ދެމެހެއްޓިނިވި ތަރައްގީގެ ލަނޑުދަނޑިތައް ހާސިލުކުރުމުގައި ކުދި ޖަޒީރާ ޤައުމުތަކުގެ ތަރައްގީ އަށް ޓަކައި ފަސޭހައިން މާލީ އެހީތައް ލިބޭނެގޮތް ފަހިވާންޖެހޭކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.

ރައީސް މުއިއްޒު މިހެން ވިދާޅުވީ ތަރައްޤީވަމުން އަންނަ ކުދި ޖަޒީރާ ގައުމުތަކުގެ ހަތަރުވަނަ ބައިނަލްއަގްވާމީ ކޮންފަރެންސްގެ އިންޓެރެކްޓިވް ޑައިލޮގް: ރިވިޓަލައިޒިން ސިޑްސް އިކޮނޮމީސް ފޯ އެކްސިލެރޭޓެޑް އެންޑް ސަސްޓެއިނަބަލް ގުރޯތުގައި ކޯޗެއާގެ ހައިސިއްޔަތުން ރިޔާސަތު ބަލަހައްޓައި ދެއްވައި ވާހަކަފުޅު ދައްކަވަމުންނެވެ.

ރައީސްގެ ވާހަކަފުޅުގައި، ބޭރުން އަންނަ ޝޮކްތަކާއި މޫސުމަށް އަންނަ ނޭދެވޭ ބަދަލުތަކުގެ ސަބަބުން ކުރާ އަސަރުތަކާއި އެކަށީގެންވާ މިންވަރަށް ފައިނޭންސް ނުލިބުމާއި ދެމެހެއްޓެނިވި ނޫން ދަރަނި ފަދަ ތަރައްޤީވަމުން އަންނަ ކުދިޖަޒީރާ ގައުމުތަކަށް ކުރިމަތިވާ ގޮންޖެހުންތަކުގެ މައްޗަށް އަލިއަޅުވާލެއްވި އެވެ. އަދި މި ގޮންޖެހުންތަކާ އުނދަގޫތަކުގެ ތެރޭގައި ވެސް ތަރައްޤީވަމުން އަންނަ ކުދި ޖަޒީރާ ގައުމުތަކުން ވިލުންތެރިކަމާއެކު ކުރިޔަށްދާތީ އެމަނިކުފާނު އެކަމަށް ތައުރީފުކުރެއްވި އެވެ. މީގެ އިތުރުން ކޮވިޑް19ގެ އާލަމީ ބަލިމަޑުކަމަކީ ތަރައްޤީވަމުން އަންނަ ކުދިޖަޒީރާ ގައުމުތަކުގެ އިގުތިސާދުތަކުގެ ނާޒުކުކަމާއި ބޭރުން އަންނަ ޝޮކްތަކުން ނުރައްކަލަށް ހުށަހެޅިގެންދާ މިންވަރު ހަނދާން އާކޮށްދޭ ކަމެއްކަމުގައި ރައީސް ވިދާޅުވި އެވެ.

ރައީސް ވިދާޅުވީ މެދުފަންތީގެ އާމްދަނީ ލިބޭ ދަރަޖައަށް ވާސިލުވުމާ އަދި އެއަށްވުރެ ކުރިޔަށްދިއުމުގައި ސިޑްސްއިން ދެމެހެއްޓެނިވި ތަރައްޤީއަށް ކުރާ މަސައްކަތްތައް އިތުރުކުރަން ޖެހޭކަމުގަ އެވެ. ހަމަ އެހެންމެ، ދައުލަތުގެ ގާބިލުކަމާއި އުފެއްދުންތެރިކަމުގެ މުހިންމުކަން ފާހަގަކުރައްވައި އިންސާނީ ވަސީލަތް ތަރައްގީކުރުމާއި އެހެން ވަސީލަތްތަކުގެ ބޭނުން ހިފުމަކީ ވެސް އެހާމެ މުހިންމުކަމެއް ކަމުގައި ރައީސް ވިދާޅުވި އެވެ.

ރައީސް ދެއްކެވި ވާހަކަފުޅުގައި، ކާރިސާތަކަށް ތައްޔާރުވުމަށް ރާއްޖެއިން ކުރަމުންދާ މަސައްކަތްތަކުގެ ތަޖުރިބާ އާއި، ދެމެހެއްޓެނިވި ފަތުރުވެރިކަމުގެ ރޮނގުން ރާއްޖެއިން ހޯދާފައިވާ ކާމިޔާބީގެ މައްޗަށް އަލިއަޅުވާލެއްވި އެވެ. އަދި ވަސީލަތް ތަރައްގީކުރުމާއި ޕާޓްނާޝިޕާއި ކަންކަމަށް ވަކާލާތުކުރުން އަދި ސްޓްރެޓެޖިކް ޕްލޭނިންގެ މުހިންމުކަމުގެ މައްޗަށް ވެސް އެމަނިކުފާނު އަލިއަޅުއްވާލެއްވި އެވެ.

ރައީސްގެ ވާހަކަފުޅުގައި، މާލީ އެހީއަކީ ސިޑްސްއަށް ކުރިމަތިވެފައިވާ އެންމެ ބޮޑު އެއް ގޮންޖެހުންކަން ފާހަގަކުރައްވައި، ތަރައްގީއަށް ޓަކައި ފަސޭހައިން މާލީ އެހީތައް ލިބޭނެގޮތް ފަހިވާންޖެހޭކަމަށާއި އަދި އެގޮތަށް ކުދިޖަޒީރާ ގައުމުތަކަށް އަތްފޯރާފަށުގައި މާލީއެހީތެރިކަން ލިބުމަކީ ނުވަތަ ނުލިބުމަކީ އިންސާފާ ގުޅިފައިވާ ކަމެއްކަން ވެސް އެމަނިކުފާނު ފާހަގަކުރެއްވި އެވެ.

ކޯޗެއާގެ ހައިސިއްޔަތުން އިންޓެރެކްޓިވް ޑައިލޮގްގެ ރިޔާސަތު ބެލެހެއްޓެވުމުގައި ރައީސް ބައިވެރިވެވަޑައިގެންނެވި އެވެ. އަދި އެމަނިކުފާނާއެކު ކޯޗެއާގެ ހައިސިއްޔަތުން ރިޔާސަތު ބެލެހެއްޓެވުމުގައި ދެން ބައިވެރިވެވަޑައިގެންނެވީ މިނިސްޓަ އޮފް ޔޫރަޕިއަން އެފެއާސް އެންޑް އޯނާޝިޕް ޝެއާރިން އޮފް ދަ ރިޕަބްލިކް އޮފް ފިންލޭންޑް، އެންޑަސް އެޑްލަކްރޮއިޓްޒް އެވެ.

މިއީ މި މަހު 27 އިން 30 އަށް އެންޓީގާ އެންޑް ބާބިޔުޑާގައި ކުރިއަށްދާ ސިޑްސް4 ކޮންފަރެންސްގައި ހިމެނޭ ފަސް އިންޓަރެކްޓިވް ޑައިލޮގްގެ ތެރެއިން ފުރަތަމަ ޑައިލޮގެވެ.