ރާއްޖޭގައި އެމެރިކާ ޑޮލަރުގެ ދަތިކަމަށް ކުޑަވެސް ހައްލެއް ނުލިބި އަގު އުފުލެމުންދާތީ، އަމިއްލަ ވިޔަފާރިތަކަށް މުދާ އެތެރެކުރުމުގައި ބޮޑެތި ގޮންޖެހުންތަކެއް ކުރިމަތިވަމުންދާ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ ޑޮލަރު ނުލިބުމުގެ ސަބަބުން ޓީޓީ ހެދުމަށް ދަތިވެ، ވިޔަފާރިވެރިންނަށް މުދާ އިމްޕޯޓު ނުކުރެވިފައިވާ ކަމަށެވެ. މިއީ ގައުމުގެ އިގްތިސާދީ ހާލަތާ ގުޅޭގޮތުން އެމަނިކުފާނު ފާޅުކުރެއްވި ކަންބޮޑުވުމެކެވެ.

ރިސޯޓުތަކަށް ލިބޭ ބޭރު ފައިސާގެ އާމްދަނީގެ 40 ޕަސެންޓު ބޭންކުތަކަށް މާރުކުރަން މަޖުބޫރުކުރުމާއި، ބޭރުގެ ޓުއާ އޮޕަރޭޓަރުންގެ އަތުން ޓެކްސް ނަގަން ނިންމުމުން 160 މިލިއަން ޑޮލަރު ލިބޭނެ ކަމަށް ސަރުކާރުން އަންދާޒާކުރި ކަމަށް ނަޝީދު ވިދާޅުވި އެވެ. ނަމަވެސް ސަރުކާރުން އަންދާޒާކުރާ ކަންކަން ހާސިލުނުވާ ކަމަށް އެމަނިކުފާނު ފާހަގަކުރެއްވި އެވެ.

ސަރުކާރުގެ އަންދާޒާތައް ހާސިލުނުވުމުގެ ސަބަބުން ކުރިމަތިވާ ހުރިހާ ދައްޗަކާއި އުނދަގުލެއް ތަހައްމަލުކުރަން ޖެހެނީ އާންމު ރައްޔިތުން ކަމަށް ނަޝީދު ވިދާޅުވި އެވެ.

ޑޮލަރުގެ މައްސަލައަށް ހައްލެއް ހޯދުމުގެގޮތުން ސަރުކާރުން ވަނީ ގަވާއިދުތައް ތަންފީޒުކުރުން ހަރުކަށިކޮށް، ރިސޯޓުތަކާއި 25 މިލިއަން ޑޮލަރަށް ވުރެ ބޮޑު އާމްދަނީއެއް ލިބޭ ވިޔަފާރިތަކުން މާރުކުރަންޖެހޭ މިންވަރު އާމްދަނީގެ 40 ޕަސެންޓަށް އުފުލާފަ އެވެ.