އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތައް ދިގުލައިގެން ގޮސްފައިވާ މި ދަނޑިވަޅުގައި، ހޮރްމުޒް ކަނޑުއޮޅިއާއި ގަލްފު ސަރަހައްދުގެ މަސްރަހު ހަމަޖެއްސުމަށް އެހީތެރިވުމަށް މޮސްކޯ ތައްޔާރަށް އޮތް ކަމަށް ރަޝިޔާގެ ހާރިޖީ ވަޒީރު ސަރްގޭ ލަވްރޯވް އދ. ގައި ހޮނިހިރު ދުވަހު ވިދާޅުވެއްޖެ އެވެ.

އދ. ގެ އާންމު މަޖިލީހުގައި ވާހަކަދައްކަވަމުން ލަވްރޯވް ވިދާޅުވީ، ގަލްފުގެ ގައުމުތަކާއި، އަރަބި ގައުމުތަކުގެ އިތުރުން އީރާނާ ދެމެދު އިތުބާރު އުފެދެންޖެހޭ ކަމަށާއި، އެ ސަރަހައްދަށް ދާއިމީ ހަމަޖެހުމެއް ގެނައުމަށް ވަރުގަދަ ނިޒާމެއް ބޭނުންވާ ކަމަށެވެ.

"ޒިންމާދާރު އެހެން ގައުމުތަކާ ގުޅިގެން، މުހިންމު މި ސަރަހައްދުގެ މަސްރަހު ހަމަޖެއްސުމަށްޓަކައި ބިނާކުރަނިވި ގޮތެއްގައި އެހީތެރިކަން ފޯރުކޮށްދިނުމަށް ރަޝިޔާ އޮތީ ތައްޔާރަށް،" ލަވްރޯވް ވިދާޅުވި އެވެ.

ރަޝިޔާ - ޔޫކްރެއިން މަޝްވަރާތައް

މީގެ އިތުރުން، މޮސްކޯ އާއި ކީވްއާ ދެމެދު ހިނގަމުންދާ ހަނގުރާމަ ހުއްޓުމަކަށް ގެނައުމަށް ކުރެވޭ މަޝްވަރާތަކަށް ހުރަސްއެޅުމަށް ވިލާތުގެ ގައުމުތަކުން ކުރެވެން ހުރި ހުރިހާ މަސައްކަތެއް ކުރަމުންދާ ކަމަށް ލަވްރޯވް ހޮނިހިރު ދުވަހު ތުހުމަތު ކުރެއްވި އެވެ.

އެމެރިކާގެ ސަރުކާރަށް އިޝާރާތް ކުރައްވައި އޭނާ ވިދާޅުވީ، (ޑޮނަލްޑް) ޓްރަމްޕްގެ ސަރުކާރުން ޝައުގުވެރިކަން ފާޅުކޮށްފައިވާ ސުލްހައިގެ މަޝްވަރާތަކަށް ހުރަސްއެޅުމަށް ވިލާތުން ދަނީ ކުރެވެން ހުރި ހުރިހާ މަސައްކަތެއް ކުރަމުން ކަމަށެވެ.

ހޮރްމޫޒް ކަނޑުއޮޅި އަލުން ހުޅުވާލުމަށާއި ހަނގުރާމަ ހުއްޓާލުމަށް އީރާނުން ހުށަހެޅި ހުށަހެޅުމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ހޮނިހިރު ދުވަހު އިންކާރު ކުރައްވާފަ އެވެ. ނަމަވެސް އީރާނުން އަދިވެސް ބޭނުންވަނީ ހަނގުރާމަ ހުއްޓާލުމަށް މަޝްވަރާ ކުރުމަށެވެ.