ކަރާޗީ (01 ފެބްރުއަރީ) ޕާކިސްތާނުގެ ޕެޝާވަރުގައި ހުންނަ މިސްކިތަކަށް ދިން ބޮމުގެ ހަމަލާގައި ބައިވެރިވި ކަމަށް ޝައްކު ކުރެވޭ ބަޔަކު ހައްޔަރު ކުރެވިފައިވާ ކަމަށް އެ ހާދިސާ ތަހުގީގު ކުރުމުގައި ހަަރަކާތްތެރިވާ ފުލުހުން ބުނެފި އެވެ.

އަފްޣާނިސްތާނުގެ ބޯޑަރު ކައިރީގައި އޮންނަ ޕެޝާވަރުގައި މިހާތަނަށް ދިން އެންމެ ނުރައްކާތެރި ހަމަލާގައި މިހާތަނަށް 100 އަށްވުރެ ގިނަ މީހުން މަރުވެފައިވާއިރު އެތައް ސަތޭކަ ބަޔަކަށް ވަނީ އެކިވަރުގެ އަނިޔާތައް ލިބިފަ އެވެ.

މަރުވި މީހުންގެ ތެރޭގައި އެ ސަރަހައްދު ބަލަހައްޓަމުން ދިޔަ ގިނަ އަަދަދެއްގެ ފުލުހުން ހިމެނޭއިރު ތަހުގީގު ޓީމުން ވަނީ މި ހަމަލާ ދިނުމުގައި ފުލުހުންގެ ތެރެއިން ވެސް އެހީތެރިކަން ފޯރުކޮށްދީފައި އޮވެދާނެ ކަމަށެވެ.

ފުލުހުން އިތުރަށް ވިދާޅުވީ ތަހުގީގުގައި ބޮޑެތި ކުރިއެރުންތަކެއް ލިބިފައިވާ ކަމަށާއި ކުށްވެރިންނަށް ވަރަށް އަވަހަށް އެންމެ ހައްގު އަދި ހަރުކަށި އަދަބު ދެވޭނެ ކަމަށެވެ.

މިދިޔަ ހޯމަ ދުވަހުގެ މެންދުރު ނަމާދުގެ ޖަމާއަތް ކުރިއަށް ދިޔަ ވަގުތު ދިން ޖާނުން ފިދާވުމުގެ މި ހަމަލާއަކީ ޓެރަރިސްޓް ހަމަލާއެއްގެ ގޮތުގައި ސިފަކޮށް އިސްލާމީ ގައުމުތަކުން ވަނީ އެކަން ކުށްވެރި ކޮށްފަ އެވެ.

ޖަމާއަތުގެ އެންމެ ކުރީ ސަފުގައި ހުރި އެ މީހާއަކީ ޓެރަރިސްޓް އެއްވެސް ޖަމާއަތަކާ ގުޅުމެއް އޮންނަ މީހެއްކަން މިހާތަނަށް ތަހުގީގަށް އެނގިފައިނުވާ ކަމަށް ފުލުހުން ބުނެ އެވެ.

އެހެން ނަމަވެސް ގިނަ ބަޔަކު އަންނަނީ މި ހަމަލާގެ ތުހުމަތު ޕާކިސްތާނުގައި ހަރަކާތްތެރިވާ ތާލިބާނުންގެ ޖަމާއަތް ކަމަށްވާ ޓީޓީޕީއަށް ކުރަމުންނެވެ. -- އަލް އަރަބިއްޔާ