ނޫސްވެރިކަމުގެ އެވޯޑް ދިނުމުގައި މަގާމުގެ ނުފޫޒު ބޭނުންކުރި ކަމަށް ތުހުމަތުކޮށް އެންޓި ކޮރަޕްޝަން ކޮމިޝަން (އޭސީސީ)ން މީޑިއާ ކައުންސިލް (އެމްއެމްސީ)އަށް ވަދެއްޖެ އެވެ.

އެނގިފައިވާ ގޮތުގައި ނޫސްވެރިކަމުގެ އިނާމު ދިނުމުގައި މަގާމުގެ ނުފޫޒު ބޭނުންކޮށް އުސޫލުތަކުގެ ބޭރުން އެވޯޑްތަކެއް ދީ ކޮރަޕްޝަނަށް މަގުފަހިވާ ކަންތައްތަކެއް ހިންގާފައިވާ ކަމަށް ތުހުމަތުކޮށް ހުށަހަޅާފައިވާ މައްސަލައެއް އޭސީސީން ދަނީ ތަހުގީގުކުރަމުންނެވެ.

އެވޯޑްގެ މައްސަލަ ޖެހުނީ އަދަދު ނޫހުން ގެނެސްދިން ރައީސް މުހައްމަދު މުއިއްޒު އެމަނިކުފާނުގެ ދޮންމަންމައަށް ހެދި އިހާނެތިގޮތުގެ ތަފްސީލް ހިމެނޭ ސްކީލާން ޑޮކިއުމެންޓްރީއަށް އެވޯޑު ލިބުމުންނެވެ. ސަރުކާރުން އަންނަނީ މީޑިއާ ކައުންސިލަށް ނުފޫޒުފޯރުވަން މަސައްކަތް ކުރަމުންނެވެ. އެގޮތުން މީޑިއާ ކައުންސިލްގެ ރައީސް އަހްމަދު މުސްތަފާ ޕީއެސްއެމްގައި އަދާކުރަމުންގެންދިޔަ ވަޒީފާއިން ވަކިކޮށް ބިރުދައްކާފައިވެ އެވެ. ފަހުން އޭނާގެ ވަޒީފާ އިޔާދަކުރުމުން ވަނީ އެވޯޑް މައްސަލައިގައި ބަޔާނެއް ނެރެފަ އެވެ.

އެ އެވޯޑް ހަފްލާއަށް ފަހު ސަރުކާރުން ބިރުދެއްކުމުން މި އަހަރުގެ އެވޯޑަށް އިންސާފުކުރި ޖަޖުންވެސް ވަނީ ތަހުގީގީ ނޫސްވެރިކަމުގެ އެވޯޑު ދިނީ އުސޫލާ ހިލާފަށް ކަމަށް ބުނެ އަމިއްލަ ނިންމުމާ ދެކޮޅަށް ބަޔާނެއް ނެރެފަ އެވެ.