ހުކުރު ދުވަހުގެ ނިޔަލަށް ރާއްޖޭގެ މޫސުން ވަރަށް ބޮޑަށް ގޯސްކަމަށާއި އެހެންވެ ހުރިހާ ފަރާތްތަކުން މޫސުމަށް ސަމާލުވުމަށް މޫސުމާ ބެހޭ ގައުމީ އިދާރާއިން އިލްތިމާސްކޮށްފި އެވެ.

ހުޅަނގު މޫސުން މިމަހުގެ 9 ވަނަ ދުވަހު ފެށުމާއެކު ރާއްޖެއަށް ވަރަށް ބޮޑަށް މޫސުން ވަނީ ގޯސްވެފަ އެވެ. މިހާރު ވެސް މެޓް އޮފީހުން ވަނީ ކޮޅިގަނޑުގައި 60 މޭލަށް ވައިގަދަވާނެ ކަމަށް ލަފާކޮށް ހެނދުނު 6:00 އިން ހެނދުނު 9:00 އަށް އޮރެންޖް އިންޒާރު ނެރެފަ އެވެ. ވަރަށް މަދުން ނޫނީ ނުނެރޭ މި އިންޒާރު ނެރެފައި ވަނީ ބ. އަތޮޅުން ފެށިގެން ވ. އަތޮޅާ ހަމަޔަށެވެ.

މެޓް އޮފީހުން ބުނީ ރާއްޖެއަށް މިހާރު ކުރަމުންދާ ވިއްސާރައިގައި ވަރަށް ބޮޑަށް ވައިގަދަ ކަމަށެވެ. އަދި މި ވިއްސާރައަކީ ހުޅަނގު މޫސުމުގެ ބާރު ރާއްޖޭގެ ސަރަހައްދުގައި ގަދަވުމުގެ ސަބަބުން ކުރަމުންދާ ވިއްސާރައެއް ކަމަށް އެ އޮފީހުން ބުނެ އެވެ.

މެޓް އޮފީހުން ބުނީ ބޭއޮފް ބެންގޯލް ސަރަހައްދުގައި ކޮޅިގަނޑެއް އުފެދުމާ ގުޅިގެން ކުރިއަށް އޮތް ތިން ދުވަހު ވެސް ރާއްޖެއަށް މޫސުން ވަރަށް ބޮޑަށް ގޯސްވާނެ ކަމަށެވެ. އަދި މި ކޮޅިގަނޑު މިއަދު އިތުރަށް ބާރުގަދަވެގެންދާނެ ކަމަށް ލަފާކުރެވޭ ކަމަށް ވެސް އެ އޮފީހުން ބުނެ އެވެ.

މެޓް އޮފީހުން ބުނިގޮތުގައި މި ކޮޅިގަނޑު ބޭއޮފް ބެންގޯލްގެ މެދުތެރެއަށް ދަތުރުކުރާނެ ކަމަށް ލަފާކުރެވެނީ މިމަހުގެ 24 ވަނަ ދުވަހު އެވެ.

މި ކޮޅިގަނޑާ ގުޅިގެން އުފެދިފައިވާ ލޯ ޕްރެޝާ ޓްރަފް ރާއްޖެ ސަރަހައްދުގައި ހުރުމާއެކު ވަރަށް ބޮޑަށް ވައިގަދަވެ، މޫސުން ގޯސްވެފައިވާ ކަމަށް އެ އޮފީހުން ބުނެ އެވެ. އެހެންވެ މި ކޮޅިގަނޑުގެ ވައި އަދިވެސް އިތުރަށް ބާރުގަދަ ވާނެ ކަމަށް ލަފާކުރެވޭތީ ކުރިއަށްއޮތް ތިން ދުވަސް މުޅި ރާއްޖެއަށް ހާއްސަކޮށް އުތުރާއި މެދު ރާއްޖެތެރޭގައި މޫސުން ވަރަށް ބޮޑަށް ގޯސްވާނެ ކަމަށް މެޓް އޮފީހުން ބުނެ އެވެ.

އެ އޮފީހުން ބުނީ އެވްރެޖްކޮށް 17 މޭލާއި 27 މޭލާއި ދެމެދުގެ ބާރުމިނެއްގައި ވައިޖެހޭނެ ކަމަށް ލަފާކުރެވޭއިރު ކޮޅިގަނޑުގައި 60 މޭލަށް ވައިގަދަވާނެ ކަމަށް ލަފާކުރެވޭ ކަމަށެވެ.

ކުރިއަށް އޮތް ތިން ދުވަހު މޫސުން ގޯސްވާނެ ކަމަށް ލަފާކުރެވޭތީ ކޮންމެހެން ކުރަންޖެހޭ ދަތުރެއް ނޫނީ ނުކުރުމަށް މޫސުމާ ބެހޭ ގައުމީ އިދާރާއިން އިލްތިމާސްކުރެ އެވެ.