މަޝްހޫރު ރެޕް ލަވަކިޔުންތެރިޔާ ކާންޔޭ ވެސްޓްއާއި އޭނާގެ އަންހެނުން ބިއަންކާ ސެންސޯރީ ވެސް އެންމެ ފަހުން ވަރިވެއްޖެ ކަމަށް ހަބަރުތައް ބުނަން ފަށައިފި އެވެ.

މި އަޑުތައް މީޑިއާގައި ފެތުރެން ފަށާފައި މިވަނީ އުމުރުން 47 އަހަރުގެ ކާންޔޭއާއި 29 އަހަރުގެ ބިއަންކާ އެކުގައި ނުފެންނަތާ ގިނަ ދުވަސްތަކެއް ވެފައި ވަނިކޮށެވެ.

އެ ދެމީހުންނާ ގާތް ފަރާތަކާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި ކާންޔޭއާއެކު އޮތް ގުޅުމަށް ބިއަންކާގެ އާއިލާއާއި ރަހުމަތްތެރިން ވެސް ނުރުހުންވެ އެވެ.

އެހެން ކަމުން މި ދުވަސްވަރު ބިއަންކާ އުޅެނީ ކާންޔޭއާ ވަރަށް ދުރުދުރުން ކަމަށާއި ވަރިއާމެދު ވިސްނަމުން އަންނަ ކަމަށް އެ ފަރާތުން މީޑިއާއަށް މައުލޫމާތު ދީފައިވެ އެވެ.

އަނެއްކޮޅުން ކާންޔޭގެ ބުރަ މަސައްކަތްތައް ހުންނަ ގޮތުން އޭނާގެ ކައިވެންޏާމެދު ވިސްނަން ފުުރުސަތު ނުލިބޭ ކަމަށް ވެސް ބުނެފައިވެ އެވެ.

މިބީދައިން މީޑިއާގައި ދެކެވޭ ވާހަކަތައް ގިނަވަމުން އަންނަ ނަމަވެސް އެ ދެތަރިންކުރެ އެކަކުވެސް އެކަމާ ބެހޭގޮތުން މީޑިއާއަށް އެއްވެސް މައުލޫމާތެއް ދީފައެއް ނުވެ އެވެ.

މިއީ ކާންޔޭއާއި ބިއަންކާގެ ވަރީގެ ވާހަކަ މީޑިއާއަށް ތިލަވި ފުރަތަމަ ފަހަރެއް ނޫނެވެ. މީގެ ކުރިން ވެސް އެ ދެމީހުން ވަރިވާން އުޅޭކަމަށް އަޑު ފެތުރުނުއިރު އެ ދެމީހުން ވަނީ އޭރު އެކަން ދޮގުކޮށްފަ އެވެ.