ގދ. ފިޔޯރީގެ ހުޅަނގުން 9 ނޯޓިކަލް މޭލު ބޭރުން ބޭރުގެ ދެ މަސްބޯޓެއް ހަރަކާތްތެރިވަމުންދާތީ، އެމްއެންޑީއެފް އިން އެ ސަރަހައްދުގައި ހަރަކާތްތެރިވާން ފަށައިފި އެވެ.

ގދ. އަތޮޅާއި ފުވައްމުލަކާ ދެމެދު އޮންނަ އިކްއެޓޯރިއަލް ޗެނަލް ސަރަހައްދުން ބޭރުގެ މަސްބޯޓުތަކެއް ފެނިފައިވާކަމުގެ ރިޕޯޓުތަކެއް ލިބުމާ ގުޅިގެން، ސިފައިން އެ ސަރަހައްދު ބަލައި ފާސްކުރުމުގެ މަސައްކަތް ވަނީ ފަށާފަ އެވެ. މި ބޯޓުތައް ހަރަކާތްތެރިވަމުންދަނީ ފިޔޯރީގެ ހުޅަނގުން ގާތްގަނޑަކަށް 9 ނޯޓިކަލް މޭލު ބޭރުން ކަމަށް އެމްއެންޑީއެފުން ބުންޏެވެ. އިރުން ހުޅަނގަށް ދަތުރުކުރަމުންދާ މި ބޯޓުތަކާ ގުޅޭ އިތުރު ތަފްސީލުތައް އެ އިދާރާއިން އަދި ހާމަކޮށްފައި ނުވެ އެވެ.

މި މައްސަލަ ފެންމަތިވުމާއެކު، އެމްއެންޑީއެފް ސަދަން އޭރިއާ ކޮމާންޑުން ވަނީ އެ ސަރަހައްދުގައި ހަރަކާތްތެރިވެ، ބޯޓުތައް ދެނެގަތުމުގެ މަސައްކަތް ފަށާފަ އެވެ. ކަނޑުގެ ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމަށް ސިފައިން ދަނީ ފިޔަވަޅުތައް އަޅަމުންނެވެ. މިފަދަ ހާލަތްތަކުގައި އެމްއެންޑީއެފުން އާންމުކޮށް ގެންގުޅޭ އުސޫލުތަކުގެ ދަށުން، އުޅަނދުތައް މޮނީޓާ ކުރުމާއި ބޭނުންވާ ހާލަތްތަކުގައި އެ އުޅަނދުތައް ހުއްޓުވުމުގެ ގާބިލުކަން ސިފައިންގެ ކިބައިގައި ހުރެ އެވެ.

ރާއްޖޭގެ ކަނޑުގެ ސަރަހައްދަށް ހުއްދަނެތި ވަންނަ ބޭރުގެ އުޅަނދުތަކާމެދު އަމަލުކުރުމަށް ކަނޑައެޅިފައިވާ އުސޫލުތަކުގެ ދަށުން، އެފަދަ އުޅަނދުތައް ހުއްޓުވައި ބަލައި ފާސްކުރުމަކީ އެމްއެންޑީއެފްގެ މަސްއޫލިއްޔަތެކެވެ. މިގޮތަށް ހިފަހައްޓާ އުޅަނދުތައް ގާނޫނީ އިޖުރާއަތުތަކުގެ ތެރެއިން ފުލުހުންނާ ހަވާލުކޮށް، ގާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދެ އެވެ. މި މައްސަލައިގައި ވެސް ގާނޫނާ ހިލާފު ކަމެއް ހިނގާފައިވޭތޯ ސިފައިންނާއި ފުލުހުން ގުޅިގެން ބަލަމުންދާނެ އެވެ.