އިޒްރޭލުން އަނެއްކާވެސް ފަލަސްތީނުގެ ގެދޮރުގެއްލިފައިވާ މީހުން ބޯހިޔާވަހިކަން ހޯދަމުން އަންނަ ޣައްޒާގެ މެދުތެރޭގައި ހުންނަ ނުސީރަތު ކޭމްޕަށް ހަމަލާދީ އެގާރަ މަހުގެ ތުއްތު ކުއްޖަކާއި އިތުރު ސޯޅަ މީހަކު ޝަހީދުކޮށްލައިފި އެވެ. މީގެ ތެރޭގައި ތޭރަ ކުޑަކުދިން ހިމެނެ އެވެ.

ރޭގެ ވަގުތެއްގައި މި ހަމަލާ ދީފައިވާއިރު، ހަމަލާގައި ޒަހަމްވި މީހުންގެ އަދަދު 42 އަކަށް އަރާކަމަށް ރިޕޯޓްތައް ބުނެ އެވެ.

މީގެ އިތުރުން އިޒްރޭލުން ޣައްޒާގެ ކަމަލް އަދުވަން ހޮސްޕިޓަލަށް މެޝިން ބަޑިން ހަމަލާދީ އެތަނަށް ވަދެގަނެ، ޑޮކްޓަރުން ތަކެއް ހައްޔަރުކުރުމާއި ގުޅިގެން ކުރަމުންދިޔަ އެމެޖެންސީ ސާޖަރީތައްވެސް ހުއްޓިފައިވާކަމަށް ފަލަސްތީނުގެ އިދާރާތަކުން ހާމަކުރެ އެވެ.

އިޒްރޭލުން އުތުރު ޣައްޒާގެ ޖަބާލިއާއަށް ވެރިވެގަތުމަށް ކުރަމުންދާ މަސައްކަތަށް ވިހި ދުވަސް ވެފައިވާއިރު، 770 މީހުން ޝަހީދުވެ 1000 މީހުން ޒަހަމްވެފައިވާކަމަށް ޣައްޒާ ސަރުކާރުގެ މީޑިއާ އޮފީހުން އިއްޔެ ހާމަކޮށްފައިވެ އެވެ. އިއްޔެވެސް އިޒްރޭލުން ދިޔައީ ޖަބާލިއާއަށް ގިނަ ހަމަލާތަކެއް ދެމުންނެވެ.

އިޒްރޭލުން މެދުއިރުމަތީގައި ހިންގަމުންދާ ގަތުލްއާއްމުގައި ފާއިތުވި ސައުވީސް ގަޑިއިރު ތެރޭގައި ލުބުނާނުންވެސް ވަނީ ނަވާރަ މީހަކު ޝަހީދުކޮށްލާފަ އެވެ. މިއާއެކު ލުބުނާނުގައި މިހާތަނަށް ޝަހީދުކޮށްލި މީހުންގެ އަދަދު 2593 އަށް ވަނީ އަރާފަ އެވެ.

އިޒްރޭލުން ޣައްޒާއަށް ހަމަލާދޭތާ އަހަރެއް ވެފައިވާއިރު މިހާތަނަށް 42،847 މީހުން ޝަހީދުވެ، ލައްކަ އަކަށްވުރެ ގިނަ މީހުން ޒަހަމްވެފައިވެ އެވެ.