ކައުންސިލަރުންގެ މުސާރަ ބޮޑު ކުރުމުގެ ކުރިން ކައުންސިލް އިދާރާތަކުގައި މަސައްކަތް ކުރާ އިދާރީ މުވައްޒަފުންގެ މުސާރަ ބޮޑު ކުރަން ޖެހޭ ކަމުގައި ސިވިލް ސާވިސް ކޮމިޝަން (ސީއެސްސީ) ގެ ނައިބު ރައީސް އިބްރާހިމް ރަޝީދު ވިދާޅުވެއްޖެ އެވެ.

އިބްރާހިމް ރަޝީދު އެގޮތަށް ވިދާޅުވެފައިވަނީ ކައުންސިލްތަކުގެ ރައީސް ހިމެނިވަޑައިގަންނަވާ ގޮތަށް ކައުންސިލް މެމްބަރުންގެ މުސާރަ ބޮޑު ކުރަން ރައްޔިތުންގެ މަޖިލިހުގެ ލާމަރުކަޒީ ކޮމިޓީން މަޖިލިހުގެ ބަޖެޓް ދިރާސާ ކުރާ ކޮމިޓީ އަށް ލަފާ ދީފައި ވަނިކޮށެވެ.

ސީއެސްސީގެ ނައިބު ރައީސް އިބްރާހިމް ރަޝީދު ފޭސްބުކްގައި ކުރެއްވި ޕޯސްޓެއްގައި ވިދާޅުވީ ކައުންސިލަރުންގެ މުސާރަ ބޮޑު ކުރުމުގެ ކުރިން ކައުންސިލް އިދާރާތަކުގައި މަސައްކަތް ކުރާ އިދާރީ މުވައްޒަފުންގެ މުސާރަ ބޮޑު ކުރަން ޖެހޭ ކަމަށެވެ.

ސްޕެޝަލް ޑިއުޓީ އެލަވަންސްގެ ނަމުގައި %35 ކައުންސިލްތަކުގެ އިދާރީ މުވައްޒަފުންގެ މުސާރަ އަށް އިތުރުވެގެން ދިޔަކަމުގައި ވިޔަސް މި އެލަވަންސްގެ ސަބަބުން އިދާރީ މުވައްޒަފުން ގެއަށް ގެންދާ މުސާރައަށް މާ ބޮޑު ކުރިއެރުމެއް ލިބިފައި ނުވާ ކަމަށް އޭނާ ވިދާޅުވި އެވެ.

ލާމަރުކަޒީ ކޮމިޓީން ބަޖެޓު ކޮމިޓީ އަށް ލަފާ ދީފައި ވަނީ ކައުންސިލް ރައީސްގެ މުސާރަ 25،000ރ. އަށް ހެދުމަށާއި ނައިބު ރައީސުންގެ މުސާރަ 20،000ރ. އަދި ކޮންމެ މެމްބަރަކަށް 18،000ރ. ދިނުމަށެވެ.

މިހާރު ކައުންސިލް ރައީސްގެ މުސާރައަކީ މަހަކު 20،000ރ.އެވެ. ކައުންސިލްގެ ނައިބު ރައީސަށް މަހަކު، 15000ރ. ލިބޭއިރު މެމްބަރަކަށް ލިބެނީ 12،000ރ. އެވެ.