އަފްގާނިސްތާނުން ހައްޔަރުކުރި ހ. މޫންލައިޓްވެލީ އަލީ ޝާފިއުއަށް ދިވެހި ފުލުހުން އަނިޔާކުރި ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތައް އެ މުއައްސަސާ އިން ދޮގުކޮށްފި އެވެ.

ސޯޝަލް މީޑިއާގައި ދިވެހި ފުލުހުންނަށް ތުހުމަތުކޮށްފައި ވަނީ އެ ގައުމަށް ގޮސް އޭނައަށް އަނިޔާ ކުރި ކަމަށެވެ.

ޝާފިއު، އާއިލާއާއެކު އަފްގާނިސްތާނަށް ދިޔަކަމުގެ މައުލޫމާތު ދިވެހި ފުލުހުންނަށް ލިބުނީ އިންޓަޕޯލް މެދުވެރިކޮށް 2018ގެ ނޮވެމްބަރު މަހުގެ ތެރޭގަ އެވެ. އެއާއެކު 2019ގެ ފެބްރުއަރީ މަހު ދިވެހި ފުލުހުންގެ ޓީމެއް ވަނީ އަފްގާނިސްތާނުގެ ކަމާ ގުޅުންހުރި އިދާރާތަކާ ގުޅިގެން އެގައުމަށް ގޮސްފަ އެވެ.

ފުލުހުން މިރޭ ނެރުނު ބަޔާނެއްގައި ވަނީ އެގައުމަށް ގޮސް، ޝާފިއުއާއި އޭނާގެ އާއިލާއަށް އަނިޔާކޮށް، ހުތުރު ބަހުން މުއާމަލާތް ކޮށްފައިނުވާނެ ކަމަށެވެ.

"މި މައްސަލައާ ގުޅިގެން ދިވެހި ފުލުހުންގެ ހިދުމަތުން ކޮށްފައިވާ އެއްވެސް މަސައްކަތެއްގެ ތެރެއިން، އިންސާނީ ހައްގަށާއި ކަރާމާތަށް އުނިކަން އަތުވެދާނެ އެއްވެސް ކަމެއް ކޮށްފައި ނުވާނެކަމުގެ ޔަގީންކަން ދެން." ފުލުހުން ނެރުނު ބަޔާނުގައިވެ އެވެ.

ސޯޝަލް މީޑިއާ މެދުވެރިކޮށް ސަލާމަތީ ހިދުމަތްތަކާއި ގާނޫނު ތަންފީޒުކުރާ އިދާރާތަކާއި އެ އިދާރާތަކުގެ ވަކިވަކި މުވައްޒަފުންނާމެދު މީހުންގެ މެދުގައި ނަފްރަތު އުފައްދައި، އެ މުވައްޒަފުންގެ ފުރާނަ ނުރައްކަލަށް ހުށަހެޅޭ ގޮތަށް ވާހަކަ ދައްކައި، ސޯޝަލް މީޑިއާގައި ޕޯސްޓު އާންމުކުރާ މީހުންގެ މައްސަލަ ބަލައި ތަހުގީގުކޮށް، ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށް ފުލުހުން ބުންޏެވެ.

އަފްގާނިސްތާނުން 2019ވަނަ އަހަރުގެ ނޮވެމްބަރު މަހު ހައްޔަރުކުރި އައިއެސް ހަނގުރާމަވެރިންތަކެއްގެ ތެރޭގައި ޝާފިއުއި އޭނާގެ އަންހެނުންނާއި ދަރިންވެސް ހިމެނެ އެވެ. އަދި ހަމަ އެ އަހަރުގެ ޑިސެމްބަރު މަހު ޓެރަރިޒަމްގެ ކުށް ސާބިތުވެ އަފްގާނިސްތާނުގެ ކޯޓަކުން ވަނީ ޝާފިއުއަށް 21 އަހަރުގެ ޖަލު ހުކުމެއް އިއްވާފަ އެވެ. ހަމައެހެންމެ އޭނާގެ އަނބިމީހާއަށްވެސް ކުށް ސާބިތުވެ، 20 އަހަރުގެ ޖަލު ހުކުމެއް ވަނީ އިއްވާފަ އެވެ.