ބޮލީވުޑްގެ "ގްރީކް ގޯޑް" ގެ ނަމުން މަޝްހޫރުވެފައިވާ ރިތިކް ރޯޝަނަކީ މިއަދު އިންޑިއާގެ ފިލްމީ ދާއިރާގައި ހުރި އެންމެ އަގުބޮޑު އަދި އެންމެ ކާމިޔާބު އެއް ތަރި އެވެ. އެހެން ނަމަވެސް، އޭނާގެ މި ބޮޑު ކާމިޔާބީގެ ފަހަތުގައި އޮތީ ވަރަށް އާދައިގެ ކުޑަ ފެށުމެކެވެ.

މި ފަހުން ރިތިކް ވަނީ އޭނާއަށް ފުރަތަމަ މުސާރައިގެ ގޮތުގައި ލިބުނު ފައިސާގެ ވާހަކަ ހިއްސާކޮށްފަ އެވެ. ރިތިކް ފުރަތަމަ ފިލްމީ މަސައްކަތެއްގައި ބައިވެރިވީ އުމުރުން އެންމެ ހަ އަހަރުގަ އެވެ. އެއީ 1980 ވަނަ އަހަރު ނުކުތް ފިލްމު "އާޝާ"ގަ އެވެ.

މި ފިލްމުގެ ލަވައެއްގެ ތެރެއިން ފެންނަ މަންޒަރެއްގައި ނެށުމުގެ ފުރުސަތު ރިތިކަށް ލިބުނެވެ. އެ މަސައްކަތުގެ އުޖޫރައެއްގެ ގޮތުން އޭނާއަށް ލިބުނީ އެންމެ 100 އިންޑިއަން ރުޕީސްއެވެ. ރިތިކް ބުނި ގޮތުގައި އެއީ އޭނާގެ ހަޔާތުގައި އަމިއްލަ މަސައްކަތުން ހޯދި ފުރަތަމަ އާމްދަނީ އެވެ.

އެ ދުވަސްވަރުގެ ހަނދާންތައް އާކުރަމުން ރިތިކް ބުނީ، އެ ލިބުނު 100 ރުޕީސް ހިފައިގެން އޭނާ ދިޔައީ ކުޅޭ އެއްޗެހި ވިއްކާ ފިހާރައަކަށް ކަމަށެވެ. އަދި އެ ފައިސާއިން އޭނާ ގަތީ "ހޮޓް ވީލްސް" މަރުކާގެ ކުޑަ ކުޅޭ ކާރުތަކެއް ކަމަށް އޭނާ ބުންޏެވެ.

ރިތިކް ރޯޝަން ބޮލީވުޑަށް ރަސްމީކޮށް ތައާރަފްވީ 2000 ވަނަ އަހަރު ނުކުތް "ކަހޯ ނާ ޕިޔާރް ހޭ" އިންނެވެ. އޭގެ ފަހުން އޭނާ ވަނީ ފާއިތުވި 26 އަހަރު ތެރޭގައި އެތައް ކާމިޔާބު ފިލްމުތަކެއް ކުޅެ، ބައިނަލްއަގުވާމީ ފެންވަރުގައި މަގުބޫލުކަން ހޯދާފަ އެވެ.

އުމުރުން ހަ އަހަރުގައި 100 ރުޕީސްއިން ފެށި މި ދަތުރުގައި، މިއަދު ރިތިކް އަކީ އެތައް ސަތޭކަ ކްރޯޑް ރުޕީސްގެ މިލްކިއްޔާތެއް އޮތް، އިންޑިއާގެ އެންމެ ނުފޫޒުގަދަ އެއް ފިލްމީ ތަރި އެވެ.