ބޮލީވުޑްގެ މަޝްހޫރު ޑައިރެކްޓަރު އަދި ކޮރިއޯގްރާފަރު ފަރާ ޚާންގެ ފުރަތަމަ ޑައިރެކްޝަން ކަމަށްވާ "މޭ ހޫން ނާ" (2004) ރިލީޒްކުރިތާ 20 އަހަރަށްވުރެ ގިނަ ދުވަސް ވެފައިވާއިރު، މި ފިލްމުގެ ސީކުއަލްއެއް އުފެއްދުމާ ގުޅޭގޮތުން އަނެއްކާވެސް ވާހަކަތައް ދެކެވެން ފަށައިފި އެވެ.

އެގޮތުން މިފަހަރު މި ވާހަކަތައް ފެށިފައިވަނީ އެކްޓަރު އަރުޖުން ކަޕޫރު އޭނާގެ ސޯޝަލް މީޑިއާގައި ކުރި ޕޯސްޓަކާ ގުޅިގެންނެވެ.

އަރުޖުން ކަޕޫރު ވަނީ އޭނާ ހޮޓަލެއްގައި ހުއްޓައި ޓީވީން "މޭ ހޫން ނާ" ފެނުމުން، އެ ފިލްމުގެ ވީޑިއޯއެއް އިންސްޓަގްރާމް ސްޓޯރީގައި ހިއްސާކޮށްފަ އެވެ.

އެ ޕޯސްޓުގައި އަރުޖުން ލިޔެފައިވަނީ، "މިއީ އަހަރެންގެ އެންމެ ކަމުދާ ފިލްމު! މި ޑިޖިޓަލް ޒަމާނުގައި ޓީވީން ކުއްލިއަކަށް މި ފިލްމު ފެނުމުން ލިބުނު އުފާ ބަޔާންކުރަންވެސް ނޭނގެ. އަހަރެމެންނަށް މި ފިލްމުގެ ސީކުއަލްއެއް ވަރަށް އަވަހަށް ބޭނުން!" މިހެން ބުނެ، ފަރާ ޓެގް ކޮށްފައިވެ އެވެ.

އަރުޖުންގެ މި ޕޯސްޓަށް ޖަވާބު ދެމުން ފަރާ ވަނީ އެ ސްޓޯރީ ރީޕޯސްޓްކޮށް، "ހަހަހަ... އަގަރު ކިސީ ޗީޒް ކޯ ދިލް ސޭ މާންގޯ... އަރުޖުން ކަޕޫރު ލަވް ޔޫ" އެއްޗެއް ލިޔެފައެވެ. މިއީ ފަރާ ޑައިރެކްޓްކުރި މަޝްހޫރު ފިލްމު "އޯމް ޝާންތީ އޯމް" ގައި ޝާހްރުކް ޚާން ބުނާ މަޝްހޫރު ޑަޔަލޮގަކުން ނަގާފައިވާ އިބާރާތެކެވެ

އެ އިބާރާތުގެ މާނައަކީ ކަމަކަށް ނުވަތަ އެއްޗަކަށް ހިތުގެ އަޑިން އެދިއްޖެނަމަ، އެކަމެއް ހާސިލު ކޮށްދިނުމަށް މުޅި ކައިނާތު މަސައްކަތް ކުރާނެ އެވެ.

ފަރާގެ މި ޖަވާބާއެކު ސަޕޯޓަރުންގެ މެދުގައި "މޭ ހޫން ނާ 2" އުފައްދާނެ ކަމުގެ އުންމީދުތައް އާވެގެން ދިޔަ އެވެ. ނަމަވެސް، ފަހުން "ޓައިމްސް އޮފް އިންޑިއާ" އަށް ދިން އިންޓަވިއުއެއްގައި ފަރާ ވަނީ މި ވާހަކަތައް ދޮގުކޮށް، "އެފަދަ ވާހަކަތައް ގަބޫލު ނުކުރުމަށް" އެދިފަ އެވެ.

މީގެ ކުރިން މިއަހަރުގެ ކުރީކޮޅު ފަރާ ބުނެފައިވަނީ، އޭނާގެ ދަރިން ކޮލެޖަށް ދިއުމުން އަލުން ފިލްމު ޑައިރެކްޓް ކުރަން ފަށާނެ ކަމަށާއި، އޭނާ އަލުން ފިލްމެއް ހަދައިފިނަމަ އެ ފިލްމެއް ހަދާނީ ޝާހްރުކް ޚާންއާއެކު ކަމަށެވެ.

2004 ވަނަ އަހަރު ރިލީޒްކުރި "މޭ ހޫން ނާ" އަކީ ޝާހްރުކް ޚާން، ސުޝްމިތާ ސެން، ސުނިލް ޝެޓީ، އަމްރިތާ ރާއޯ އަދި ޒައިދު ޚާން ފަދަ ތަރިން ފެނިގެންދިޔަ، ބޮކްސް އޮފީހުގައި ބޮޑު ކާމިޔާބީއެއް ހޯދި ފިލްމެކެވެ.