މިއަހަރުގެ ގައުމީ ދުވަހުގެ ރަސްމީ ޖަލްސާ ހއ. އުތީމުގައި ބޭއްވުމަށް ނިންމާފައިވާ ކަމަށް ރައީސް އޮފީހުން ބުނެފި އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވީ މިއަހަރުގެ ގައުމީ ދުވަހުގެ ޖަލްސާ ބޭއްވުމަށް ނިންމާފައިވަނީ ހއ. އުތީމުގައި ކަމަށެވެ. ނަމަވެސް، ގައުމީ އިނާމު ދިނުމަށް އޮކްޓޯބަރުމަހު މާލޭގައި ޖަލްސާއެއް ބާއްވާނެ ކަމަށް ވެސް މިއުވާން ވިދާޅުވި އެވެ،

ގައުމީ ދުވަސް ރާއްޖޭގައި ފާހަގަކުރަމުންދަނީ ކޮންމެ އަހަރެއްގެ ރަބީޢުލްއައްވަލް މަހުގެ 1 ވަނަ ދުވަހު އެވެ. މިއަހަރު އެ ދުވަސް ދިމާވަނީ މިމަހުގެ 27 ވަނަ ދުވަހާ އެވެ.

ގައުމީ ދުވަހުގެ ރަސްމީ ޖަލްސާ ހއ. އުތީމުގައި ބޭއްވުމަށް ހަމަޖެހިފައިވާއިރު ގައުމީ ދުވަސް ނިސްބަތްވާ، ބޮޑު ތަކުރުފާނު ނުވަތަ އައްސުލްތާނު މުހައްމަދު ތަކުރުފާނުލް އަޢުޒަމްއަކީ އުތީމު ބޭފުޅެކެވެ.

ގައުމީ ދުވަހެއް ރާއްޖޭގައި ފުރަތަމަ ފާހަގަކުރީ ހިޖުރީގޮތުން 1365 ވަނަ އަހަރުގެ ރަބީޢުލްއައްވަލް މަހުގެ ފުރަތަމަ ދުވަހު އެވެ. އެއީ 4 ފެބްރުއަރީ 1946 ގައެވެ.