ބޮލީވުޑް މަޝްހޫރު ފަންނާނުންގެ ދަރިން ފިލްމީ ދާއިރާއަށް ނިކުންނަ ފިލްމު "ދަ އާޗީސް" ގެ ޝޫޓިން ނިންމާލައިފި އެވެ.

މި ފިލްމަކީ ޑައިރެކްޓަރު ޒޯޔާ އަޚްތަރު އާއި ނެޓްފްލިކްސް ގުޅިގެން ގެނެސްދިނުމަށް ހަމަޖެހިފައިވާ ފިލްމެކެވެ.

މިދިޔަ އަހަރު ފަހުކޮށްޅު ޝޫޓިން ފެށި މިފިލްމުގައި މިހާރު ބޮލީވުޑްގައި މަޝްހޫރު ބައެއް ފަންނާނުންގެ ދަރިން ފެނިގެންދާނެ އެވެ. އެގޮތުން ޝާހުރުކް ހާންގެ ދޮށީ އަންހެން ދަރިފުޅު ސުހާނާ ހާންއާއި، ބަތަލާ ސްރީދޭވީ އަދި ޖާންވީ ކަޕޫރުގެ ކޮއްކޮ ހުޝީ ކަޕޫރުގެ އިތުރުން އަމިތާބް ބަޗަންގެ ކާފަދަރިފުޅު އަގަސްތިޔާ ނަންދާ ފެނިގެންދާނެ އެވެ.

ފިލްމުގެ ޝޫޓިން އެއްކޮށް ނިންމައިލި ވާހަކަ ނެޓްފްލިކްސް އިންޑިއާ އިން މިއަދު ސޯޝަލް މީޑިއާގައި އާންމުކުރި ފޮޓޯތަކަކާ އެކު ހިއްސާކޮށްފައިވެ އެވެ. "ދި އާޗީސް" އަކީ ހުޅަނގުގެ ކޮމިކް ވާހަކައަށް ބިނާކޮށް ހަދާފައިވާ ފިލްމެކެވެ.

"ދި އާޗީސް" ގެ ޝޫޓިން ނިންމައިލި ނަމަވެސް ބެލުންތެރިންނަށް ފިލްމު ގެނެސްދޭނެ އިރެއް އަދި އިއުލާނެއް ނުކުރެ އެވެ. އެކަމަކު ޔަގީނުން ވެސް މި ފިލްމު ވާނީ އަންނަ އަހަރު އެންމެ ގިނަ ބަޔަކު އިންތިޒާރުކުރާނެ އެއް ފިލްމަށެވެ.

"ދިލް ދަޅަކް ނޭ ދޯ" އާއި "ޒިންދަގީ ނާ މިލޭގީ ދުބާރާ" ފަދަ ކާމިޔާބު ފިލްމުތައް ގެނެސްދިން ޒޯޔާގެ އެންމެ ފަހުގެ ފިލްމަކީ އިންޑިއާ އިން 2020 ގެ އޮސްކާ އެވޯޑްސް އަށް ފޮނުވި "ގަލީ ބޯއި" އެވެ.