އީރާނުން ހަނގުރާމަ ހުއްޓާލުމަށް ހަތް ދުވަހުގެ ޕްލޭންއެއް ހުށަހަޅާފައިވަނިކޮށް، އެމެރިކާގެ ރައީސް ޑޮނަލްޑް ޓްރަމްޕާއި ޗައިނާގެ ރައީސް ޝީ ޖިންޕިންގް މެދުއިރުމަތީގެ ހަނގުރާމައާ ގުޅޭގޮތުން ސެޕްޓެމްބަރު 25 ގައި ބޭއްވި ބައްދަލުވުމުގައި މަޝްވަރާކުރައްވައިފި އެވެ. ހޮރްމުޒް ކަނޑުއޮޅި އަލުން ހުޅުވާލުމަށާއި ސަރަހައްދީ ހަނގުރާމަ ހުއްޓާލުމަށް އީރާނުން އެކުލަވާލި ހަތް ދުވަހުގެ މި ޕްލޭން ގަބޫލުކުރުމަށް އީރާނުން ދަނީ ވޮޝިންޓަނަށް ބާރުއަޅަމުންނެވެ.

މެދުއިރުމަތީގެ ތެލަށް ބޮޑަށް ބަރޯސާވެފައިވާ ޗައިނާއަށް ވަނީ، ހޮރްމުޒް ކަނޑުއޮޅިން ދަތުރުކުރާ އުޅަނދުފަހަރަށް އީރާނުން ދެމުންދާ އިންޒާރުތަކާއި، ރަތްކަނޑުގެ މުހިންމު ސަރަހައްދުތަކުގައި އީރާނަށް ތާއީދުކުރާ ހޫތީން ހިންގާ ހަރަކާތްތަކުގެ ސަބަބުން ތެޔޮ ސަޕްލައި ކުރުމުގައި ދަތިތަކަކާ ކުރިމަތިލާންޖެހިފަ އެވެ.

ޗައިނާގެ ދައުލަތުގެ މީޑިއާ، ޝިންހުއާއިން ރިޕޯޓްކޮށްފައިވާ ގޮތުގައި، ޖޫން މަހު އެކުލަވާލި އެއްބަސްވުމަށް އެމެރިކާއާއި އީރާނުން ރުޖޫއަވުމަށް ރައީސް ޝީ ވަނީ ބާރުއަޅުއްވާފަ އެވެ. އަދި އެ އެއްބަސްވުމުގެ ދަށުން ދާއިމީ ހައްލަކަށް ވާސިލްވުމަށް މަޝްވަރާތައް ކުރިއަށް ގެންދިއުމަށް އެމަނިކުފާނު އެދިވަޑައިގެންނެވި އެވެ. ހަމައެއާއެކު، އީރާނަށް އެއްވެސް އެހީތެރިކަމެއް ނުދިނުމަށް ރައީސް ޓްރަމްޕް ވަނީ ރައީސް ޝީއަށް އިންޒާރު ދެއްވާފަ އެވެ. އަދި ޗައިނާއިން އެފަދަ އެހީތެރިކަމެއް ނުދޭނެކަމުގެ ޔަގީންކަން ދީފައިވާކަމަށް އެމެރިކާއިން ޗައިނާއަށް ކަނޑައަޅާފައި ހުންނަވާ ސަފީރު ވިދާޅުވި އެވެ.

ހަތް މަސް ދުވަސްވެފައިވާ މި ހަނގުރާމައިގެ ސަބަބުން ދުނިޔޭގެ އެންމެ މުހިންމު ކަނޑުގެ ދަތުރުފަތުރުގެ މަގުތަކުން ތެޔޮ އުފުލުމަށް ހުރަސް އެޅި، ސަރަހައްދީ އަދި ދުނިޔޭގެ ބޮޑެތި ބާރުތައް މި މައްސަލައިގެ ތެރެއަށް ވަނީ ވަދެފަ އެވެ. ރައީސް ޝީގެ މި ދަތުރުފުޅު ދިމާވީ އދ. ގެ އާންމު މަޖިލީހުގެ ބައްދަލުވުންތަކާ އެވެ. މި ބައްދަލުވުންތަކުގެ ތެރެއިން ގަތަރު މެދުވެރިކޮށް އެމެރިކާއާއި އީރާނާ ދެމެދު ވަނީ ޑިޕްލޮމެޓިކް މުއާމަލާތްތަކެއް ހިނގާފަ އެވެ.

ޖޫން މަހުގެ އެއްބަސްވުމަށް ރުޖޫއަވުމަށް ޗައިނާއިން ކުރާ މަސައްކަތަށް އީރާނުން މަރުހަބާ ކިޔާފައިވާއިރު، ސެޕްޓެމްބަރު 24 ގައި އީރާނުން އިއުލާންކުރި ސުލްހައިގެ ހުށަހެޅުމަށް އެ ޤައުމުން ދަނީ ބާރުއަޅަމުންނެވެ. އީރާނުގެ ހާރިޖީ ވަޒީރު އައްބާސް އަރާގްޗީ ވިދާޅުވި ގޮތުގައި، ގަތަރު މެދުވެރިކޮށް އެމެރިކާއަށް ހުށަހަޅާފައިވާ ހަތް ދުވަހުގެ ޕްލޭންގެ ދަށުން، ބޭނުންވާ ޝަރުތުތައް ފުރިހަމަވެއްޖެނަމަ ހަތް ދުވަސް ތެރޭގައި ހޮރްމުޒް ކަނޑުއޮޅި ހުޅުވާލައި، އާންމު ދަތުރުފަތުރުތައް ފެށޭނެ އެވެ.

