ރައީސްގެ ސޯލިހުގެ މައްޗަށް ނަޝީދު ކުރި ހޯއްދެވީތަ؟

އެމްޑީޕީގައި މައްސަލަތަކެއް އުފެދި ޕާޓީ ދެބައިވިކަމުގެ އަޑުތައް އެރިތާ ކިތަންމެ ދުވަހެކެވެ. އެ ވާހަކަ މީޑިއާތަކަށާއި އާންމުންނަށް ތިލަވަމުން އައިއިރު އެންމެނަށް ވެސް ހީވެފައި އޮތީ އެއީ އެތެރޭގެ އިންތިޚާބުގެ ވާދަވެރިކަން ކަމަށެވެ. އެމްޑީޕީ "ޑިމޮކްރަސީއަށް ވަރަށް ފަރިތަވާނެ" ކަމަށާއި އިންތިޚާބުތަކަށް ފަހު ހުރިހާ ކަމެއް ހަމަޖެހި ދެ ގްރޫޕުއެކުގައި މަސައްކަތްކުރާނެ ކަމަށް އެ ޕާޓީގެ ގިނަ ބަޔަކު ދިޔައީ ބުނަމުންނެވެ. އެގޮތަށް ދެކެމުން އައި އެމްޑީޕީގެ މެންބަރުންނަށް މިއަދު ގަބޫލު ކުރަންޖެހިފައިވާ ހަގީގަތަކީ ޕާޓީގެ ޕްރައިމަރީ އިން ބަލިވެ ވަޑައިގެންނެވި ކަމުގައި ވިޔަސް ރައީސް އިބްރާހިމް މުހަމަދު ސޯލިހާއެކު މަސައްކަތް ނުކުރައްވާނެ ކަމަށް ރައީސް މުހައްމަދު ނަޝީދު ވިދާޅުވަމުންގެންދެވި ގެންދެވުން އެމަނިކުފާނު ދޫކޮށް ނުލައްވާނެކަމެވެ.

ޕްރައިމަރީގެ ގަދަ ހިފުމަށް ފަހު އެންމެން ގުޅިގެން ރިޔާސީ އިންތިޚާބަށް ނިކުތުމަށް ގޮވާލެއްވިއިރު ވެސް އަދި އޭގެ ކުރިން ވެސް ރައީސް އިބުރާހިމް މުހައްމަދު ސޯލިހު ވިދާޅުވަމުން ގެންދެވީ އެހެން ޕާޓީތަކާއެކު ކޯލިޝަން ހަދައިގެން ފުތަތަމަ ބުރުން އިންތިޚާބު ކާމިޔާބު ކުރެއްވެވޭނީ އެމަނިކުފާނަށް ކަމަށެވެ. އެހެންކަމުން ރައީސް ނަޝީދު ވެސް އެމަނިކުފާނުގެ ފަހަތްޕުޅުގައި މަސައްކަތް ކޮށްދެއްވުމަށް އެދިވަޑަގެންނެވި އެވެ.

ރައީސް ސޯލިހު ވެރިކަން ހޯއްދެވުމަށް ގެންގުޅުއްވި ފޯމިއުލާއަށް ބެއްލެވުމެއް ނެތި. އެކުގައި ކުރެވޭނެ މަސައްކަތެއް ނެތްކަމުގައި ފާޅުގައި ވިދާޅުވަމުން ރައީސް ނަޝީދު ބެއްލެވީ ރައީސް ސޯލިހުގެ ކޯލިޝަނުގެ ހުވަފެން ފެނަށް ހައަދަވައި ލެވޭތޯ އެވެ. ރާއްޖޭގައި ކޯލިޝަނަކުން ވޯޓުގެ ބުރަދަން ބަދަލުކޮށްލުމުގެ ކިރިޔާވެސް ބަރުދަނެއް ހުރި ޕާޓީ ކަމަށްވާ ޖުމުހޫރީ ޕާޓީގެ ލީޑަރު ގާސިމް އިބްރާހިމްގެ ފަހަތްޕުޅުން ރައީސް ސޯލިހާއި ރައީސް ނަޝީދު ވަޑައިގެންނެވިއިރު، ދެބޭފުޅުންނަށް ވެސް ގާސިމްވެފައި އޮތީ ހުކުމުގެ ފަހު ގަނޑު ކަމަށެވެ.

ރައީސް ސޯލިހު ގާސިމްގެ ފަރާތުން އެދިވަޑައިގެންނެވީ ދެބޭފުޅުން އެކުގައި ކޯލިޝަނެއްގެ ގޮތުގައި ވެރިކަމަށް ނިކުތުމަށެވެ.

ރައީސް ނަޝީދު ގާސިމް އަރިހުން އެދިވަޑައިގެންނެވީ ކޯލިޝާނަކާ ނުލައި އަމިއްލައަށް އިންތިޚާބަށް ނުކުންނެވުމަށެވެ. އެގޮތަށް ކަންތައް ކުރައްވައިފި ނަމަ ރައީސް ނަޝީދާއެކު އެމަނިކުފާނުގެ ފިކުރެއްގެ ދިރުމުގެ 50،000 މީހުންގެ ތާއީދަކީ ގާސިމް އިބުރާހިމް ރާއްޖޭގެ ވެރިކަމަށް ވަޑައިގެންނެވުމަށް މިހާތަނަށް ލިބޭ އެންމެ ފަހި ފުރުސަތުކަމުގައި ނަޝީދު ވަނީ ވިސްނަވައި ދެއްވާފަ އެވެ.

