ވިޔަފާރިތަކަށް ވިއްކާ ތެލުގެ އަގު އެސްޓީއޯއިން ވަރަށް ބޮޑުކޮށްފި
އެމްޑީޕީގެ ކެމްޕޭން ބެނާތައް ނަގައި އެޗްޑީސީން ހަލާކުކޮށްލައިފި
އިންތިހާބާ ދިމާކޮށް އުލިގަމުގައި ޔޮޓް މެރީނާ ހަދަން ހަވާލުކޮށްފި
އެމެރިކާގެ ބައިވެރިއެއް ކަމަށްވާ ޔުނައިޓެޑް އަރަބް އެމިރޭޓްސް (ޔޫއޭއީ) އަށް އީރާނުން އަންގާރަ ދުވަހު އާ ހަމަލާތަކެއް ދީފި އެވެ. ގަލްފުގެ ގައުމުތަކަށް އީރާނުން އަމާޒުކުރި މި ހަމަލާތަކަކީ އުންމީދު ކުރި ކަމެއް ނޫން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ނަމަވެސް، ހަނގުރާމަ ފެށުމުގެ ކުރިން އެފަދަ ކަމެއް ހިނގައިފާނެ ކަމުގެ އިންޒާރު އޭނާއަށް ލިބިވަޑައިގެންފައިވާ ކަމަށް މަސްދަރުތަކުން ބުނެ އެވެ.
އެމެރިކާ އާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައަށް ތިން ހަފުތާ ވެފައިވާއިރު، މިހާތަނަށް މަދުވެގެން 2,000 މީހުން ވަނީ މަރުވެފަ އެވެ. ދުނިޔޭގެ އިގްތިސާދަށް މުހިންމު ހޮރްމޫޒް ކަނޑުއޮޅި ބަންދުވެފައި އޮތުމުގެ ސަބަބުން ތެލުގެ އަގު އުފުލި، އިންފްލޭޝަންގެ ބިރުވެރިކަން ވަނީ އިތުރުވެފަ އެވެ. އަންގާރަ ދުވަހުގެ ހެނދުނު ވެސް ދެފަރާތުން ވަނީ ވަރުގަދަ ހަމަލާތަކެއް ބަދަލުކޮށްފަ އެވެ. އިޒްރޭލުން ތެހެރާންގައި ހުރި އީރާނުގެ މަރުކަޒުތަކަށް ހަމަލާދީފައިވާއިރު، އީރާނުން ވަނީ އިޒްރޭލަށް މިސައިލް ހަމަލާތަކެއް ދީފަ އެވެ.
އީރާނުން އަވަށްޓެރި ގައުމުތަކަށް ދިން ހަމަލާތަކުން ޓްރަމްޕަށް ސިހުން
އީރާނުން ޔޫއޭއީއަށް ދިން ހަމަލާތަކުގައި ފުޖައިރާގެ ތެޔޮ ރައްކާކުރާ މަރުކަޒަކަށް ޑްރޯން ހަމަލާއެއް އަރާފައިވެ އެވެ. އަދި އަބޫދާބީގެ ބަނީ ޔާސް ސަރަހައްދަށް ވެއްޓުނު ބެލިސްޓިކް މިސައިލެއްގެ ބައިތަކުގެ ސަބަބުން ޕާކިސްތާނުގެ މީހަކު ވަނީ މަރުވެފަ އެވެ.
އެމެރިކާގެ ރައީސް ޓްރަމްޕް ވިދާޅުވި ގޮތުގައި ގަތަރު، ސައުދީ އަރަބިއްޔާ، ޔޫއޭއީ، ބަހްރޭން އަދި ކުވެއިތަށް އީރާނުން ހަމަލާދިނުމަކީ ލިބުނު ކުއްލި ސިހުމެކެވެ. ނަމަވެސް، އެމެރިކާގެ އިންޓެލިޖެންސް ރިޕޯޓްތަކާ ހަވާލާދީ މަސްދަރުތަކުން ބުނާ ގޮތުގައި، އީރާނަށް ހަމަލާދީފިނަމަ ގަލްފުގެ ބައިވެރިންނަށް އީރާނުން ހަމަލާދޭނެ ކަމުގެ އިންޒާރު ހަނގުރާމަ ފެށުމުގެ ކުރިން ވެސް ޓްރަމްޕަށް ވަނީ ދީފަ އެވެ.
ހޮރްމޫޒް ހުޅުވުމަށް އެހީވާނެ ކޯލިޝަނެއް ޓްރަމްޕަށް ނުލިބުނު
ހޮރްމޫޒް ކަނޑުއޮޅި ހުޅުވުމަށް އެހީތެރިވުމަށް ޖަރުމަނު، ސްޕެއިން، އިޓަލީ، ފްރާންސް، ޖަޕާން އަދި އޮސްޓްރޭލިއާ ފަދަ ގައުމުތަކުން ވަނީ ދެކޮޅު ހަދާފަ އެވެ. މީގެ ސަބަބުން ޓްރަމްޕް ވަނީ ބައެއް ބައިވެރިންނަށް ނުރުހުން ފާޅުކުރައްވާފަ އެވެ. ޖަރުމަނުގެ ޗާންސެލަރު ފްރެޑްރިކް މާޒް ވިދާޅުވީ، މި ހަނގުރާމަ ފެށުމުގެ ކުރިން އެމެރިކާ އާއި އިޒްރޭލުން ޖަރުމަނާ މަޝްވަރާކޮށްފައި ނުވާ ކަމަށެވެ. އީރާނުގެ މަޖިލީހުގެ ރައީސް މުހައްމަދު ބާގިރު ގަލިބާފް ވިދާޅުވީ އީރާނުގެ ހަމަލާދިނުމުގެ ގާބިލުކަން މިހާރު އިތުރުވެފައިވާ ކަމަށެވެ.
ތެލުގެ އަގު އުފުލި އިންފްލޭޝަނަށް ބާރުބޮޑުވެފައި
ހަނގުރާމައިގެ ސަބަބުން އަންގާރަ ދުވަހު ތެލުގެ އަގު 5 އިންސައްތައަށް ވުރެ ބޮޑަށް ވަނީ އުފުލިފަ އެވެ. މީގެ ސަބަބުން ދުނިޔޭގެ އިގްތިސާދީ ކުރިއެރުމަށް ހުރަސްއެޅި، އިންފްލޭޝަން މަތިވެދާނެ ކަމުގެ ބިރު ވަނީ ބޮޑުވެފަ އެވެ. މި ހާލަތާ ގުޅިގެން އޮސްޓްރޭލިއާގެ ސެންޓްރަލް ބޭންކުން ވަނީ ޖެހިޖެހިގެން ދެވަނަ މަހު އިންޓްރެސްޓް ރޭޓް މަތިކޮށްފަ އެވެ. އިގްތިސާދީ މާހިރުން އަންދާޒާކުރާ ގޮތުގައި ތެލުގެ އަގު މިގޮތަށް އުފުލެމުންދާނަމަ، ދުނިޔޭގެ ބާޒާރުތަކަށް ބޮޑެތި ލޮޅުންތަކެއް އަރާނެ އެވެ.
