އިސްލާމް އާބާދު (12 އޭޕްރީލް) - ޒަމާންވީ ކަޝްމީރުގެ މައްސަލަ ހައްލު ނުކޮށް އިންޑިއާއާއެކު އޮތް ގުޅުންތައް ރަނގަޅު ކުރެވެން ނެތް ކަމަށް ޕާކިސްތާނުގެ އާ ބޮޑުވަޒީރު ޝެހެބާޒު ޝަރީފް ވިދާޅުވެއްޖެ އެވެ.

ޝެހެބާޒް މިހެން ވިދާޅުވެފައި ވަނީ ގާނޫނު ހަދާ މަޖިލީހުގެ އަޣުލަބިއްޔަތާއެކު އިއްޔެ ބޮޑުވަޒީރުގެ މަގާމަށް އިންތިހާބުވެ ވަޑައިގަތުމަށްފަހު ގައުމާ މުހާތަބުކޮށް ދެއްވި ފުރަތަމަ ހިތާބުގަ އެވެ.

ޝެހެބާޒް އިތުރަށް ވިދާޅުވީ އިންޑިއާއާއެކު ޚާރިޖީ ގުޅުންތައް ވަރުގަދަ ކުރަން ބޭނުންވާ ކަމަށާއި ނަމަވެސް އެކަން ކުރެވެން އޮތީ ކަޝްމީރުގެ މައްސަލަ ހައްލު ކުރެވިގެން ކަމަށެވެ.

"ކަޝްމީރުގައި ހާލުގައި ޖެހިފައިވާ ރައްޔިތުންނަށް ޕާކިސްތާނުން އެހީވެދޭނެ. އަދި މި ކަން ބައިނަލްއަގުވާމީ ސަމާލު ކަމަށް ގެންނަން މަސައްކަތް ކުރާނަން،" ޝެހެބާޒް ވިދާޅުވި އެވެ.

އިންޑިއާއަކީ އަވަށްޓެރި ގައުމެއް ކަމަށާއި އެކަން ބަދަލު ކުރެވެން ނޯންނާނެކަން ފާހަގަ ކުރައްވަމުން ޝެހެބާޒް ވިދާޅުވީ އިންޑިއާއާއެކު ގުޅުން ރަނގަޅު ކުރަން ދެގައުމުގެ އެއްބާރުލުން ވެސް ބޭނުންވާނެ ކަމަށެވެ.

ޝެހެބާޒް ބޮޑުވަޒީރު ކަމަށް އިންތިހާބު ވުމާއެކު އިންޑިއާގެ ބޮޑު ވަޒީރު ނަރެންދްރަ މޯދީ ވަނީ އޭނާއަށް މަރުހަބާ ކިޔައި ޓްވީޓެއް ކޮށްފަ އެވެ.

މި ހިތާބުގައި ޝެހެބާޒް ވަނީ އިންޑިއާއިން 2019 ވަނަ އަހަރު ސުލްހައިގެ އެއްބަސްވުމާ ޚިލާފުވުމުން ވެސް ކުރީގެ ބޮޑުވަޒީރު އިމްރާން ޚާން އެއްވެސް ފިޔަވަޅެއް އަޅުއްވާފައި ނުވާތީ އޭނާއަށް ފާޑު ވިދާޅުވެފަ އެވެ.

އުމުރުން 70 އަހަރުގެ ޝެހެބާޒް ބޮޑު ވަޒީރު ކަމަށް އިންތިހާބުވީ ހޮނިހިރު ދުވަހު ގާނޫނު ހަދާ މަޖިލީހުގައު ނެގި އިތުބާރު ނެތްކަމުގެ ވޯޓަކުން އިމްރާން ޚާނަށް ނާކާމިޔާބުވެ މަގާމު ގެއްލުން އާ ބޮޑުވަޒީރެއް އައްޔަން ކުރަން ނެގި ވޯޓު ކާމިޔާބު ކޮށްގެންނެވެ.

ޝެހެބާޒްއަކީ އިމްރާން ޚާން މަގާމުން ދުރުކުރަން އިދިކޮޅުން ކުރިއަށް ގެންދިޔަ ހަރަކާތްތަކުގައި އެންމެ އިސްކޮށް އުޅުއްވި ލީޑަރެވެ. -- އެންޑީޓީވީ