މާލެ ސިޓީ ކައުންސިލުން ކޮންސަލްޓަންޓުން ގޮތުގައި އެމްޑީޕީގެ ސާދަ މީހަކަށް ވަޒީފާ ހަމަޖައްސާފައިވާނެ ކަމަށް މޭޔަރު އާދަމް އާޒިމް ވިދާޅުވެއްޖެ އެވެ.

ހދ. ކުޅުދުއްފުށީގައި އިއްޔެ ބޭއްވި އެމްޑީޕީގެ "ލާމަރުކަޒީ ގުޅުން" ކޮންފަރެންސްގައި ވާހަކަ ދައްކަވަމުން އާޒިމް ވިދާޅުވީ މާލޭ ސިޓީ ކައުންސިލް ހިންގުމުގައި ސަރުކާރުގެ ފަރާތުން މިހާތަނަށް އެއްވެސް ދައްޗެއް ކުރިމަތި ނުވާ ކަމަށާއި ކުރަން ބޭނުންވި ކަންކަން ހަމަޖެހުނު ކަމަށެވެ.

އެގޮތުން އޭނާ ފާހަގަކުރެއްވީ އެ ޕާޓީގެ 14 މީހަކަށް ކޮންސަލްޓެންޓުގެ ވަޒީފާ ވެސް ސިޓީ ކައުންސިލުން ހަމަޖައްސާފައިވާ ކަމަށެވެ.

"އަޅުގަނޑު ކޮންސަލްޓެންޓުން ނަގަން ބޭނުންވީމާ 15 ކޮންސަލްޓެންޓުން ނަގައިގެން ހަމަ އަޅުގަނޑުމެން ޕާޓީގެ މެމްބަރުން އެ ތިބީ ވެސް އެކަކު ނޫނީ،" އާޒިމް ވިދާޅުވި އެވެ.

ލައިވްކޮށް ދެއްކި އެ އިވެންޓްގައި މިފަދަ ވާހަކަ ދެއްކެވުމުން، އާޒިމް ވަނީ ހޫނުފެނަށް ވެއްޓިފަ އެވެ. ގިނަ ބަޔަކު ދަނީ އާޒިމް އަށް ފާޑު ކިޔަމުންނެވެ.

ފާހަގަކޮށްލެވޭ ގޮތުގައި ކުރިން އެމްޑީޕީން އިދިކޮޅުގައި ތިބި އިރު، މިހާރުގެ ރައީސް މުއިއްޒު މޭޔަރުކަމުގައި ހުންނަވައިގެ ސިޓީ ކައުންސިލުން ގާތް މީހުނާއި ޕާޓީ މީހުނަށް ބޮޑު މުސާރަ ލިބޭ ވަޒީފާތައް ހަމަޖެއްސެވުމުން އެމްޑީޕީން ވަނީ ވަރަށް ބޮޑަށް ފާޑު ކިޔާފަ އެވެ.

ކޮންސަލްޓަންޓުންގެ ގޮތުގައި ނަގާ ވަޒީފާތަކުގައި މަހެއްގެ މައްޗަށް 35،000 އާއި 50،000 ރުފިޔާއާ ދެމެދުގެ މުސާރަ ދެ އެވެ. ސިޓީ ކައުންސިލުން ރައީސް މުއިއްޒު މޭޔަރަކަށް ހުންނެވި އިރު ވަރަށް ގިނަ މީހުނަށް ބޮޑެތި އަދަދުތަކުން މުސާރަ ލިބޭ ގޮތަށް އެކި ކަންކަމުގައި ކޮންސަލްޓަންޓުން ނަގާފައި ތިއްބެވެ. އެކަމަށް ފާޑުކިޔުމަށްފަހު މިހާރު އެމްޑީޕީގެ މޭޔަރުވެސް ތަކުރާރު ކުރައްވަމުން ގެންދަވަނީ އެއްކަމެކެވެ.