މިހާ އަވަހަށް ރައްޔިތުންގެ އިތުބާރު ގެއްލުނު ވެރިކަމެއް ފާއިތުވި ސަތާރަ އަހަރުވެސް ދެކެވަޑައިނުގަންނަވާކަމަށް ރައްޔިތުން މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

އައްބާސް މިހެން ވިދާޅުވީ މިއަދު އެކްސްގައި ކުރެއްވި ޕޯސްޓެއްގަ އެވެ. އޭނާ ވިދާޅުވީ ރައީސް މުހައްމަދު މުއިއްޒަށް ދެވަނަ ދައުރެއް ދޭންޖެހޭ ކުޑަވެސް ސަބަބެއް ފެންނަން ނެތްކަމަށެވެ.

މީގެ އިތުރުން އޭނާ ވިދާޅުވީ ފަންސަވީސް ރަށަށް ދަތުރު ކުރެވުނުއިރު ސަރުކާރު ރަނގަޅޭ ބުނި އެއްވެސް މީހަކާ ދިމާނުވިކަމީ ހިތާމަކުރައްވާ ކަމެއް ކަމަށެވެ.

"ފަށާފައި ހުރި ހުރިހާ ޕްރޮޖެކްޓެއް ހުރީ ހުއްޓިފަ، އަލުން އާ ކަމެއް ނުކުރެވުނުތާންގަ ސަރުކާރަށް ނިސްބަތްވާ ކުންފުނިތަކުގެ މުވައްޒަފުން ގެ މުސާރަ އާއި އިނާޔަތް ކުޑަކުރުމުގެ ސަބަބުން އާއިލާތައް މިވަނީ ވަރަށް ބޮޑަށް ނިކަމެތިވެފަ" އޭނާ ވިދާޅުވި އެވެ.

އުންމީދު ކުރައްވަނީ ކުރިއަށް އޮތް ދުވަސްތަކުގައި ކަންކަން ހަމައަކަށް އެޅި ރައްޔިތުން އެދޭ ގޮތަށް ވެރިކަން ކުރެއްވުން ކަމަށް އޭނާ ވިދާޅުވި އެވެ.

އައްބާސް އަކީ އެމްޑީއޭގެ ޓިކެޓްގައި މަޖިލީހަށް އިންތިހާބު ވަޑައިގެންނެވި ނަމަވެސް ސަރުކާރަށް ތާއީދުކުރެއްވި ބޭފުޅެކެވެ. ނަމަވެސް މިހާރު ގެންދަވަނީ ވަރަށް ބޮޑަށް ސަރުކާރަށް ފާޑު ވިދާޅުވަމުންނެވެ.

"ބިނާ ކުރަނިވި ފާޑު ކިއުންތަކާއެކު ރައްޔިތުންގެ ހެވާ ލާބަ އަށް ސަރުކާރަށް އެއްބާރުލުން ދެމުން ދާނީ. އިންޝާ ﷲ" އޭނާގެ ޕޯސްޓް ނިންމާލައްވަމުން ވިދާޅުވި އެވެ.