ހުޅުމާލެ ފޭސް 3 ގެ ސައިޓް އޭގެ 70 ޕަސެންޓް ހިއްކައި ނިމިއްޖެ އެވެ.

އާބަންކޯއިން ބުނީ މި ހަފްތާގެ ހުކުރު ދުވަހަށް ސައިޓް އޭ އެއްކޮށް ހިއްކައި ނިންމާލެވޭނެ ކަމަށެވެ.

ސައިޓް އޭ އަށްފަހު ހިއްކުމަށް ހަމަޖެހިފައިވަނި ސައިޓް ބީއެވެ. އެހެންކަމުން ސައިޓް ބީގެ މަސައްކަތް ފެށުމަށް އެސަރަހައްދުގައި އަޅާފައިވާ އުޅަނދުތައް، އެ ސަރަހައްދުން ވީހާވެސް އަވަހަކަށް ނެގުމަށް އާބަންކޯއިން އެދެ އެވެ.

ހުޅުމާލެ ފޭސް 3 ހިއްކުމުގެ މި މަޝްރޫއަކި މާލެ ސަރަހައްދުގައި ކުރިމަތިވެފައިވާ ތަފާތު ދަތިތަކުން އަރައިގަތުމަށް ހިންގެމުންދާ ތަފާތު ތަރައްގީގެ މަޝްރޫއުތަކުގެ ބައެކެވެ. އެގޮތުން ހުޅުމާލެ ފޭސް 3ގައި 63 ހެކްޓަރުގެ ބިން ހިއްކުމުގެ މަޝްރޫއުއަކީ މާލޭގެ ގިނަ ރައްޔިތުން، އެތައް އަހަރެއް ވަންދެން ތަހައްމަލު ކުރަމުންދިޔަ ބޯހިޔާވަހިކަމުގެ ދަތިކަމަށް ބޮޑު ލުޔެއް ލިބި، ގިނަބައެއްގެ ދިރިއުޅުމުގެ ފެންވަރު ރަނގަޅުވޭތޯ ދެކެމުންދިޔަ ހުވަފެންތައް ހަގީގަތަކަށް ވެގެންދާނެ މަޝްރޫއުއެކެވެ.

ރައީސް އިބްރާހީމް މުހައްމަދު ސޯލިހު ނިންމެވީ ހުޅުމާލޭ ފޭސް 3 ގެ އިތުރުން ގުޅިފަޅާއި ގިރާވަރު ފަޅާއި އުތުރު ތިލަފަޅުގައި މީހުން އާބާދުކުރެއްވުމަށެވެ.