަރު ސަރަހައްދުގައި ހަމަލާ ބަދަލުކުރެވުނު ކަމަށް ދެ ފަރާތުން ރިޕޯޓްކޮށްފައިވީ ނަމަވެސް، އެއްވެސް މީހަކަށް ގެއްލުމެއް ލިބިފައެއް ނުވެއެވެ.

އަސްކަރީ ކުރިމަތިލުންތަކުގެ އިތުރުން، ފާއިތުވި މަސްތަކުގައި ޕާކިސްތާނާއި އަފްޣާނިސްތާނުގައި ނުރައްކާތެރި ޖާނުން ފިދާވުމުގެ ހަމަލާތަކެއް ވެސް ވަނީ ދީފަ އެވެ. މީގެ ތެރޭގައި އިސްލާމްއާބާދުގައި ހުންނަ ޝީޢީ މިސްކިތަކަށް ދިން ހަމަލާގައި 40 އަށްވުރެ ގިނަ މީހުން މަރުވި ހާދިސާ ހިމެނެ އެވެ. މި ހަމަލާގެ ޒިންމާ އުފުލާފައިވަނީ އިސްލާމިކް ސްޓޭޓް (އައިއެސް) ގްރޫޕުންނެވެ.

އައިއެސް ގެ ސަރަހައްދީ ގޮފި ކަމަށްވާ އިސްލާމިކް ސްޓޭޓް-ޚުރާސާން އިން ވަނީ މިދިޔަ މަހު ކާބުލްގެ ރެސްޓޯރަންޓެއްގައި ދިން ނުރައްކާތެރި ޖާނުން ފިދާވުމުގެ ހަމަލާގެ ޒިންމާވެސް އުފުލާފަ އެވެ.