ބޮލީވުޑްގެ ދެ ތަރިން ކަމަށްވާ ނޭހާ ދޫޕިއާ އާއި އަންގަދް ބޭދީ ޗުއްޓީ އަށް ރާއްޖެ އަތުވެއްޖެ އެވެ.

މިފަހަރު މިދެ ފަންނާނުން ރާއްޖެ އައިސްފައި ވަނީ އެ މީހުންގެ ދެ ދަރިން ވެސް ގޮވައިގެންނެވެ. ނޭހާ އާއިލާ ހޯމަ ދުވަހު ރާއްޖެ އައިސްފައިވާއިރު، އެ މީހުން ޗުއްޓީ ހޭދަކުރަމުން އަންނަނީ ޑައިމަންޑްސް ތުނޑުފުށީގަ އެވެ.

ނޭހާ ވަނީ އޭނާގެ ސޯޝަލް މީޑިއާގައި ރާއްޖޭގައި ނަގާފައިވާ ފޮޓޯތައް ހިއްސާ ކޮށްފަ އެވެ.

އެ ފޮޓޯތައް ހިއްސާ ކުރަމުން ނޭހާ ބުނެފައި ވަނީ އޭނާ މިހާރު އެ ހުރީ ދުނިޔޭގެ އެންމެ މަގްބޫލް ގައުމުގައި ކަމަށެވެ.

ނޭހާ ވަނީ އޭނާގެ ދެ ކުދިންނާ އެކުގައި ގޮނޑު ދޮށުގައި ކުޅެމުންދާ އުފާވެރި މަންޒަރުތައް ވެސް ހިއްސާކޮށްފަ އެވެ.

ނޭހާ ވަނީ މީގެ ކުރިން ވެސް އޭނާގެ ފިރިމީހާއި ދަރިންނާއިއެކުގައި ރާއްޖެއަށް ޗުއްޓީ ހޭދަކޮށްފަ އެވެ.

ނޭހާ އޭނާގެ ދަރިންނާއެކު

ކުރީގެ މިސް އިންޑިއާ ނޭހާ އާއި އަންގަދު ކައިވެނި ކުރީ 2018 ވަނަ އަހަރު އެވެ. ހަމަ އެ އަހަރުގެ ނޮވެމްބަރު މަހު އެ ދެ މީހުންނަށް ފުރަތަމަ ދަރިފުޅު މެހްރް ލިބިފައިވާއިރު ދެ ވަނަ ދަރިފުޅު ލިބުނީ 2021 ވަނަ އަހަރު އެވެ.

ނޭހާ ދުޕިއާ ކުޅުނު މަޝްހޫރު ބައެއް ފިލްމުތަކުގެ ތެރޭގައި "ސިންގް އިޒް ކިންގް"، "ހޭ ބޭބީ"، "ދޭ ދަނާ ދަން"، "ރަންގީލޭ"، "ޕަޕޫ ކާންޓް ޑާންސް ސާލާ" ފަދަ ފިލްމުތައް ހިމެނެ އެވެ. އޭނާ އެންމެ ފަހުން ކުޅުނީ ކުރު ފިލްމު "ދެވި" އެވެ.

އެމްޓީވީން ގެނެސްދޭ ރިއަލިޓީ ޝޯ "ރޯޑީޒް" ގެ ހަމައެކަނި އަންހެން މެންޓޯއެއްގެ ގޮތުގައި ނޭހާ ވަނީ ފެނިގެން ގޮސްފަ އެވެ.