ކުރީގެ ރައީސް އަބްދުﷲ ޔާމީންގެ މައްޗަށް ދައުވާ އުފުލައިގެން ކޯޓު މަރުހަލާގައި އޮތް މައްސަލަތަކުގެ އަޑުއެހުމެއް ނުބޭއްވޭތާ އަހަރެއްހާ ދުވަސް ފަހުން، ވ. އާރަށު މައްސަލައިގެ ޝަރީއަތުގެ އަޑުއެހުމަކަށް މިއަދު އެ މަނިކުފާނު ކްރިމިނަލް ކޯޓަށް ހާޒިރުކޮށްފި އެވެ.

މިއަދުގެ އަޑުއެހުމަކީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީ ލޯންޑާ ކުރެއްވި ކަމަށް ތުހުމަތުކުރާ މައްސަލައިގައި، ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭ ގޮތުން ވާހަކަދެއްކުމަށް ތާވަލުކުރި އަޑުއެހުމެކެވެ. މި މައްސަލައިގައި ޔާމީންގެ އިތުރުން ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެންބަރު ޔޫސުފް ނައީމްގެ މައްޗަށްވެސް ވަނީ ދައުވާކޮށްފަ އެވެ.

ވ. އާރަށު މައްސަލައިގެ ޝަރީއަތް ކްރިމިނަލް ކޯޓުގައި މަޑުޖެހުނީ، އެ މައްސަލަ އަލުން ބަލާއިރު ދައުލަތުން ހުށަހެޅި އާ ހެކިތަކެއް ބަލައިނުގަތުމަށް ހައި ކޯޓުން ކުރި ހުކުމުގެ ބައި ދައުލަތުން ސުޕްރީމް ކޯޓުގައި އިސްތިއުނާފުކުރުމާ ގުޅިގެންނެވެ. ސުޕްރީމް ކޯޓުން މިދިޔަ ޖުލައި މަހު ނިންމާފައިވަނީ ހައި ކޯޓުގެ ނިންމުމަށް ތާއީދުކޮށް އެ ހެކިތައް ބަލައިނުގަނެވޭނެ ކަމަށެވެ.

ދައުލަތުން ހުށަހަޅައިގެން އުނިކުރި ހެކިތަކުގެ ތެރޭގައި ޔާމީންގެ ދިފާއީ ހެކިވެރިއެއް ކަމަށްވާ ޔޫތު މިނިސްޓަރުގެ އެޑްވައިޒަރު އަހުމަދު ނަރީޝް ކުރިން ވަޒީފާ އަދާކުރެއްވި ސިފައިންގެ ހާޒިރީއާއި، އިކޮނޮމިކް ޔޫތު ކައުންސިލްގެ ޖަލްސާތަކުގެ ޔައުމިއްޔާ ހިމެނެއެވެ. ޑޮލަރު މާރުކޮށްގެން ޔޫސުފް ނައީމަށް ލިބެންޖެހޭ ފައިސާ ހަވާލުކުރި ކަމަށް ނަރީޝް ދެއްވި ހެކިބަހަކީ ދޮގެއް ކަމަށް ދަށު ކޯޓުން ކުރިން ނިންމި ނަމަވެސް، ހައި ކޯޓުން ވަނީ އެ ހުކުމް ބާތިލުކޮށްފަ އެވެ.

ޔާމީންގެ މައްޗަށް ދައުލަތުން ތުހުމަތުކުރަނީ ވ. އާރަށް ކުއްޔަށް ދޫކުރުމުގެ މުގާބިލުގައި އެ މަނިކުފާނުގެ އެކައުންޓަށް އެކި ފަހަރު މަތިން އެއް މިލިއަން ޑޮލަރު ރިޝްވަތުގެ ގޮތުގައި ނަންގަވާފައިވާ ކަމަށެވެ. މީގެ އިތުރުން އެމްއެމްޕީއާރުސީ މެދުވެރިކޮށް ރ. ފުއްގިރި ކުއްޔަށް ދިނުމުގައި ރިޝްވަތު ނެންގެވުމާއި މަނީ ލޯންޑަރ ކުރެއްވި ކަމަށް ތުހުމަތުކުރާ މައްސަލައިގެ ދައުވާވެސް ވަނީ އުފުލާފަ އެވެ.

ރ. ފުއްގިރި މައްސަލައިގައި ހިމެނޭ ސަން ސިޔާމްގެ ދެ ކުންފުންޏަކަށް ކުރި ދައުވާ ސާބިތުނުވާ ކަމަށް ކްރިމިނަލް ކޯޓުން ހުކުމްކުރުމުން ދައުލަތުން އެ މައްސަލަ އިސްތިއުނާފެއް ނުކުރެ އެވެ. އަދި އެ މައްސަލައިގައި ދައުވާލިބޭ އަހުމަދު ރިޒާގެ މައްޗަށް ކުރި ދައުވާވެސް ދައުލަތުން ވަނީ ދާއިމީކޮށް އަނބުރާ ގެންގޮސްފަ އެވެ.

ދައުލަތުން ކުރި ދައުވާތަކަށް ޔާމީން ވަނީ އިންކާރުކުރައްވާފަ އެވެ.