ދުޅަހެޔޮ ޖީލެއް ބިނާކުރަން ހަކުރުން ޓެކްސް ނެގުމުގެ އިތުރުން އެއަށް ދޭ ސަބްސިޑީ ކަނޑާލުމުގެ މަޝްވަރާ ކުރަމުންދާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ނާޒިމް ވަނީ ދުޅަހެޔޮ ޖީލެއް ބިނާކުރަން ސަރުކާރުން އަޅަން ވިސްނަމުންދާ ބައެއް ފިޔަވަޅުތައް ހިއްސާކޮށްދެއްވާފަ އެވެ. އެގޮތުން ރާއްޖޭގައި ޝީޝާ މަނާކުރުމަށް ވެސް މަޝްވަރާކުރަމުން އަންނަ ކަމަށް ވިދާޅުވި އެވެ.

މިދިޔަ އަހަރު ސަރުކާރުން ވަނީ 2007 ވަނަ އަހަރުން ފެށިގެން އުފަންވާ ކުދިންނަށް ދުންފަތް މަނާކުރުމާއި ވޭޕްގެ ބާވަތްތައް ރާއްޖޭގައި އެއްކޮށް މަނާކޮށްފަ އެވެ.

"މިހާރު އަޅުގަނޑުމެން ވަރަށް މަޝްވަރާކުރާ ކަންތައްތަކުގެ ވާހަކަ ތި ދަންނަވާލީ ޝީޝާ އާއި ހަކުރާ،" ނޫސްވެރިއަކު ކުރި ސުވާލެއްގެ ޖަވާބުގައި ނާޒިމް ވިދާޅުވި އެވެ.

ނާޒިމް ވިދާޅުވީ ޕަބްލިކް ހެލްތު ވިސްނުމަކުން ހަރުފަތަކަށް ފަހު ހަރުފަތެއް ގިރާކުރަމުން ދާނަމަ، ކުރިއަށް އޮތް ތަނުގައި ހަކުރުގެ މައްސަލައަށް ހައްލު ނާންނާނެ ކަމަށް ނުދެކޭ ކަމަށެވެ.

"އަޅުގަނޑުމެން އެކި ލެވެލްގައި އެބަ ކުރެވޭ [މަޝްވަރާ]. ކިހާ ހިސާބެއްގައި ތޯ މުޅިން ތަންފީޒުވެގެން ދާނީ، އެއީ ކަންނޭނގެ އުފެދޭނެ ސުވާލަކީ. އެންމެ މުހިއްމު ދަނޑިވަޅުގައި، މުހިއްމު ހާލަތުގައި، މުހިއްމު ވަގުތުގައި އެކަންކުރުން ވަރަށް މުހިއްމު،" އޭނާ ވިދާޅުވި އެވެ.

ހަކުރު ބާވަތްތަކުން ޓެކްސް ނެގުމާއި ސަބްސިޑީ ކަނޑާލާނެ ދުވަހަކަށް ސިއްހީ ދާއިރާއިން އިންތިޒާރުކުރާ ކަމަށް ވެސް ނާޒިމް ވިދާޅުވި އެވެ.