ސަރުކާރުން މިހާތަނަށް އަޅާފައިވާ ފިޔަވަޅުތަކާއެކު ހަ މަސް ދުވަހުގެ ތެރޭގައި 16 ބިލިއަން ރުފިޔާ ސަލާމަތް ކުރެވިފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން ސައީދު ރޭ ވިދާޅުވީ ރައީސް މުހައްމަދު މުއިއްޒު، ސަރުކާރާ ހަވާލުވިއިރު މާލީ ގޮތުން ރާއްޖެ އޮތީ އިނދަޖައްސާލާފައި ކަމަށެވެ. އަދި މާލީ ނިޒާމު ބެލެހެއްޓުމުގައި ހަދާފައިވާ ގޯސްތަކުގެ ސަބަބުން ބޮޑެތި ގެއްލުންތަކެއް ލިބިގެންގޮސްފައިވާ ކަމަށް އޭނާ ވިދާޅުވި އެވެ. އެ ގޮތުން ތިން އަހަރު ތެރޭ 8 ބިލިއަން ރުފިޔާ ޗާޕުކޮށް ކުރަން ނުޖެހޭ އެތަކެއް ޚަރަދުތަކެއް އޭރު ކޮށްފައިވާ ކަމަށް ވެސް ސައީދު ވިދާޅުވި އެވެ.

ރާއްޖޭގެ ދިގު ތާރީޚުގައި ވެސް ނުއުފެއްދޭ ވަރުގެ ދަރަންޏެއް އެންމެ ފަސް އަހަރު ތެރޭގައި އުފައްދާފައިވާކަން ވެސް އޭނާ ފާހަގަކުރެއްވި އެވެ. މިއިން އެއްވެސް ދަރަންޏަކުން އާމްދަނީ އިތުރުކުރެވޭނެ އެއްވެސް މަސައްކަތެއް ކޮށްފައިނުވުމުގެ އިތުރަށް ސަރުކާރު ހިއްސާވާ ކުންފުނިތައްވެސް ދަރުވާލާފައިވާ ކަމަށް އޭނާ ވިދާޅުވި އެވެ.

ސައީދު ވިދާޅުވީ ސަރުކާރުން އަޅާފައިވާ ފިޔަވަޅުތަކާއެކު މިއަހަރު މިހާތަނަށް 16 ބިލިއަން ރުފިޔާ ސަލާމަތްކޮށްފައިވާ ކަމަށެވެ.

"މިހުރިހާ ކަމަކާއެކުވެސް މި ދިޔަ ހަ މަސް ދުވަހުގެ ތެރޭގައި އަޅުގަނޑުމެން ސޯޅަ ބިލިއަން ރުފިޔާ ސަލާމަތްކޮށްފިން. އަދި ދަރަނި ދެއްކުމަށް އޮތް ސޮވެރިން ފަންޑުގައި މިހާރު ފަސްދޮޅޮސް މިލިއަން ޑޮލަރު އެބަހުރި،" ސައީދު ވިދާޅުވި އެވެ.

އޭނާ ވިދާޅުވީ ނިމިދިޔަ ސަރުކާރުން ނަގާފައިވާ ދަރަނިތައް ދެއްކުމަށް ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން އިގްތިސޯދު ސިންދަފާތުކޮށް އާމްދަނީ އިތުރުކުރުމުގެ މަސައްކަތުގެ ދަށުން ޑިވެލޮޕްމެންޓް ބޭންކުގެ މަސައްކަތްތައް ދާދި އަވަހަށް ފަށާނެކަން ފާހަގަކުރެއްވި އެވެ. އަދި ފުނަދޫގެ ފައިނޭންޝަލް ސެންޓަރެއް ގާއިމުކުރުމުގެ މަސައްކަތް ނުހުއްޓި ބާރަށް ކުރިއަށްދާ ކަމަށާއި، އުތުރުގެ ބަންކަރިން ޚިދުމަތް މިއަންނަ މަހުގެ 12 ވަނަ ދުވަހު، ފެށޭނެ ކަމަށް ވެސް ސައީދު ވިދާޅުވި އެވެ.

އޭނާ ވިދާޅުވީ މިކަންކަމުގެ ސަބަބުން އިގްތިސޯދީ ކުރިއެރުން މިހާރު ލަފާ ކޮށްފައިވާ ވަރަށް ވުރެ، ބޮޑަށް ކުރިއާރާނެ ކަމަށެވެ. އަދި ސަރުކާރުން މިހުރިހާ ކަމެއް ކުރަމުންދާއިރު ވެސް އެއްވެސް ދަރަންޏެއް ޑިފޯލްޓުވެފައި ނުވާ ކަމަށް ސައީދު ވިދާޅުވި އެވެ.

"މިދަރަނި އަދާކުރަން ޖެހޭތީ ނޫންތޯ މިހުރިހާ ކަމެއް ކުރަނީ. އަދި މިހާތަނަށް އެންމެ ޕޭމަންޓެއް ވެސް ޑިފޯލްޓް ނުވޭ. އަދި ކާޑު އެތެރެކޮށް މިހާތަނަށް ކޮށްފައި ހުރި ހުރިހާ ކަމަކާއި ޑީލް އެބަކުރެވޭ،" އޭނާ ވިދާޅުވި އެވެ.