ރަސްމާލެއިން ހިއްކާ ބިމުގެ ތެރެއިން ބޮޑު ބައެއް އީގަލް ހިލްސްއަށް ދިނުމަށް ވެފައިވާ ސިއްރު އެއްބަސްވުމަށް އާނއެކޭ ބުނެގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ އެމްޑީޕީގެ ކޮންގްރެސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ސޯލިހު ވިދާޅުވީ ފޮރިން އިންވެސްޓްމަންޓާއި ރެސިޑެންސް ވިސާ ދިނުމާ ދެކޮޅު ނޫން ކަމަށާއި، ނަމަވެސް ސިއްރުން ހަދާ އެއްބަސްވުންތަކަށް އެމްޑީޕީގެ ސަރުކާރެއްގައި ޖާގަ ދީގެން ނުވާނެ ކަމަށެވެ.

އެމްޑީޕީގެ ކޮންގްރެސް ހުޅުވުމުގެ ރަސްމިއްޔާތުގައި ސޯލިހު ވަނީ، ރަސްމާލެ މަޝްރޫއާ ގުޅޭގޮތުން ސަރުކާރާއި އީގަލް ހިލްސްއިން މައުލޫމާތު ހާމަކުރުމަށް ގޮވާލައްވާފަ އެވެ.

ރައްޔިތުންގެ ފައިސާއިން ގާތްގަނޑަކަށް 700 މިލިއަން ޑޮލަރު ހަރަދުކޮށްގެން ފުށިދިއްގަރު ފަޅު ހިއްކާއިރު، އެތަނުން 500 ހެކްޓަރުގެ ބިން ބޭރުގެ ކުންފުންޏަކަށް ދިނުމުން ރައްޔިތުންނަށާއި ސަރުކާރަށް ލިބޭ ފައިދާއެއް ސާފުވާންޖެހޭ ކަމަށް ސޯލިހު ވިދާޅުވި އެވެ. އެމަނިކުފާނު ފާހަގަކުރެއްވި ގޮތުގައި އެއީ މުޅި މާލޭގެ ދެ މާލެއަށްވުރެ ބޮޑު ބިމެކެވެ.

ރަސްމާލެއިން ބިން ދިނުމަށް އީގަލް ހިލްސްއާއެކު ސިއްރު އެއްބަސްވުމެއްގައި ސޮއިކޮށްފައިވަނީ މިދިޔަ ހަފުތާގެ ހޯމަ ދުވަހު އެވެ. އެ އެއްބަސްވުމުގެ ތަފްސީލު ހާމަނުކޮށް ސަރުކާރުން ބުނެފައިވަނީ އެތަން ދިނީ ނުވަދިހަ ނުވަ އަހަރަށް، ލީސް އެކުއިޒިޝަން ކޮސްޓެއް އަދި ކުއްޔެއްވެސް ނުނަގާ ގޮތަށް ކަމަށެވެ.

ނިމުނު އެމްޑީޕީ ސަރުކާރުގައި ވ. އަތޮޅު ފޮއްތެޔޮ ފަޅު ބޭރުގެ ފަރާތަކަށް ދީގެން ސަރުކާރަށް 43 މިލިއަން ޑޮލަރު ލިބުނުކަން ސޯލިހު ފާހަގަކުރެއްވި އެވެ. އަދި ނ. އަތޮޅުން 24 މިލިއަން ޑޮލަރު އެޑްވާންސް ފައިސާގެ ގޮތުގައި ނަގައި ދިން ފަޅު، މި ސަރުކާރުން ހާއްސަ އިގްތިސާދީ މާހައުލުގެ ތެރެއަށް ލުމުން ޓޫރިޒަމް ގާނޫނުގެ ދަށުން ލިބެން އޮތް ފައިސާ ގެއްލިފައިވާ ކަމަށްވެސް އެމަނިކުފާނު ވިދާޅުވި އެވެ.

އެމްޑީޕީގެ ކޮންގްރެސްގެ ރަސްމީ މަސައްކަތްތައް ހޮނިހިރު ދުވަހު ފެށުމަށް ހަމަޖެހިފައިވާއިރު، މާދަމާ ބޭއްވުމަށް ހަމަޖެހިފައިވަނީ އިންވެސްޓްމަންޓް ފޯރަމެކެވެ.