ފަލަސްތީނުގެ ޣައްޒާގައި ހުންނަ އިންޓަނޭޝަނަލް އެއިޑް ކެމްޕެއިން (އައިއޭސީ) ގެ ގުދަނަކަށް އިސްރާއީލުން ބޮން އަޅައި އެތަން ފުނޑުފުނޑުކޮށްލައިފި އެވެ.

ދިވެހިން ފަލަސްތީނުގެ ޣައްޒާގެ ރައްޔިތުންނަށް އެހީ ފޯރުކޮށްދެނީ، މައިގަނޑު ގޮތެއްގައި އައިއޭސީ ޖަމާއަތަށެވެ. ފަލަސްތީނަށް އެހީވުމަށް އައިއޭސީން މިހާރު ވެސް ފަންޑެއް ހުޅުވާފައިވާ އިރު، މިހާތަނަށް އައިއިރު ފަންޑަށް ހަތް މިލިއަނަށް ވުރެ ގިނަ ރުފިޔާ ލިބިފައިވެ އެވެ.

އައިއޭސީން ބުނީ އެ ޖަމިއްޔާގެ ގުދަނަކަށް ސީދާ އަމާޒުކޮށް، އިސްރާއީލްގެ ޔަހޫދީން ދިން ހަމަލާގައި ގުދަން އެއްކޮށް ހަލާކުވެފައިވާ ކަމަށެވެ.

އެތަނުގައި ހުރި ތަކެތީގެ ތެރޭގައި 2،000 ރަޖާ އާއި ވަގުތުން ކެވޭ ގޮތަށް ތައްޔާރު ކުރެވިފައިވާ 1،000 ޕެކްގެ އިތުރުން، އަންނައުނު 3،000 ޕެކް ހިމެނޭ ކަމަށް އައިއޭސީން ބުނެފައިވެ އެވެ. އަދި އެ ޖަމިއްޔާގެ މުވައްޒަފުން ދަތުރު ކުރަމުންދިޔަ ވެހިކަލަކަށް ހަމަލާދީފައިވާ ކަމަށް ވެސް އައިއޭސީން ބުނެފައިވެ އެވެ.

"އެއްވެސް މީހެއްގެ ފުރާނަޔަށް ގެއްލުން ވާވަރުގެ އަނިޔާއެއް ނުވޭ." އައިއޭސީން އެކްސްގައި ކުރި ޕޯސްޓެއްގައި ބުނެފައިވެ އެވެ.

އެކަމަކު، ހަމަލާގައި އައިއޭސީގެ ބައެއް މުވައްޒަފުންނަށް އަނިޔާ ލިބިފައިވެ އެވެ.

އިސްރާއީލްގެ ހަމަލާތަކުގައި ފަލަސްތީނުން 2،700 އަށް ވުރެ ގިނަ މީހުން ޝަހީދުވެފައިވާ އިރު، އަނިޔާ ލިބުނު މީހުންގެ އަދަދު ވެސް 9،600 އަށް ވުރެ މައްޗަށް ވަނީ އަރައިފަ އެވެ. ހަމާސްގެ ހަމަލާތަކުގައި އިސްރާއީލުން 1،400 މީހުން ވަނީ މަރާލައިފަ އެވެ.