ކުޑަކުދިން ފޯނު، ޓީވީ އަދި ޓެބްލެޓް ފަދަ ވަސީލަތްތައް ބޭނުން ކުރުމުގައި ގިނަ ވަގުތު ހޭދަ ކުރުމަކީ އުނގެނުމަށާއި، ބަސްމޮށުންތެރިކަމަށް، އަދި ނަފްސާނީ އުފާވެރިކަމަށް ނޭދެވޭ އަސަރުތަކެއް ކުރާ ކަމެއްކަން ބައިނަލްއަގުވާމީ އާ ދިރާސާއަކުން ދައްކައިފި އެވެ.

މެޑިކަލް ޖާނަލް "ޖާމާ ޕީޑިއަޓްރިކްސް"ގައި ޝާއިއު ކޮށްފައިވާ އަދި ކެނެޑާގެ ތަޖުރިބާކާރުން ތަކެއް އިސްވެ ކުރިއަށް ގެންދިޔަ މި ދިރާސާގައި، ދުނިޔޭގެ އެކި ކަންކޮޅުތަކުން 2.8 މިލިއަނަށްވުރެ ގިނަ ކުދިންގެ މައުލޫމާތު އަލުން ދިރާސާކޮށް ހޯދުންތައް ވަނީ އެއްކޮށްފަ އެވެ.

ދިރާސާގެ މުހިއްމު ހޯދުންތައް

  • ތައުލީމީ އަދި ބަހުގެ ގާބިލުކަން ދަށްވުން: ސްކްރީން ބަލާ މިންވަރު އިތުރުވާ ވަރަކަށް ކުދިންގެ ކިޔެވުމުގެ ފެންވަރު ދަށްވުމާއި، ވާހަކަ ދެއްކުމާއި ބަސްމޮށުންތެރިކަމުގެ ހުނަރުތައް ތަރައްގީވުން ލަސްވާކަން ވަނީ ފާހަގަ ކުރެވިފަ އެވެ.
  • އުޅުމަށް އަންނަ ބަދަލުތަކާއި ނަފްސާނީ މައްސަލަތައް: ގިނަ ވަގުތު ސްކްރީން ބޭނުންކުރާ ކުދިންގެ ކިބައިން ރުޅި ގަދަވުމާއި، ސަމާލުކަން ދޭން އުނދަގޫވުމުގެ އިތުރުން އެކަނިވެރިވުމާއި ކަންބޮޑުވުން ފަދަ ނަފްސާނީ މައްސަލަތައް ފެނުމުގެ ފުރުސަތު ބޮޑެވެ.
  • ބަދަލު ވަމުންދާ ޓެކްނޮލޮޖީ: ދިރާސާގައި އިސްކޮށް އުޅުއްވި ޑރ. ޝެރީ މެޑިގަން ފާހަގަ ކުރެއްވި ގޮތުގައި، ކުރީގެ ދިރާސާތަކާ އަޅާބަލާއިރު މިހާރުގެ ދިރާސާތަކުން ސްކްރީން ތަކުގެ ނޭދެވޭ އަސަރު މާ ބޮޑަށް ފެންނަނީ، ޓެކްނޮލޮޖީ ބޭނުންކުރާ ގޮތް ބަދަލު ވުމުންނެވެ. މީގެ 20 އަހަރު ކުރިން ކުއްޖަކު ޓީވީން ޕްރޯގްރާމެއް ބެލި ނަމަވެސް، މިއަދު އަތްމަތީ ފޯނާއި އިންޓަރެކްޓިވް ވަސީލަތްތަކުގެ ސަބަބުން ކުދިން ސްކްރީނަށް ދެވިހިފާ މިންވަރު ވަނީ އިންތިހާއަށް އިތުރުވެފަ އެވެ.

ބެލެނިވެރިންނަށް ތަޖުރިބާކާރުންގެ އިރުޝާދު

މި ދިރާސާގެ ހޯދުންތަކާ ގުޅިގެން ކުދިންގެ ސިއްހަތާ ބެހޭ ތަޖުރިބާކާރުން އިރުޝާދު ދެއްވަނީ، ކުދިން ސްކްރީން ބޭނުންކުރާ މިންވަރު ކޮންޓްރޯލް ކުރުމަށް ގޭތެރޭގައި ހާއްސަ ގަވާއިދުތަކެއް އެކުލަވާލުމަށެވެ.

  1. ޑިވައިސް-ފްރީ ވަގުތު ކަނޑައެޅުން: ކާ ވަގުތުތަކާއި ނިދަން ތައްޔާރުވާ ވަގުތުތަކުގައި ފޯނާއި ޓީވީ ފަދަ ތަކެތި ބޭނުން ނުކުރުން.
  2. އާއިލީ ގުޅުން ބަދަހި ކުރުން: ސްކްރީންތަކާ ދުރުވެ، އާއިލާގެ މެންބަރުން އެކުގައި ވަގުތު ހޭދަކޮށް، ވާހަކައްކައި ހެދުމަށް ސަމާލުކަން ދިނުން.
  3. ސްކްރީން ބޭނުންކުރާ ގޮތް ބެލުން: ކުއްޖާ ބަލަނީ ތައުލީމީ އަދި ފައިދާހުރި އެއްޗެއްތޯ ބަލައި، އިޖުތިމާއީ އަދި ޖިސްމާނީ ހަރަކާތްތަކުގައި ބައިވެރިވުމަށް ބާރު އެޅުން.

ތަޖުރިބާކާރުން ފާހަގަކުރާ ގޮތުގައި، ސްކްރީން ބޭނުން ކުރުން އެކީ ހުއްޓުވުމުގެ ބަދަލުގައި، މުހިއްމީ ކުދިންގެ ދިރިއުޅުމުގައި ޓެކްނޮލޮޖީއާއި، ޖިސްމާނީ ކުޅިވަރުތަކާއި، އަދި އިޖުތިމާއީ ގުޅުންތަކުގެ މެދުގައި ހަމަހަމަކަން ގާއިމު ކުރުމެވެ.