ކަރާޗީ (05 ފެބްރުއަރީ) ޕާކިސްތާނުގެ ކުރީގެ ރައީސް ޕަރްވޭޒް މުޝައްރަފް އަވަހާރަވެއްޖެ އެވެ.

2001 ވަނަ އަހަރުން ފެށިގެން 2008 ވަނަ އަހަރާ ހަމައަށް ޕާކިސްތާނުގެ ރައީސްކަން ކުރެއްވި މުޝައްރަފް އަވަހާރަވީ ދިގު މުއްދަތުގެ އާލާސްކަންފުޅެއްގައި އުޅުއްވުމަށްފަހު އުމުރުން 79 އަހަރުގައި ދުބާއީގަ އެވެ.

ހަތް އަހަރަށް ދެމިގެން ދިޔަ މުޝައްރަފްގެ ޒައާމަތުގައި އޭނާ އަވަހާރަ ކޮށްލަން ތިން ފަހަރެއްގެ މަތިން މަސައްކަތްކޮށް ނާކާމިޔާބުވެފައިވެ އެވެ.

މުޝައްރަފްގެ ވެރިކަމުގައި ޕާކިސްތާނަށް އިގްތިސާދީ އަދި މާއްދީ ގިނަ ކުރިއެރުންތަކެއް ލިބިފައިވާއިރު އޭނާއާ ދެކޮޅަށް ވެސް އެގައުމުގައި ގިނަ ހަރަކާތްތަކެއް ހިންގި އެވެ.

ހަމައެއާއެކު އެ ވެރިކަމުގެ ދައުރު ވެގެން ގޮސްފައިވަނީ ޕާކިސްތާނުގެ ދާޚިލީ މަޝްރަހު ހަލަބޮލިވި ދުވަސްވަރަކަށެވެ. އެގޮތުން އިދިކޮޅު ލީޑަރު އަދި ކުރީގެ ބޮޑުވަޒީރު ބޭނަޒީރު ބުއްޓޯ އަވަހާރަ ކޮށްލުން ފާހަގަ ކޮށްލެވެ އެވެ.

ވެރިކަމަށް އިސްވުމުގެ ކުރިން އަދި އިސްވުމަށް ފަހުވެސް އެގައުމުގެ އަސްކަރިއްޔާގެ ޗީފްއެއްގެ ގޮތުގައި ހުންނެވި މުޝައްރަފް މިއަދު ހެނދުނުގެ ވަގުތެއްގައި އަވަހާރަވެފައިވާކަން ޕާކިސްތާނުގެ އިސް އޮފިޝަލަކު ވަނީ ޔަގީންކޮށްދީފަ އެވެ.

2013 ވަނަ އަހަރު އަލުން ވެރިކަމަށް އަންނަން މުޝައްރަފް މަސައްކަތް ކުރެއްވި ނަމަވެސް އޭރުގެ ރައީސް ނަވާޒް ޝަރީފް ވަނީ އިންތިހާބުން އޭނާ ބޭރުކޮށްލާފަ އެވެ.