މުސްލިމަކާ ކައިވެނި ކުރުމުން ފާޑުކިޔާ ހުރިހާ މީހުންނަށް ބޮލީވުޑްގެ މަޝްހޫރު ތަރި ސޮނާކްޝީ ސިންހާ ވަރުގަދަ ރައްދެއް ދީފި އެވެ.

ސޮނާކްޝީ އޭނާގެ ހިޔާލު ފާޅުކޮށްފައިވަނީ އިންސްޓަގްރާމްގައި ހިއްސާކޮށްފައިވާ އަލަށް ކައިވެނިކުރި އެ ދެމީހުންގެ ކުރެހުމަކަށް ކުރަމުންނެވެ.

"ލޯތްބަކީ އެންމެންގެ ވެސް ދީނެކެވެ." މި ކެޕްޝަންއާއެކު ހިއްސާކޮށްފައިވާ އެ ޕޯސްޓަށް ކޮމެންޓް ކުރަމުން ސޮނާކްޝީ ވަނީ އެއީ ވަރަށް ބޮޑު ތެދެއް ކަމަށް ބުނެ އެ އާޓިސްޓަށް ޝުުކުރު އަދާކޮށްފަ އެވެ.

https://www.instagram.com/p/C8og5phIoBR/?img_index=1

ސޮނާކްޝީ މި ބީދައިން ވާހަކަ ދައްކާފައި މިވަނީ ހިންދޫއަކަށްވެ ހުރެ މުސްލިމެއް ކަމަށްވާ ޒަހީރު އިގްބާލްއާ ކައިވެނި ކުރުމުން ބައެއް މީހުންގެ ނުރުހުން އޭނާއަށް އަމާޒުވެފައިވާ ދަނޑިވަޅެއްގަ އެވެ.

އެގޮތުން އެ ދެމީހުންގެ ކައިވެންޏާ ދެކޮޅަށް އިންޑިއާގެ ބައެއް ހިސާބުތަކުގައި މުޒާހަރާ ކުރަމުން އަންނައިރު ސޯޝަލް މީޑިއާގައި ވެސް ބައެއް މީހުން އަންނަނީ ޝުއޫރު ފާޅު ކުރަމުންނެވެ. މިކަމާހެދި އެ ދެމީހުންވަނީ ކައިވެނި ފޮޓޯތަކުގެ ކޮމެންޓް ސެކްޝަން ވެސް އޮފްކޮށްފަ އެވެ.

ފިލްމު "ޑަބަލް އެކްސެލް"ގެ ސެޓުން ބައްދަލުވެ ހަތް އަހަރު ދުވަސް ވަންދެން ރައްޓެހިވެގެން އުޅުމަށްފަހު ސޮނާކްޝީއާއި ޒަހީރު ކައިވެނިކުރީ 23 ޖޫން ވަނަ ދުވަހު ބޭއްވި ކޯޓު ކައިވެންޏެއްގަ އެވެ.