ރާއްޖޭގައި އޮންނަން ފެންނަ ވެރިކަމުގެ ނިޒާމެއް ކަނޑައެޅުމަށް ބާއްވަން ޖެހޭ އިންތިހާބު މި މަހު ނެގުމުގެ ފުރުސަތެއް މިހާރު ނެތް ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބް މިއަދު ވިދާޅުވެއްޖެ އެވެ.

ހަބީބް އެކްސްގައި ކުރެއްވި ޕޯސްޓެއްގައި ވިދާޅުވީ އިންތިހާބުތަކާ ބެހޭ އާންމު ގާނޫނުގައިވާ ގޮތުން އިންތިހާބެއް ބޭއްވުމަށް މަދުވެގެން 45 ދުވަސް ބޭނުންވާ ކަމަށެވެ.

ހަބީބް ވިދާޅުވި ގޮތުގައި އެއީ އިންތިހާބު އިއުލާން ކުރުމާއި ރަޖިސްޓްރީ އާންމުކޮށް ޝަކުވާ އަށް ހުށަހެޅުމާއި ރީ-ރަޖިސްޓްރޭޝަނަށް ހުޅުވާލުމާއި އޮފިޝަލުން ތަމްރީން ކުރުމާއި ކެމްޕެއިން ކުރުމާއި ވޯޓުލާ މަރުކަޒަށް ބޭނުންވާ ތަކެތި ތައްޔާރު ކުރުމާއި ވޯޓު ކަރުދާސް ތައްޔާރުކޮށް ޗާޕް ކުރުން ފަދަ ކަންކަމަށެވެ.

ހަބީބް ވިދާޅުވީ ރާއްޖޭގައި މިހާރު އޮތް ވެރިކަމުގެ ނިޒާމު ބަދަލު ކުރުމާ ގުޅޭ ގޮތުން ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމަށް ރައްޔިތުންގެ މަޖިލިހުން ގަރާރެއް ފާސް ކުރައްވައި އީސީ އަށް ފޮނުވި ވަގުތަކީ ރިޔާސީ އިންތިހާބުގެ މަސައްކަތް ހިނގަމުން އައި ވަގުތާ އެއް ވަގުތަކަށް ވެފައި، އެފަދަ ވަގުތެއްގައި ކޮމިޝަނަށް މަދުވެގެން 30 ދުވަހުގެ މުއްދަތެއް ލިބިއްޖެ ނަމަ، މި މަހުގެ 30 ގެ ކުރިން އީސީން އެފަދަ ވޯޓެއް ނެގިދާނެ ކަމަށް ދެންނެވިފައި ވީ ނަމަވެސް މިއަދާ ހަމަށް ވެސް މަޖިލިހުން ކޮމިޝަނަށް އެދިވަޑައިގެންނެވި ކަންކަމާ މެދު ގޮތެއް ނިންމާފައި ނުވާ ކަމަށެވެ.

އެހެންވެ، މި މަހުގެ ތެރޭގައި އެފަދަ ވޯޓެއް ނެގުމުގެ ފުރުސަތު މިހާރު ނެތް ކަމަށް ވެސް ހަބީބް ވިދާޅުވި އެވެ.

"މިކަމަކީ ރައްޔިތުންނާ ސީދާ ގުޅުންހުރި ކަމަކަށްވެފައި، މިކަމާ ގުޅޭ މަޢުލޫމާތު ރައްޔިތުންނަށް ފޯރުކޮށް ދިނުމަކާ ނުލައި، މިފަދަ ވޯޓަކަށް ދިޔުމަކީ ކުރެވިދާނެ ކަމެއް ކަމަކަށް ގަބޫލެއް ނުކުރެވޭ." ހަބީބް ވިދާޅުވި އެވެ.

ބަރުލަމާނީ ނިޒާމެއް ގެނައުމަށް މަސައްކަތް ކުރަނީ އެމްޑީޕީން ވަކިވެ، ޑިމޮކްރެޓްސް އުފެއްދެވި ބޭފުޅުންނެވެ. ހާއްސަކޮށް ރައްޔިތުންގެ މަޖިލިހުގެ ރައީސް މުހައްމަދު ނަޝީދު އެ މަސައްކަތުގެ އެންމެ ކުރީ ސަފުގައި ހުންނެވި ކަން ފާހަގަކޮށްލެވެ އެވެ.

އެކަމަކު، ނަޝީދު އަލުން އެމްޑީޕީއާ ގުޅުމަށާއި ބަރުލަމާނީ ނިޒާމު ގެންނަން އެމްޑީޕީގެ ގައުމީ މަޖިލީހުގައި ހިމެނޭ މެންބަރުންގެ ތެރޭން 99 ޕަސެންޓް ދެކޮޅު ކަމަށް ރައީސް އިބްރާހިމް މުހައްމަދު ސޯލިހު މީގެކުރިން ވަނީ ވިދާޅުވެފަ އެވެ.