ފަލަސްތީނަށް އެހީވުމަށް ރާއްޖެ އިން 1.29 މިލިއަން އެމެރިކާ ޑޮލަރަށް ވުރެ ބޮޑު އަދަދެއްގެ އެހީ ހަދިޔާކުރުމަށް ނިންމައިފި އެވެ.

މިކަން ހާމަކުރެއްވީ އދ.ގެ މައި މަރުކަޒުގައި ހުކުރު ދުވަހު ކުރިއަށްދިޔަ "އަންރުވާ ޕްލެޖިން ކޮންފަރަންސް" ގައި އެވެ. ދިވެހިރާއްޖޭގެ ފަރާތުން މިކަން ހާމަކުރެއްވީ ދިވެހިރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. އަލީ ނަސީރު މުހައްމަދެވެ. މި އެހީ ހަދިޔާކުރުމަށް ހަމަޖެހިފައިވަނީ "އަންރުވާ" ފަންޑު މެދުވެރިކޮށެވެ.

ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސް - އަންރުވާ ފަންޑަކީ އދ.ގެ މަޖިލީހުން 1948 ވަނަ އަހަރު ފާސްކުރި ޤަރާރަކުން އުފައްދާފައިވާ ފަންޑެކެވެ.

"އަންރުވާ ޕްލެޖިންގް ކޮންފަރަންސް" ގައި ރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. އަލީ ނަސީރު މުހައްމަދު ދެއްކެވި ވާހަކަފުޅުގައި ކޮންމެ އަހަރަކު ރާއްޖެއިން އަންރުވާއަށް ދެމުން އަންނަ 5،000 އެމެރިކާ ޑޮލަރުން 50،000 އެމެރިކާ ޑޮލަރަށް އިތުރުކުރުމަށް ސަރުކާރުން ނިންމާފައިވާކަން ހާމަކުރެއްވި އެވެ.

ސަރުކާރުގެ އިސްނެންގެވުމާއެކު "ފަލަސްޠީނާއެކު ދިވެހީން" މި ނަމުގައި ޤައުމީ ފެންވަރުގައި ބޭއްވި ޓެލެތޯނުން ލިބިފައިވާ 18.4 މިލިޔަން ރުފިޔާ އަދި 49,800 އެމެރިކާ ޑޮލަރު ފަލަސްތީނު ރައްޔިތުންނަށް އެހީގެ ގޮތުގައި ފޮނުވަން ނިންމާފައި ވާކަން ދާއިމީ މަންދޫބު ފާހަގަކުރެއްވި އެވެ.