ގއ. ކަނޑުހުޅުދޫ ދޯންޏަކުން ފަލަސްތީނުގެ ޣައްޒާ ރައްޔިތުންނަށް 50،000 ރުފިޔާ ދިނުމަށް ނިންމައިފި އެވެ.

ކަނޑުހުޅުދޫ "ސީހޯސް 3" ދޯނީގެ ފަރާތުން ވާހަކަ ދެއްކި މީހަކު ބުނީ ފަލަސްތީނުގެ ޣައްޒާގައި ހާލުގައި ޖެހިފައިވާ ރައްޔިތުންނަށް އެހީތެރިކަން ފޯރުކޮށްދިނުމުގެ ގޮތުން، ފާއިތުވި ހަފްތާގައި އެ ދޯނިން ބޭނި 50 ޓަނުގެ މަހުން ދެ ޓަނުގެ މަހަށްވާ ފައިސާ ފަޅުވެރިންގެ ފަރާތުން ފަލަސްތީނު ފަންޑަށް ދިނުމަށް ނިންމާފައިވާ ކަމަށެވެ.

ދެ ޓަނުގެ މަހަށްވާ ފައިސާގެ އަދަދަކީ ބައިލައްކަ ރުފިޔާ އެވެ.

ކަނޑުހުޅުދޫ ދޯންޏަކުން ފަލަސްތީނަށް އެހީވާން ނިންމި އިރު، ގއ. ވިލިނގިލީގެ ދެ ދޯންޏަކުން ވެސް ފަލަސްތީނަށް އެހީވާން ވަނީ ނިންމައިފަ އެވެ. ވިލިނގިލީގެ "ހުސީނާ" ދޯނިންނާއި ކަރައްވައްތާ" ދޯނިންނެވެ.

މި މަހުގެ ހަތް ވަނަ ދުވަހުން ފެށިގެން އިސްރާއީލުން ދެމުން އަންނަ ހަމަލާތަކުގައި ފަލަސްތީނުގެ ޣައްޒާ އިން 2،400 އަށް ވުރެ ގިނަ މީހުން ޝަހީދުކޮށްލައި، 9،200 އަށް ވުރެ ގިނަ މީހުން ވަނީ ޒަހަމްކޮށްލައިފަ އެވެ.

ހަމާސްގެ ހަމަލާތަކުގައި އިސްރާއީލުން 1،400 އަށް ވުރެ ގިނަ މީހުން ވަނީ މަރާލައިފަ އެވެ. އޭގެ ތެރޭގައި 289 މީހުންނަކީ އިސްރާއީލްގެ ސިފައިންނެވެ. ހަމާސް އިން ވަނީ 130 އަށް ވުރެ ގިނަ އިސްރާއީލް ސިފައިން ރަހީންކޮށްގެން ޣައްޒާ އަށް ގެންގޮސްފަ އެވެ.

އިސްރާއިލުން ގައްޒާއަށް ދެމުން އަންނަ ވަރުގަދަ ހަމަލާތަކާއެކު އިސްރާއިލުގެ ސިފައިން މިހާރު ދަނީ ގައްޒާއަށް އެރުމަށް ތައްޔާރުވަމުންނެވެ. އިސްރާއިލުން މިހާރު ވަނީ ގައްޒާގެ އުތުރުގައި ތިބޭ މީހުން އެ ސަރަހައްދު ދޫކޮށް ދިއުމަށް ވެސް އަންގައިފަ އެވެ.