މިހާތަނަށް ފެންނަމުންދާ މަންޒަރުތަކަށް ބަލާއިރު، ރައީސް ނަޝީދުގެ ތާއީދާއި ގާސިމްގެ އެޑްވައިޒަރުންނާއި ޕާޓީގެ އިސް ފަރާތްތަކުގެ ބާރު އެޅުމާއެކު، 2023 ވަނަ އަހަރުގެ ރިޔާސީ އިންތިޚާބަށް ގާސިމް ކުރިމަތި ލައްވާނެ ކަމަށް ވަރަށް ބޮޑަށް ބެލެވެ އެވެ. ޕާޓީގެ ގައުމީ ކޮންފަރެންސް ކުރިޔަށް ދާއިރު އިވެމުން ދަނީ މިހާރުގެ ސަރުކާރާ ދެކޮޅު ޝުއޫރުތަކެވެ. ގާސިމްގެ އަމިއްލަފުޅު ބަސްފުޅުންނަމަ ކޯލިޝަނުން ޖުމުހޫރީ ޕާޓީ އަށް ލިބެނީ "ކަނދި ކަމަނާގެ މަސް ތެލުލުމުން" ލިބޭ ފަދަ ނަމެކެވެ.

ކޮންމެ ފަހަރަކު ވެސް ވެރިކަމަށް އިންތިޚާބުވާ ހިސާބުން ޖުމުހޫރީ ޕާޓީގެ ބޭނުން ކެނޑިދާކަމަށާއި ސަރުކާރުން ކުރާ އެއްވެސް ރަނގަޅު ކަމެއްގެ ކްރެޑިޓުން މިންވަރެއް ވެސް އެޕާޓީއަށް ނުލިބޭ ކަމަށް ގާސިމް ގެނދަވަނީ ވިދާޅުވަމުންނެވެ. މީގެ އިތުރުން ގާސިމް ވަނީ ރައީސް ސޯލިހާ އިދިކޮޅަށް މަސައްކަތް ކުރައްވަމުން ގެންދަވާ ކުރީގެ ރައީސް ނަޝީދަށް ތައުރީފުކުރައްވައި ވާހަކަފުޅު ދައްކަވާފަ އެވެ.

އެމްޑީޕީގެ ރިޔާސީ ޓިކެޓަށް ކުރި ކެމްޕޭނުގައި ރައީސް ސޯލިހު ދެއްކެވި މައިގަނޑު ވާހަކައަކީ އެމަނިކުފާނަކީ ބޮޑެތި ޕާޓީތަކާއެކު ހަދާ ކޯލިޝަން ދެމެހެއްޓޭނެކަމުގެ އަމަލީ މިސާލު ދެއްކެން އޮތް ހަމައެކަނި ކެންޑިޑޭޓު ކަމަށެވެ. މިހާރު ވެރިކަމުގައި އޮތް އެމްޑީޕީ ސަރުކާރު ވެރިކަމަށް އައުމަށްޓަކައި ހެދި ކޯލިޝަން ނުއުވި ސަރުކާރުގެ ދައުރު ހަމަވާން ދާ ދިއުމަކީ އެމަނިކުފާގެ އެ ވާހަކަފުޅަށް ދެއްކެވި ހުއްޖަތެވެ. އެއާއެކު ކުރިޔަށް އޮތް އިންތިޚާބު އެ ކޯލިޝަނާއެކު ނުކުމެވަޑައިގެން ކާމިޔާބު ކުރެއްވޭނެ ހަމަ އެކަނި ބޭފުޅަކީ އެމަނިކުފާނު ކަމަށް ވެސް ގެންދެވީ ވިދާޅުވަމުންނެވެ. އެ ވާހަކަފުޅަށް ރައްދު ދެއްވައި ރައީސް ނަޝީދު ވިދާޅުވަމުން ގެންދެވީ ރައީސް ސޯލިހުގެ ކޯލިޝަން ހުވަފެން ކާމިޔާބު ނުވާނެ ކަމަށާއި ކޮންމެ ޕާޓީއަކުން ވެސް ވަކިވަކިން އިންތިޚާބަށް ނިކުންނާނެ ކަމަށެވެ.

ޕްރައިމަރީގެ ވާދަ ނިމި ރައީސް ސޯލިހު ކޯލިޝަން އެއްބަސްވުންތަކެއް އެކުލަވައިލެއްވުމަށް އަވަސްވެވަޑައިގެންނެވިއިރު، ފެންނަން އޮތް ހަގީގަތަކީ ކޯލިޝަންގެ އެންމެ މުހިންމު ބައިވެރިޔާ ޖުމުހޫރީ ޕާޓީގެ ލީޑަރު ރިޔާސީ ރޭހަށް ނުކުންނަން އުޅުއްވާކަމެވެ. އެކަމަށް ހިތްވަރު ދެއްވައި އެކުގައި ވާނެކަމުގައި ވިދާޅުވާން ކައިރީގައި ރައީސް ނަޝީދު ހުންނެވި ތަނެވެ. އެހެންކަމުން ޕްރައިމަރީ ކާމިޔާބުކުރެއްވި ނަމަވެސް ރައީސް ސޯލިހުގެ މައްޗަށް ނަޝީދު މިވަނީ ކުރި ހޯއްދަވައިފައި ކަމަށް ބެލެވިދާނެ އެވެ. ނަމަވެސް މި މަންޒަރު ފަހުން ބަދަލުނުވާނެއެކޭ ބުނަން ނޭނގެ އެވެ.