ރާއްޖެއިން މިއަހަރު ޙައްޖަށްދާ 1000 ހައްޖާޖީންގެ ތެރެއިން ފުރަތަމަ ގްރޫޕް މިއަދު ހަވީރު ސައުދީއަރަބިއްޔާއަށް ފުރައިފި އެވެ.

ސައުދީއެއާގެ ފްލައިޓަކުން މިއަދު ފުރީ 296 މީހުންނެވެ. މީގެ ތެރޭގައި 25 އެހީތެރިން ވެސް ހިމެނޭ ކަމަށް އިސްލާމިކް މިނިސްޓްރީން ބުނެ އެވެ.

މިއަހަރު ރާއްޖެއިން މީހުން ހައްޖަށް ގެންދިއުމުގެ ހުރިހާ ކަމެއް ގެންދަނީ ސަރުކާރުގެ ކުންފުނި މޯލްޑިވްސް ހައްޖު ކޯޕަރޭޝަނުންނެވެ.

އެ ކުންފުނިން ބުނީ މިއަހަރު މީހުން ހައްޖަށް ގެންދިއުމަށް އިތުރު 3 ފްލައިޓް އަދި ބާއްވާނެ ކަމަށެވެ. އޭގެ ތެރެއިން އެއް ފްލައިޓް އޮންނާނީ ޖޫން 3 ގައި އަދި އަނެއް ފްލައިޓް އޮންނާނީ ޖޫން މަހުގެ 7 ވަނަ ދުވަހުއެވެ. ހައްޖުވެރިންގެ ފަހު ފްލައިޓް ފުރާނީ އަންނަ ޖޫން މަހުގެ 10 ވަނަ ދުވަހު އެވެ.

މިފަހަރު ރާއްޖެއިން ޙައްޖު ކޯޓާ ދިން 1000 މީހުންގެ ތެރޭގައި، ފަގީރުންގެ ދަފްތަރުގައި ހިމެނޭ 50 މީހުން ހިމެނެ އެވެ.

މޯލްޑިވްސް ހައްޖު ކޯޕަރޭޝަނުން ބުނީ ރާއްޖެއާއި ސައުދީގެ އިންތިޒާމްތައް ވެސް ވަރަށް ފުރިހަމައަށް ހަމަޖައްސާފައިވާ ކަމަށެވެ. އެގޮތުން ރާއްޖެއިން ފުރުމާއި، ސަޢުދީ އެއާޕޯޓުން ފެށިގެން ދެން ކުރަން ޖެހޭ ދަތުރުތަކާއި އަދި ތިބުމާ ކެއުމުގެ ހުރިހާ އިންތިޒާމްތައް ވެސް ހަމަޖައްސާފައިވާ ކަމަށް އެ ކުންފުނިން ބުނެ އެވެ.

https://www.hurihaa.mv/gallery/173

ޙައްޖާޖީންނަށް އެހީތެރިކަން ދިނުމަށް ހެލްޕް ޑެސްކާ ހޮޓްލައިނެއް ވެސް ވަނީ ގާއިމުކޮށްފަ އެވެ. މިފަހަރުގެ ހައްޖުގައި ޓްރެކިން ޑިވައިސް ވެސް ބޭނުންކުރާނެ އެވެ. މިއީ ވަކިވަކި ހައްޖާޖީން ތިބި ތަންތަން ވަގުތުން ބަލާލެވެނޭ ޑިވައިސްއެކެވެ.

"ކޮންމެ ޙައްޖާޖީއަކަށް ބޯޑިންއާއެކު ޓްރެކިން ޑިވައިސްގެ ގޮތުގައި، އެމީހެއްގެ ކާޑުގައި އަޅުވަން ޓެގެއް ދޭނެ. އެއިން ވަގުތުން އެ މީހަކު ހުރި ތަނެއް ބަލާލެވޭނެ،" ޙައްޖު ކޯޕަރޭޝަންގެ ހެޑް އޮފް އޮޕަރޭޝަންސް އައިޝަތު ގާހިރު ވިދާޅުވި އެވެ.

ކަލަންޑަރުގައިވާ ގޮތުން މިއަހަރުގެ ހައްޖު ދުވަސް ދިމާވަނީ ޖޫން މަހުގެ 16 ވާ އާދީއްތަ ދުވަހާ އެވެ.