މުޅި ދުނިޔޭގައި ވެސް މަޝްހޫރު މަންޒިލެއް ކަމަށްވާ ޖަޕާނުގެ މައުންޓް ފުޖީއަށް ސްނޯ ނުވެހޭތާ ރެކޯޑް މުއްދަތެއް ފާއިތުވެއްޖެ އެވެ.

ހަބަރުތައް ބުނާ ގޮތުގައި ކޮންމެ އަހަރަކު ވެސް އޮކްޓޯބަރު މަހުގެ ކުރީކޮޅު އެ ފަރުބަދައަށް ސްނޯ ވެހެން ފަށަ އެވެ. އެހެން ނަމަވެސް މި އަހަރުގެ މިއަދާ ހަމައަށް ވެސް މައުންޓް ފުޖީއަށް ސްނޯ ވެހެން ފަށާފައެއް ނުވެ އެވެ.

އެއާއެކު އެހެން އަހަރުތަކާ އަޅާބަލާއިރު އެ ފަރުބަދައަށް ސްނޯ ނުވެހި އޮންނަތާ ގާތްގަނޑަކަށް މަހެއްހާ ދުވަސްވީ އެވެ. މީގެ ކުރިން މިހާ ގިނަ ދުވަސް ވަންދެން ސްނޯ ނުވެހި އޮތީ 130 އަހަރު ކުރިން 1894 ވަނަ އަހަރު އެވެ.

ޖަޕާނުގެ މޫސުމީ އިދާރާއިން ބުނާ ގޮތުގައި މައުންޓް ފުޖީއަށް ސްނޯ ވެހުން ލަސްވަނީ މިއަހަރުގެ ހޫނު މޫސުން ދިގުލައިގެން ގޮސް އަދިވެސް އެ މޫސުމުގެ އަސަރު ޖައްވުގައި ހުރުމުންނެވެ.

"ވައިގެ ފިނިހޫނުމިން ވަރަށް މަތި. މިކަމުގެ ސަބަބުން ސްނޯ އުފައްދައިދޭ ފިނި ވައި ވަނީ ޖައްވުގައި ވަރަށް ބޮޑަށް މަދުވެފައި" އެ އިދާރާއިން ބުނެފައިވެ އެވެ.

އެ އިދާރާއިން އިތުރަށް ބުނީ މައުންޓް ފުޖީއަށް ސްނޯ ވެހުން ލަސްވުމުގެ ފަހަތުގައި މޫސުމަށް އަންނަ ބަދަލުތައް ވެސް ހިމެނޭ ކަމަށެވެ.

މިއަހަރުގެ ހޫނު މޫސުމަކީ ޖަޕާނުގައި މިހާތަނަށް ރެކޯޑު ކުރެވުނު އެންމެ ހޫނުގަދަ މޫސުން ކަމަށް ތަފާސް ހިސާބުތަކުން ދައްކަ އެވެ.

މައުންޓް ފުޖީއަކީ އަހަރުގެ ބޮޑު ބައެއްގައި ސްނޯއިން ފޮރުވިފައި އޮންނަ ފަރުބަދައެއް ނަމަވެސް ޖޫންއިން ފެށިގެން ސެޕްޓެމްބަރު މަހާ ހަމައަށް އެ ފަރުބަދައަށް ސްނޯއެއް ނުވެހެ އެވެ.

މި މުއްދަތުގައި ކޮންމެ އަހަރަކުވެސް އެތައް ހާސް ބަޔަކު އެ ފަރުބަދައިގެ އެންމެ މައްޗަށް އެރުމަށްޓަކައި މަސައްކަތް ކުރެ އެވެ. އެކަމުގެ ތެރޭގައި ގިނަ ބައެއްގެ ފުރާނަ ވެސް ވަނީ ގެއްލިފަ އެވެ.