މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ގައުމީ މަޖިލީހަށް އިންތިހާބުވެވަޑައިގެންނެވި މެމްބަރުންނާއެކު އެޕާޓީއަށް ކުރިއެރުން ލިބުމަށް އެދޭކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ހުކުރު ދުވަހު އެމްޑީޕީގެ ގައުމީ މަޖިލީހުގެ ބައިލެކްޝަން ވަނީ ބާއްވާފަ އެވެ.

މިކަމާއި ގުޅިގެން ރައީސް ސޯލިހް ވިދާޅުވީ އެމްޑީޕީގެ އެތެރޭގެ އިންތިހާބުން ޕާޓީގެ ގައުމީ މަޖިލީހަށް ހޮވިވަޑައިގަތް ހުރިހާ ފަރާތްތަކަށް ވަރަށް ހޫނު މަރުހަބާއެއް ދަންނަވާ ކަމަށެވެ.

"އަޅުގަނޑުގެ އުއްމީދަކީ މިއަދު ދާއިރާތަކަށް ހޮވިވަޑައިގަތް ބޭފުޅުންގެ ފަރާތުން އާރޫހަކާއެކު ރަނގަޅު މަސައްކަތްތަކެއް ކުރެވި ޕާޓީއަށް އިތުރު ކާމިޔާބީ އާއި ކުރިއެރުން ލިބިގެން ދިޔުން،" އެ މަނިކުފާނު ވިދާޅުވި އެވެ.

ހުކުރު ދުވަހު މެންދުރުފަހު ބޭއްވި އެ ޕާޓީގެ ގައުމީ މަޖިލީހުގެ ހުސްވެފައިވާ 21 ދާއިރާއަކަށް މެންބަރުން ވަނީ އިންތިހާބުކޮށްފަ އެވެ.

އިންތިހާބުގައި ގިނަ ދާއިރާތަކަކަށް އަންހެން މެންބަރުން އިންތިހާބުވެވަޑައިގެންފައިވާތީ އެމްޑީޕީގެ ޗެއަރޕަރސަން ފައްޔާޒު އިސްމާއިލް އެކަން ފާހަގަކުރައްވާ ވިދާޅުވީ އެއީ ޕާޓީއަށް ލިބިގެންދިޔަ ބޮޑު ކުރިއެރުމެއް ކަމަށެވެ.

އެމްޑީޕީ މާލެ ދާއިރާގެ ރައީސްކަން ބޮޑު ތަފާތަކުން ކާމިޔާބު ކުރެއްވީ މާލެ ސިޓީ މޭޔަރު އާދަމް އާޒިމް އެވެ. ގަލޮޅު އުތުރު ދާއިރާގެ ރައީސްކަމަށް ކުރީގެ ޑިފެންސް މިނިސްޓަރު މާރިޔާ ދީދީ ވަނީ އިންތިހާބުވެވަޑައިގެންފަ އެވެ.

ރާއްޖޭގައި އެންމެ ފުރަތަމަ ރަޖިސްޓްރީކުރި ސިޔާސީ ޕާޓީ، އެމްޑީޕީގެ ގައުމީ މަޖިލީހުގައި ހިމެނެނީ ޕާޓީގެ ޗެއާޕާސަން، ރައީސް، ޕާލިމަންޓްރީ ގްރޫޕުގެ މެންބަރުން، ދާއިރާތަކުގެ ރައީސުން، ޗެއާޕާސަންގެ ނައިބު (އިދާރީ) އާއި ޗެއާޕާސަންގެ ނައިބު (މާލީ)، ޒުވާނުންގެ ހިތްވަރުގެ ރައީސް އަދި އިސްލާމީ މަޝްވަރާ މަޖިލީހުގެ ރައީސް އެވެ.