ގަވާއިދާ ހިލާފަށް ރާއްޖެ ގެންނަ ދުންފަތުގެ ބާވަތްތައް ނައްތާލަން ހިނގާ ހަރަދު، އެ ތަކެތި ގެނައި މީހުން ދައްކަންޖެހޭ ގޮތަށް ގަވައިދު އިސްލާހުކޮށްފި އެވެ.

ދުންފަތުގެ ބާވަތްތައް ޕެކެޓުކޮށް ލޭބަލް ޖެހުމާ ބެހޭ ގަވައިދަށް މިއަދު ގެނައި އިސްލާހުގައި ވަނީ ދުންފަތުގެ ބާވަތްތައް ރާއްޖެއަށް އެތެރެކުރާ މަރުހަލާގައި އެ ގަވާއިދު ތަންފީޒުކުރުމުގެ ގޮތުން ގަވާއިދާ ހިލާފުވާ ފަރާތްތައް ޖޫރިމަނާ ކުރުމާއި ޖޫރިމަނާ ފައިސާ ނުދައްކާ ފަރާތްތަކުގެ އަތުން ފައިސާ ހޯދުމުގެ މަސައްކަތާއި ގަވާއިދާ ހިލާފަށް ހުންނަ ތަކެތި ނައްތާލުން ފަދަ ކަންކަން ކުރާނީ ކަސްޓަމްސް އިން ކަމަށެވެ. ނަމަވެސް އެ ނޫން މަރުހަލާތަކުގައި އެކަން ކުރާނީ އެޗްޕީއޭ އިން ކަމަށް އެ ގަވާއިދަށް ގެނައި އިސްލާހުގައިވެ އެވެ.

ޕޯސްޓު ނުވަތަ ކޮރިއަ މެދުވެރިކޮށް ނުވަތަ އޯޑަރުކޮށްގެން ވިޔަފާރީގެ ބޭނުން ފިޔަވައި އެހެނިހެން ހާލަތްތަކުގައ،ި ދުންފަތުގެ ބާވަތްތައް ރާއްޖެއަށް އެތެރެކޮށްފި ނަމަ އެ ތަކެތި ރާއްޖެ އެތެރެކުރި ފަރާތް ޖޫރިމަނާކުރުމަށްފަހު ކަސްޓަމްސްގެ އާންމު ގަވާއިދާ އެއްގޮތަށް އެ ތަކެތި ނައްތާލަންވާނެ ކަމަށެވެ.

އެ އިސްލާހުގައިވާގޮތުން އެތަކެތި ނައްތާލަންޖެހޭނީ ތިމާވެށްޓައް ގެއްލުން ނުވާ ގޮތަށެވެ. އަދި އެކަމަށް ހިނގާ ހަރަދު ދޭންޖެހޭނީ ގެނައި ފަރާތުންނެވެ.

ހިފަހައްޓާ ތަކެތި ކަސްޓަމްސްގެ ކޮންޓްރޯލް ދަށުގައި ހުންނައިރު ހިނގާ ހަރަދު ވެސް އެ ތަކެތި ރާއްޖެ ގެނައި ފަރާތުން ދައްކަންޖެހޭނެ ކަމަށް އެ އިސްލާހުގައިވެ އެވެ.

އެކަމަކު ޕޯސްޓް ނުވަތަ ކޮރިއަ ސާވިސް މެދުވެރިކޮށް ނުވަތަ އޯޑަރުކޮށްގެން އަމިއްލަ ބޭނުމަށް، ކަނޑައަޅާފައިވާ މިންވަރަށް ވުރެ އިތުރަށް ރާއްޖެއިން ބޭރުން އަންނަ މީހުން ގެންނަ ދުންފަތުގެ ބާވަތްތައް ޖޫރިމަނާ ނުކުރާނެ ކަމށް ވެސް އެ އިސްލާހުގައިވެ އެވެ.