ބޮލީވުޑްގެ ބަތަލާ އުރްވަޝީ ރައުޓެލާގެ 24 ކެރެޓްގެ ރަން އައިފޯން ގެއްލިއްޖެ އެވެ.

ދެހާސް ފަނަރަ ވަނަ އަހަރުގެ މިސް ޔުނިވާސް މުބާރާތުގައި އިންޑިއާ ތަމްސީލު ވެސް ކުރި 29 އަހަރުގެ ބަތަލާ އުރްވަޝީ ޓްވިޓާގައި ކުރި ޕޯސްޓެއްގައި ބުނެފައިވަނީ އޭނާގެ 24 ކެރެޓްގެ ރަން އައިފޯނު ގެއްލުނީ އިންޑިއާ އާއި ޕާކިސްތާނުގެ ކްރިކެޓް މެޗު ބެލުމަށް މިދިޔަ ހޮނިހިރު ދުވަހު އަހުމަދު އާބާދުގެ ނަރެންދްރާ މޯދީ ސްޓޭޑިއަމަށް ގޮސްއުޅެނިކޮށް ކަމަށެވެ.

މި މައްސަލަ ވާނީ ފުލުހަށް ރިޕޯޓްކޮށްފައި ކަމަށް ވެސް އުރްވަޝީ ބުންޏެވެ.

އުރުވަޝީ ބުނާގޮތުން އޭނަގެ ފޯނުގައި 24 ކެރެޓުގެ ރަން ހުންނާނެ އެވެ. އެހެންކަމުން އޭނަގެ ފޯނު ހޯދުގައި އެހީތެރިވުމަށް އޭނާ ވަނީ ސަޕޯޓަރުން ކައިރިން އެދިފަ އެވެ. އޭނާގެ ފޯނު ހޯދާ ފަރާތަކަށް ހާއްސަ އިނާމެއް އޮންނާނެ ކަމަށް ވެސް އުރުވަޝީ ވަނީ ބުނެފަ އެވެ.

އުރްވަޝީ މިހެން ޕޯސްޓް ކުރުމާއި އެކު އާއްމުންގެ ގިނަ ބަޔަކު އަންނަނީ އޭނާއަށް ފާޑު ކިޔަމުންނެވެ. އެގޮތުން ފޯނު ގެއްލުނީ އޭނާގެ ފަރުވާކުޑަކަމުން ކަމަށް ވެސް ގިނަ ބަޔަކު ވަނީ ބުނެފަ އެވެ. އަދި ބައެއް މީހުން ބުނާ ގޮތުގައި މި މެޗް އޮތް ދުވަހު އިތުރު ބައެއްގެ ފޯނުތައް ވެސް ވަނީ ގެއްލިފަ އެވެ.

ސަނީ ޑިއޯލާއެކު 2013 ގައި ފިލްމު "ސިންގް ސާ ސާބް ދަ ގްރޭޓް" އިން ބޮލީވުޑަށް ނުކުތް އުރްވަޝީ ވަނީ ގިނަ ފިލްމުތަކެއް ކުޅެފަ އެވެ.

އުރްވަޝީ ކުޅުނު ފިލްމުތަކުގެ ތެރޭގައި ސަނަމް ރޭ (2016)، ގްރޭންޑް ގްރޭންޑް މަސްތީ (2016) އަދި (2019) އަހަރު ނެރުނު "ހޭޓް ސްޓޯރީ" ހިމެނެ އެވެ.