އިޒްރޭލުގެ މީހުން ރާއްޖެއަށް ދަތުރު ނުކުރުމަށް އެ ގައުމުގެ ފޮރިން މިނިސްޓްރީން އަންގައިފި އެވެ.

އިޒްރޭލުގެ ފޮރިން މިނިސްޓްރީން ނެރުނު އިންޒާރުގެ މެސެޖްގައި ބުނީ އިޒްރޭލާ ދެކޮޅު ޝުއޫރުތައް ރާއްޖޭގައި މި ދުވަސްވަރު އިންތިހާއަށް އިތުރުވެފައިވާ ކަމަށެވެ. އެހެންވެ، މި ދަނޑިވަޅުގައި އިޒްރޭލުގެ މީހުން ރާއްޖެ އަށް މި ވަގުތު ދަތުރު ނުކުރުމަށް އެ ބަޔާނުގައި އެ ގައުމުގެ ސަރުކާރުން އެދިފައިވެ އެވެ.

ހައްދުފަހަނައަޅާފައިވާ އިޒްރޭލުން އެގޮތަށް ބުނި އިރު، ދިވެހިން ތިބީ ފަލަސްތީނުގެ ރައްޔިތުންނާ އެކުގަ އެވެ. ފަލަސްތީނަށް ތާއީދުކޮށް އަދި އިޒްރޭލުން ދެމުން އަންނަ އުދުވާނީ ހަމަލާތަކާ ގުޅިގެން މިދިޔަ ހުކުރު ދުވަހު މާލެ އާއި ރާއްޖޭގެ އެކިކަންކޮޅުތަކުގައި ވަނީ އެއްވުންތައް ބާއްވައިފަ އެވެ.

އަދި މިރޭ ވެސް އިޒްރޭލާ ދެކޮޅަށް މާލޭގައި އެއްވުންތަކެއް ބާއްވަން ވަނީ ނިންމައިފަ އެވެ.

ފަލަސްތީނަށް އިސްރާއިލުން ދެމުންގެންދާ އިންސާނިއްޔަތުކަމެއް ނެތް ހަމަލާތަކުގެ ސަބަބުން ދިވެހީން ވަނީ ވަރަށް ބޮޑަށް ހިތްހަމަނުޖެހިފަ އެވެ.

ދިވެހިން، ފަލަސްތީނު ރައްޔިތުންނަށް ހަދިޔާ ކުރާ ފައިސާ ފޯރުކޮށްދިނުމުގައި އެންމެ އިސްކޮށް ހަރަކާތްތެރިވަނީ އިންޓަނޭޝަނަލް އެއިޑް ކެމްޕެއިން (އައިއޯސީ) އިންނެވެ. އެ ޖަމިއްޔާއިން އެންމެ ފަހުން ބުނެފައިވާ ގޮތުން ފަލަސްތީނު ފަންޑަށް ރާއްޖެއިން ވަނީ 15 މިލިއަން ރުފިޔާގެ އެހީ ލިބިފަ އެވެ.

އިސްރާއިލުން ފަލަސްތީނުގެ ޣައްޒާ އަށް ވަރުގަދަ ހަމަލާތަކެއް ދޭން ފެށީ މި މަހުގެ 7 ވަނަ ދުވަހުން ފެށިގެންނެވެ. މި ހަނގުރާމަ އަށް ދެ ހަފްތާ ވާން ކައިރިވެފައިވާ އިރު، ހަނގުރާމަ ހުއްޓިދާނެ ކަމުގެ އެއްވެސް ކޮޅުމައްޗެއް ނުފެނެ އެވެ.