ފެނަކަ ކޯޕަރޭޝަނުން ދޯންޏެއް ނުއަގުގައި ކުއްޔަށް ނެގި ކަމަށް ސޯޝަލް މީޑިއާގައި ދައުރުވަމުންދާ ވާހަކަތައް އެ ކުންފުނިން ދޮގުކޮށްފި އެވެ.

ފެނަކައިން އިއްޔެ ނެރުނު ނޫސްބަޔާނެއްގައި ބުނީ ސޯޝަލް މީޑިއާގައި ދައުރުވަމުންދާ ވާހަކަތަކަކީ އެކި ތާރީހުތަކުގައި ތަފާތު ބޭނުންތަކަށް ކޮށްފައިވާ މުއާމަލާތްތަކެއްގެ ލިޔެކިޔުންތަކުން ބައެއް ނަކަލު ކޮށްގެން އެއީ އެއް ކަމަކަށް ކޮށްފައިވާ އެއް މުއާމަލާތެއް ކަމަށް ދައްކަން މައްސަކަތްކޮށް ދައްކަމުން އަންނަ ވާހަކަތަކެއް ކަމަށެވެ.

އެ ދޮގު ވާހަކަތަކަކީ ކުންފުންޏަށް ހިދުމަތް ފޯރުކޮށްދޭ ފަރާތްތަކުގެ އިތުރުން ކުންފުނިން ހިދުމަތް ފޯރުކޮށްދޭ ފަރާތްތަކުގެ އިތުބާރު އަލުން ހޯދުމަށް ކުރަމުންދާ މަސައްކަތްތަކަށް ހުރަސް އެޅުމަށް ދައްކާފައިވާ ވާހަކަތަކެއް ކަމަށް ފެނަކަ އިން ބުނެ އެވެ.

ފެނަކަ އިން ބުނީ ފާއިތުވެދިޔަ ހަތް މަސް ތެރޭގައި ކުންފުނީގެ މިހާރުގެ މެނޭޖްމަންޓުން އެ ކުންފުނީގެ ޕްރޮކިއުމަންޓްގެ މުއާމަލާތްތައް ހަރުދަނާކޮށްފައިވާ ކަމަށެވެ. ފާއިތުވި ދުވަސްތަކުގައި ވަކި ދަތުރުތަކަށް ދޯނި ފަހަރު ނަގާ، އެވަރެޖް ގޮތެއްގައި ހަތް މިލިއަން ރުފިޔާ މަހެއްގެ މައްޗަށް ދަތުރުފަތުރަށް ހަމަޖައްސައި، އެކަމުގެ ނާޖާއިޒު ފައިދާ ނަގާފައި އޮތްއޮތުން ވެސް މިހާރު ނިމުމަކަށް ގެނެސްފައިވާނެ ކަމަށްވެސް އެ ކުންފުނިން ބުނެފައިވެ އެވެ.

މިފަދަ ދޮގު ވާހަކަތައް ފެތުރުމަކީ އެ ކުންފުނީގެ ސާފުވަމުންދާ ނަން ކިލަނބުކޮށް، މިނިވަން ނޫސްވެރިކަމުގެ ދަށުގައި ތިބެ، މުޖުތަމައު ފަސާދަ ކުރުމަށް ރޭވިގެން ހިންގާ ސިލްސިލާ ތަކުގެ ތެރެއިން ކުރިއަށްދާ ކަމެއްކަމަށް ފެނަކަ އިން ވަނީ ތުހުމަތުކޮށްފަ އެވެ.