އިސްރާއީލުން ފަލަސްތީނުގެ ޣައްޒާ އަށް ދެމުން އަންނަ ވަރުގަދަ ހަމަލާތަކާ ދެކޮޅަށް "ރައިޓް މޫވްމަންޓް" ގެ ފަރާތުން މިރޭ މާލޭގައި ބާއްވަން ހަމަޖެއްސި ސައިކަލް ބުރާއި އެއްވުން އެހެން ރެއަކަށް ފަސްކޮށްފި އެވެ.

ފަލަސްތީނު ރައްޔިތުންނާ އެކުގައި ތިބި ކަން ހާމަކުރުމުގެ ގޮތުން ސައިކަލް ބުރު ފެށުމަށް ހަމަޖެހިފައި އޮތީ މިރޭ 8:00 ގައި ރަސްފަންނު ސަރަހައްދުންނެވެ. ސައިކަލް ބުރު ނިންމާލުމަށް ހަމަޖެހިފައި އޮތީ އާޓިފިޝަލް ބީޗަށެވެ. އާޓިފިޝަލް ބީޗުގައި ހާއްސަ އެއްވުމެއް މިރޭ 9:00 ގައި ބޭއްވުމަށް ވެސް ރޭވި އެވެ.

އެކަމަކު، ރައިޓް މޫވްމަންޓުން ބުނީ މޫސުން ދައްކާ ގޮތުންނާއި ލަފާ ކުރާ ގޮތުން އަދި އިންތިޒާމް ކުރުމުގައި ހަރަކާތްތެރިވާ ގިނަ ބޭފުޅުންގެ މަޝްވަރާގެ މަތިން މި ހަރަކާތްތައް އެހެން ރެއަކަށް ފަސްކޮށްފައިވާ ކަމަށެވެ. އަދި މި ހަރަކާތް ކުރިޔަށް ދާނެ ދުވަހަކާއި ވަގުތަކާއި ތަނެއް ވީހާވެސް އަވަހަކަށް އިއުލާން ކުރާނެ ކަމަށް ބުނެފައިވެ އެވެ.

ރައިޓް މޫވްމަންޓުން ދަނީ އިސްރާއީލް މީހުން ރާއްޖެ އައުން ހުއްޓުވުމަށް ގޮވާލައި މިދިޔަ ހަފުތާ އިން ފެށިގެން ޕެޓިޝަނެއްގައި ސޮއިކުރަމުންނެވެ.

އެ ޖަމިއްޔާ އާއި އެހެން ޖަމިއްޔާތައް އަދި ކްލަބުތައް ގުޅިގެން ރައިޓް މޫވްމަންޓުން ވަނީ މީގެކުރިން މާލޭގައި ބޮޑު ހިނގާލުމެއް ވެސް ބާއްވައިފަ އެވެ.

އިސްރާއީލްގެ ހަމަލާތަކުގައި ފަލަސްތީނުގެ 9,227 މީހަކު ވަނީ ޝަހީދުވެފަ އެވެ. އޭގެ ތެރޭގައި އޭގެ ތެރޭގައި 3,826 ކުޑަކުދިންނާއި 2,405 އަންހެނުން ހިމެނެ އެވެ. އަދި 32,516 މީހަކަށް އަނިޔާވެފައިވާއިރު އޭގެ ތެރޭގައި ވެސް ގިނަ އަދަދެއްގެ އަންހެނުންނާއި ކުޑަކުދިން ހިމެނެ އެވެ.