ސަތާރަ އަހަރުގެ އަންހެން ކުއްޖަކަށް ބްލެއިކްމެއިލްކުރާ މައްސަލައެއް ފުލުހުން ތަހުގީގު ކުރަން ފަށައިފި އެވެ.

ފުލުހުން ބުނީ 17 އަހަރުގެ އަންހެން ކުއްޖަކަށް ބްލެކްމެއިލްކޮށް ބިރުދައްކާ މައްސަލައެއް 2020 ވަނަ އަހަރުގެ ސެޕްޓެމްބަރު މަހުގެ ދެ ވަނަ ދުވަހު ހުށައަޅާފައިވާ ކަމަށެވެ. އަދި މި މައްސަލައިގެ ތަހުގީގުގައި ފޮރެންސިކް ހެއްކާއި ގަރީނާ ހޯދިފައިވާކަމަށާއި، މި މައްސަލަ ޕްރޮސެކިއުޓާ ޖެނެރަލްގެ އޮފީހަށް ފޮނުވުމަށްޓަކައި ކުރަން ޖެހޭ އެންމެ ފަހުގެ މަސައްކަތްތައް ފުލުހުން މިހާރު ކުރަމުން އަންނަ ކަމަށް ވެސް ފުލުހުން ބުނެ އެވެ.

މީގެ އިތުރުން ފުލުހުން ބުނީ ކުއްޖާގެ ރައްކާތެރިކަން ކަށަވަރުކޮށް ބޭނުންވާ އެހީތެރިކަން ފޯރުކޮށްދިނުމަށް އަޅަން ޖެހޭ ފިޔަވަޅުތައް މީހާރު އަޅާފައިވާނެ ކަމަށެވެ.

ލޯބީގެ ގޮތުން ގުޅިގެން އުޅުމަށްފަހު، އެ ގުޅުން ނިމުމަކަށް ގެނައުމުން، 24 އަހަރުގެ ފިރިހެނަކު އޭނާ ކުރިން ގުޅިގެން އުޅުނު 17 އަހަރުންގެ އަންހެން ކުއްޖާ ބުލެކްމެއިލްކޮށް ރޭޕްކުރާނެ ކަމުގެ އިންޒާރު ދޭ މައްސަލައެއް ސޯޝަލް މީޑިއާއަށް ދޫކޮށްލާފައި ވަނީ އެ އަންހެން ކުއްޖޭގެ އާއިލާގެ ފަރާތެކެވެ.

އާއިލާ އިން އެ ވާހަކަ ހިއްސާ ކުރި މީހާ ބުނި ގޮތުގައި، މެދުކެނޑުމެއް ނެތި އެތައް ގޮތަކުން ބްލެކްމެއިލްކޮށް އިންޒާރު ދިނުމުގެ ސަބަބުން އަންހެން ކުއްޖާއަށް ނަފްސާނީ ގޮތުން އެތައް މައްސަލައެއް ވަނީ ދިމާވެފަ އެވެ.

މާލޭގެ ގޭންގަކަށް ނިސްބަތްވާ ކަމަށް ބުނާ އެ މީހާ އިންޒާރު ދޭ އޯޑިއޯތަކެއް ވެސް އާއިލާ އިން ވަނީ ސޯޝަލް މީޑިއާއަށް ދޫކޮށްލައިފަ އެވެ.

މި މައްސަލައާއި ގުޅިގެން އާންމުންގެ ގިނަ ބަޔަކު ދަނީ އަޑުއުފުލަމުންނެވެ.