ޑާކް ރެއިން އެންޓަޓެއިންމަންޓް އިން ގެނެސްދިން "ފުރޭތަ" މިމަހުގެ 30 ވަނަ ދުވަހު މީޑިއާނެޓުގެ ވީޑިއޯ ކްލަބަށް އަންނަން ތައްޔާރުވެއްޖެ އެވެ.

މިދިޔަ މާޗް މަހުގެ ހަތް ވަނަ ދުވަހު އޮލިމްޕަހުގައި ރިލީޒްކުރި "ފުރޭތަ" އަކީ މިހާރު އަހަރުމެންގެ މުޖުތަމައުގައި ފެނިގެންދާ މައްސަލައަކަށް އަލިއަޅުވާލާފައިވާ ފިލްމެކެވެ.

މިފިލްމުގެ ނަމުން ބިރުވެރިއަސް މިފިލްމަކީ ބިރުވެރި ފިލްމެއް ނޫންނެވެ.

"ފުރޭތަ"އިގެ ޕްރޮޑިއުސަރަކީ މުހައްމަދު އަލީ (މޮގާ) އެވެ. ޑައިރެކްޓްކޮށްފައިވަނީ އަލީ ޝިފާއު (ޗިއްޕެ) އެވެ. މި ފިލްމް ބިނާކޮށްފައިވަނީ އަހުމަދު ތޮލާލް ލިޔެފައިވާ ސްކްރީންޕްލޭ އަކަށެވެ.

މިފިލްމު މީޑިއާނެޓުގެ ވީޑިއޯ ކްލަބުން ޕްރިމިއާ ކުރުމަށް ހަމަޖެހިފައިވަނީ މިމަހުގެ 30 ވަނަ ދުވަހު އެވެ.

"ފުރޭތަ" ގެ ކާސްޓްގައި ޝަރަފު އަބްދުﷲ، ރަވީ ފާރޫގް، މުހައްމަދު މަނިކު، އަހުމަދު ސައީދު، އަހުމަދު ރިފްޝާން، އަހުމަދު ނާޝިތު، އަލީ ނަދީހު، އައިމިނަތު އަސީލާ އަދި އާދަމް ރިޒްވީ ހިމެނެ އެވެ.

https://www.instagram.com/p/C7BZ9lOxA71/

"ފުރޭތަ" އަކީ ޑާކް ރެއިނުން މި އަހަރު ގެނެސްދިން ފުރަތަމަ ފީޗާ ފިލްމެވެ. އަދި މި އަހަރު އޮލިމްޕަހުގައި އެޅުވި ހަތަރު ވަނަ ފިލްމެވެ.

މިހާތަނަށް ކާމިޔާބު އެތައް ފިލްމެއް ގެނެސްދީފައިވާ ސްޓޫޑިއޯ އިން ބުނެފައިވާ ގޮތުގައި ދެން އެންމެ އަވަހަށް ބެލުންތެރިންނަށް ގެނެސްދޭނެ ފިލްމަކީ ހޮރޯ-ކޮމެޑީ "ބިބީ" އެވެ. އެކަމަކު އަދި ވަކި ތާރީހެއް އިއުލާނެއް ނުކުރެ އެވެ.