މި ހުށަހަޅުމަށް އެމެރިކާއިން އަދި ރަސްމީކޮށް ޖަވާބެއް ދީފައި ނުވިނަމަވެސް، މެދުވެރިން މެދުވެރިކޮށް ކުރިއަށްދާ މަޝްވަރާތައް އުންމީދީ ކަމަށާއި، ނިއުކްލިއާ މައްސަލައާ ގުޅޭގޮތުން ވެސް ވާހަކަދެކެވެމުންދާ ކަމަށް އެމެރިކާގެ އިސް އޮފިޝަލަކު ވިދާޅުވި އެވެ. އީރާނުގެ ހުށަހެޅުމުގައިވާ ގޮތުން، އެމެރިކާއިން މިކަމަށް އެއްބަސްވެއްޖެނަމަ، ލުބުނާނު ހިމެނޭހެން ހުރިހާ ފަރާތްތަކެއްގެ މެދުގައި ހަނގުރާމަ ހުއްޓާލައި، ހޮރްމުޒް ކަނޑުއޮޅި ހުޅުވާލެވޭނެ އެވެ. މީގެ ބަދަލެއްގެ ގޮތުން، އީރާނުގެ ބަނދަރުތަކަށް އަޅާފައިވާ ހުރަސްތައް ނައްތާލުމަށާއި، ހިފަހައްޓާފައިވާ ފައިސާ ދޫކޮށްލުމަށާއި، ތެލުގެ ދަތިކުރުމުގެ ފިޔަވަޅުތަކުން އިސްތިސްނާ ދިނުމަށް އީރާނުން ޝަރުތުކުރެ އެވެ.

ނަމަވެސް، އީރާނުގެ އިސް އޮފިޝަލަކު މައުލޫމާތު ދެއްވި ގޮތުގައި، ސުލްހައިގެ އެއްބަސްވުން ގަބޫލުކުރި ނަމަވެސް ނިއުކްލިއާ ޕްރޮގްރާމާ ގުޅޭގޮތުން އެއްވެސް ދުލެއް އީރާނުން ނުދޭނެ އެވެ. ޔުރޭނިއަމް މުއްސަނދިކުރުމާއި، މުއްސަނދިކޮށްފައިވާ ޔުރޭނިއަމް ގައުމުން ބޭރަށް ފޮނުވާލުމާ ގުޅޭގޮތުން އެއްވެސް އުސޫލެއް ބަދަލުނުކުރާނެ ކަމަށް އެ އޮފިޝަލް ވިދާޅުވި އެވެ. ރައީސް ޓްރަމްޕް ވަނީ އީރާނަށް ނިއުކްލިއާ ހަތިޔާރު އުފެއްދުމުގެ ފުރުސަތު ދުވަހަކުވެސް ނުދެއްވާނެ ކަމަށް ވިދާޅުވެފަ އެވެ.

ފެބްރުއަރީ 28 ގައި އެމެރިކާއާއި އިޒްރޭލުން ދޭން ފެށި ހަމަލާތަކާއެކު ފެށުނު މި ހަނގުރާމަ ހުއްޓުވުމަށް ކުރިން ކުރި މަސައްކަތްތައް ނާކާމިޔާބުވެފައިވާ ދަނޑިވަޅެއްގައި، އީރާނުގެ މި ހުށަހެޅުމަކީ ޑިޕްލޮމެޓިކް ހައްލެއް ހޯދުމަށް ކުރެވޭ އާ މަސައްކަތެކެވެ. މި ހަނގުރާމައިގައި މިހާތަނަށް އެތައް ހާސް ބަޔަކު މަރުވެ، އީރާނުގެ އަސްކަރީ ބާރާއި އިގްތިސާދަށް ބޮޑެތި ގެއްލުންތަކެއް ވަނީ ލިބިފަ އެވެ. އީރާނާއި އެ ގައުމަށް ތާއީދުކުރާ ޖަމާއަތްތަކުން ދަނީ ގަލްފު ސަރަހައްދުގެ ގައުމުތަކަށާއި، ސައުދީ އަރަބިއްޔާގެ މަސްލަހަތުތަކަށް އަމާޒުކޮށް ހަމަލާތައް ދެމުންނެވެ. މީގެ އިތުރުން އިރާގާއި ލުބުނާނުގައި ހަރަކާތްތެރިވާ އީރާނަށް ތާއީދުކުރާ ޖަމާއަތްތަކުން ވެސް ދަނީ މި ހަނގުރާމައިގައި ބައިވެރިވަމުންނެވެ.