ސަރުކާރުގެ ހަރަދުގައި ހައްޖަށް ގެންދާ މީހުން ފުރައިފި

ސަރުކާރުގެ ޚަރަދުގައި ހައްޖަށް ފޮނުވާ މީހުންގެ ތެރެއިން 48 މީހުން މިއަދު ހައްޖަށް ދިއުމަށް ފުރައިފި އެވެ.

ފަޤީރުންގެ ދަފްތަރުގައި ހިމެނޭ މީހުންގެ ތެރެއިން ސަރުކާރުގެ ޚަރަދުގައި މިދައުރުގެ ތެރޭގައި 1،000 މީހުން ޙައްޖަށް ފޮނުވުމަކީ ރައީސް މުޙައްމަދު މުއިއްޒުގެ ވައުދެކެވެ. އެގޮތުން މިއަހަރު ފޮނުވާ 50 މީހުން ހޮވާފައި ވަނީ ގުރުއަތުން ކަމަށް އިސްލާމިކް މިނިސްޓްރީން ބުނެ އެވެ. މީގެ ތެރެއިން ދެ މީހަކު މިހާރު މައްކާއަށް ގޮސްފަ އެވެ. އަދި ބާކީ ތިބި 48 މީހުން ފުރީ މިއަހަރު ރާއްޖެއިން ހައްޖަށްދާ މީހުންގެ 3 ވަނަ ފްލައިޓްގައި މިއަދު މެންދުރު އެވެ.

އިސްލާމިކް މިނިސްޓްރީން ބުނީ ސަރުކާރުގެ ޚަރަދުގައި ހައްޖަށް ދިޔުމަށް 50 މީހުން ހޮވީ ގުރުއަތުން ކަމަށެވެ. މީގެ ތެރެއިން އެއްވެސް ފަރާތަކުން ހައްޖަށް ދިޔުމަށް އުޒުރުވެރިވާ ހާލަތުގައި އެސްލޮޓުގައި ހައްޖަށް ދާނެ މީހުންގެ 10 ފަރާތެއް ވެސް ގުރުއަތުން ހޮވި ކަމަށް އެ މިނިސްޓްރީން ބުނެ އެވެ. އެގޮތުން މިފަހަރު ފުރަތަމަ ހޮވި 50 މީހުންގެ ތެރެއިން 10 ފަރާތަކުން މިއަހަރު ޙައްޖަށް ދިޔުމަށް އުރުވެރިވުމާއި ގުޅިގެން ލިސްޓުގެ ތަރުތީބުން ރިޒާވްގައި ތިބި 10 މީހަކަށް އެފުރުސަތު ލިބިފައިވާކަމަށް އިސްލާމިކް މިނިސްޓްރީން ބުނެ އެވެ.

އެ މިނިސްޓްރީން ބުނީ ސަރުކާރުގެ ހައްޖަށް ގެންދާނެ މީހުން ކަނޑައެޅުމަށް ފަގީރުންގެ ލިސްޓުގައި މިދިޔަ އަހަރު ތިބި މީހުންގެ ތެރެއިން ޝަރުޠު ހަމަވާ 982 މީހުންނާއި އިންޓަވިއުކޮށްފައިވާ ކަމަށެވެ. އަދި އެމީހުންގެ ތެރޭގައި ޝަރުތު ހަމަވާ 667 މީހުން ތިބި ކަމަށް އެ މިނިސްޓްރީން ބުނެ އެވެ.

ހައްޖަށް ގެންދިޔުމަށް މިއަހަރު ހުރިހާ ކޯޓާއެއް ސަރުކާރުން ދީފައި ވަނީ ހައްޖު ކޯޕަރޭޝަނަށެވެ. އެގޮތުން 1،150 ކޯޓާ ރާއްޖެއަށް ލިބިފައިވާއިރު މިހާތަނަށް 615 ޙައްޖުވެރިން ވަނީ ހައްޖުގެ އަޅުކަން އަދާކުރުމަށް މައްކާއަށް ގޮސްފަ އެވެ. ޖުމްލަ 4 ފްލައިޓުގައި ދިވެހި ޙައްޖުވެރިން ގެންދިޔުމަށް ހަމަޖެހިފައިވާއިރު ތިން ވަނަ ފްލައިޓް މިއަދު އަދި ފަހު ފްލައިޓު މިމަހުގެ 10 ވަނަ ދުވަހު ފުރުމަށް ވަނީ ހަމަޖެހިފަ އެވެ.