މި ހިނދުގައި ވެސް ދައުލަތް ހިންގުމާ ހަވާލުވެވަޑައިގަތުމަށް ފުރިހަމައަށް ތައްޔާރަށް ހުންނެވި ކަމަށް އިދިކޮޅު އެމްޑީޕީގެ ޗެއާޕާސަން މުޙައްމަދު ނަޝީދު ވިދާޅުވެއްޖެ އެވެ.

ނަޝީދު މިހެން ވިދާޅުވީ އެމްޑީޕީގެ ކޮންގްރެސްގެ ރިޔާސަތުގައި އިންނަވައި، އެ ޕާޓީގެ ގައުމީ މަޖިލީހުގެ މެންބަރު އަހްމަދު ސަލީމް ދެއްކެވި ވާހަކަފުޅަކަށް ރައްދު ދެއްވަމުންނެވެ. އެގޮތުން ނަޝީދު ވިދާޅުވީ، މި ސިކުންތުގައި ވެސް ދައުލަތާ ހަވާލުވުމަށް ތައްޔާރަށް ހުންނެވި ކަމަށެވެ.

މި ބަހުސް ފެށިގެން ދިޔައީ އެމްޑީޕީގެ އަސާސީ ގަވާއިދަށް ގެންނަން ހުށަހެޅި އިސްލާހުތަކާ ގުޅޭގޮތުން ސަލީމް ވާހަކަދައްކަވަމުން، އެ ޕާޓީގެ އިދާރީ އޮނިގަނޑު އަބަދުވެސް އޮންނަންވާނީ ކުއްލިއަކަށް ސަރުކާރާ ހަވާލުވާން ޖެހިއްޖެ ހާލަތެއްގައި ވެސް އެކަން ކުރެވޭ ފަދަ ތަރުތީބަކުން ކަމަށް ވިދާޅުވުމުންނެވެ.

އޮކްޓޯބަރު 3، 2026 - ދިވެހި ރައްޔިތުންގެ ޑިމޮކްރެޓިކް (އެމްޑީޕީ) އިން ކުރިޔަށް ގެންދާ އެ ޕާޓީގެ ފަސްވަނަ ކޮންގްރެސްގައި މަންދޫބުން ބައިވެރިވަނީ. ފޮޓޯ: އެމްޑީޕީ

ސަލީމް ވިދާޅުވީ ޕާޓީގެ އޮނިގަނޑު އެ ވަގުތަކު ދައުލަތް ހިންގުމުގެ ނިޒާމު އޮންނަ ގޮތަށް ބައްޓަން ކުރެވިފައި އޮތުމަކީ، މާދަމާ ވެސް ވެރިކަމާ ހަވާލުވާން ފަސޭހަވާނެ ސަބަބެއް ކަމަށެވެ. އަދި މިހާރު ހިނގަމުންދާ ވެރިކަން ފަދަ ދަނޑިވަޅެއްގައި، ކޮންމެ ވަގުތެއްގައި ވެސް ވެރިކަން ނެގުމަށް ރައްޔިތުން އެދިދާނެ ކަމަށް އޭނާ ފާހަގަކުރެއްވި އެވެ.

މީގެއިތުރުން ސަލީމް ވަނީ، ޕާޓީން ފުރަތަމަ އިންތިޒާމުވެގެން ދައުލަތް ބަދަލުކުރާނީތޯ ނުވަތަ ދައުލަތަށް ބަދަލު ގެނައުމަށްފަހު ޕާޓީ ބަދަލުވާނީތޯ ސުވާލު އުފައްދަވާފަ އެވެ.