މިހާރު ސިނަމާތަކުގައި ދައްކަމުން އަންނަ ބޮލީވުޑްގެ ފިލްމު "ބޫލް ބުލައްޔާ 3" ޝޫޓް ކުރަނިކޮށް އެ ފިލްމުގެ ލީޑު ތަރި ކާތިކް އާރްޔަންއަށް ދިމާވި ބިރުވެރި ހާދިސާއެއް އޭނާ ހިއްސާ ކޮށްފި އެވެ.

ކޮމެޑީ ނައިޓްސް ވިތު ކަޕިލްގައި އެ ފިލްމު ޕްރޮމޯޓް ކުރުމަށް ދިން އިންޓަވިއުއެއްގައި ކާތިކް ވަނީ އެ ތަޖުރިބާ ކިޔައިދީފަ އެވެ.

ކާތިކް ބުނީ ކޮލްކަތާގެ ގަބުރުސްތާނެއްގައި ފިލްމުގެ ޝޫޓިން ކުރިއަށް ދިޔަ ރެއެއްގައި ފިލްމުގެ ކުރޫއެއް ބުނެގެން "ގޯސްޓް ފައިންޑާ" ނަމަކަށް ކިޔާ އެޕްލިކޭޝަނެއް އޭނާގެ ފޯނަށް އެޅި ކަމަށެވެ.

އެ އެޕްލިކޭޝަނަށް ވަދެ އެ ސަރަހައްދުގައި ފޯނު ހިންގާލުމުން އެތަނުގައި ހުރި މަހާނައެއް ކައިރިން މީހެއްގެ ސިފައިގައި ހުރި އެއްޗެއް ފެނުނު ކަމަށް އޭނާ ބުންޏެވެ.

ކަން ދިމާކުރި ގޮތުން އެ މަހާނައަކީ ފިލްމުގައި ދެން ޝޫޓުކުރަން ޖެހޭ މަންޒަރުގައި ކާތިކް ހުންނަންޖެހޭ ތަނެވެ. އެހެން ނަމަވެސް އެ ކަން އެގޮތަށް ވުމުން ކްރޫއިން ކައިރީ ބުނެގެން އޭނާ ހުންނަން ޖެހޭ ތަން ބަދަލުކުރީ ކަމަށް ވެސް އޭނާ ބުންޏެވެ.

"ބޫލް ބުލައްޔާ 3"ގައި ކާތިކްގެ އިތުރުން ދެން ފެނިގެންދަނީ ވިދްޔާ ބާލަން، މަދޫރީ ޑިކްސިޓް އަދި ޓްރިޕްތީ ޑިމްރީ އެވެ. އެ ފިލްމަށް އަންނަނީ ބޮކްސް އޮފީހުގައި ބޮޑު ކާމިޔާބެއް ލިބެމުންނެވެ.