ކަރާޗީ (31 ޖެނުއަރީ) - ޕާކިސްތާނުގެ ޕެޝާވަރުގައި ހުންނަ މިސްކިތަކަށް ދިން ހަމަލާގައި މިހާތަނަށް 80 މީހުން މަރުވެ 150 މީހަކަށް އެކި ވަރުގެ އަނިޔާ ލިބިފައިވާ ކަމަށް ހަބަރުތައް ބުނެފި އެވެ.

އިއްޔެ މެންދުރު ނަމާދުގެ ޖަމާއަތް ކުރިއަށް ދިޔަ ވަގުތު ދިން އެ ހަމަލާގައި ވެއްޓުނު އިމާރާތުގެ ދަށުވެފައިވާ މީހުން ސަލާމަތް ކުރުމުގެ މަސައްކަތް އަދިވެސް ކުރިއަށް ދާއިރު މަރުވި މީހުންގެ އަދަދު އިތުރުވާނެ ކަމަށް ބެލެވެ އެވެ.

މިސްކިތުގެ އިމާރާތުން ވެއްޓިފައިވާ ބައިގެ އެންމެ ފަހު ބައި މިއަދު ނަގާނެ ކަމަށް މީހުން ސަލާމަތް ކުރުމުގައި ހަރަކާތްތެރިވާ އޮފިޝަލެއް ކަމަށްވާ ބިލާލް އަހްމަދު ބުނި އިރު ދިރިހުއްޓާ އެއްވެސް މީހަކު ސަލާމަތް ކުރެވޭނެ ކަމުގެ އުއްމީދު ނެތް ކަމަށް ވެސް އޭނާ ބުނެފައިވެ އެވެ.

މި ހާދިސާގައި މަރުވި މީހުންގެ ތެރޭގައި އެވަގުތު އެސަރަހައްދުގައި ހަރަކާތްތެރިވި ގިނަ އަދަދެއްގެ ފުލުހުން ވެސް ހިމެނެ އެވެ. އެ ފުލުހުން ވަނީ ފުރިހަމަ އިއްޒަތާއި ޝަރަފުގައި ވަޅުލެވިފައި ކަމަށް ފުލުހުންގެ އިދާރާއިން ބުންޏެވެ.

ޖާނުން ފިދާވެގެން ދިން މި ހަމަލާ އަމާޒުކޮށްފައިވަނީ ޕެޝާވަރުގެ ސަލާމަތީ ކަންކަން ބަލަހައްޓަމުން އައި ފުލުހުންނަށް ކަމަށް ތަހުގީގު ޓީމުން ބުނެފައިވެ އެވެ.

"ޓެރަރިސްޓުން ބޭނުން ވަނީ ފުލުހުންނަށް ހަމަލާދީ ގައުމުގެ ދިފާއީ ނިޒާމް ބަލިކަށި ކުރަން،" ފުލުހުންގެ އިދާރާއިން ބުންޏެވެ.

މި ހަމަލާގެ ޒިންމާ މިހާތަނަށް އެއްވެސް ފަރާތަކުން ނަގާފައި ނުވާއިރު ޕާކިސްތާނުގައި ހަރަކާތްތެރިވާ ތާލިބާނުންގެ ޖަމާއަތް ކަމަށްވާ ޓީޓީޕީއަށް މި ހަމަލާގެ ތުހުމަތުކުރެވެ އެވެ. -- އަލް އަރަބިއްޔާ