ދުނިޔޭގެ ބާޒާރުގައި ތެލުގެ އަގުތައް ތިރިކުރުމަށް އިގްތިސާދީ ގޮތުން ކުރިއަރާފައިވާ ގައުމުތަށް ކަމަށްވާ ޖީ7ގެ ގައުމުތަކުން ރޭވުންތެރިކަމާއެކު މަސައްކަތް ކުރުމަށް އެއްބަސްވެއްޖެ އެވެ.

ޖީ7ގެ ގައުމުތަކުގެ އިސްވެރިން ވަނީ ތެޔޮ އުފެއްދުމަށް ފުރުސަތުތައް ފަހިކުރުމުގެ އިތުރުން، އެ ގައުމުތަކުން ރިޒާވްގެ ގޮތުގައި ރައްކާކޮށްފައި ހުރި ތެލުގެ ތެރެއިން 100 މިލިޔަން ފީފާގެ ތެޔޮ ކުރިއަށް އޮތް ހަތަރު މަސް ދުވަހުގެ ތެރޭގައި ދޫކުރުމަށް އެއްބަސްވެފަ އެވެ. އަދި ޖީ7ގެ ގައުމުތަކުގެ މެދުގައި ހަކަތަ އެކްސްޕޯޓު ކުރުމުގެ ދާއިރާއިން ފުރުސަތުތައް ހަނި ނުކުރުމަށް ވަނީ އެއްބަސްވެފަ އެވެ.

100 މިލިޔަން ފީފާގެ ތެޔޮ ބާޒާރަށް ނެރުމަށް ހަމަޖެހިފައި ވަނީ 4 މަސް ދުވަހުގެ މަތިން ކަމަށް ވި ނަމަވެސް ފުރަތަމަ 20 ދުވަހުގެ ތެރޭގައި އޭގެ ތެރެއިން ގިނަ އަދަދެއް ފޯރުކޮށްދޭނެ ކަމަށް އެ ގަމުތަކުން ބުނެ އެވެ. އެ މަސައްކަތް ވިލަރެސް ކުރާނީ ބައިނަލްއަގްވާމީ ހަކަތައާބެހޭ އިދާރާ، އައިއީއޭއިންނެވެ.

ޖީ7ގެ އިސްވެރިން ބައްދަލުކުރައްވާފައި މި ވަނީ އެމެރިކާގައި ތެލުގެ އަގު މަތިވުމާ ގުޅިގެން، އަގުތައް ކޮންޓްރޯލް ކުރުމަށް ޑީސެލް އެކްސްޕޯޓުކުރުން މަނާ ކުރާނެ ކަމުގެ އިންޒާރު، އެ ގައުމުގެ ރައީސް ޑޮނަލްޑް ޓްރަމްޕް ދެއްވާފައި ވަނިކޮށެވެ. ވިލާތުގެ ގައުމުތަކުން ރައްކާކޮށްފައި ހުރި ރިޒާވް ސްޓޮކް ދޫނުކުރާ ނަމަ އެ ގޮތަށް އަމަލުކުރައްވާނެ ކަމަށް ޓްރަމްޕް ވަނީ ވިދާޅުވެފަ އެވެ.

އިނގިރޭސިވިލާތުގައި ޑީސަލްގެ އަގު ވަނީ ރެކޯޑު މިންވަރަކަށް އުފުލިފަ އެވެ. އެ ގައުމުގައި ޑީސަލް ލީޓަރެއްގެ އަގު މި ވަގުތު ހުރީ 2 ޕައުންޑު ނުވަތަ 47 ރުފިޔާއަށެވެ. ނަމަވެސް އިނގިރޭސިވިލާތުގެ ދަތުރުފަތުރާބެހޭ ވަޒީރު ވިދާޅުވަނީ ތެލުގެ ސަޕްލައި ތިޔާގި ކަމަށާއި، ގިނަ ޢަދަދެއްގެ ވަސީލަތްތައް އެ ޤައުމަށް ލިބިގެންވާ ކަމަށެވެ.

ޖީ7ގެ ގައުމުތަކުން ވަނީ ބޭނުން ޖެހިއްޖެ ނަމަ އެ ގައުމުތަކުން އިތުރު ޑީސަލް ބާޒާރަށް ނެރުމާ މެދު ވިސްނާނެ ކަމަށް ވެސް ބުނެފަ އެވެ.